《大人囡á詩》

Tsînn-tâng-á ...錢筒á

作者 Li KhinhuaN

listen


Tsi̍t-khai-sí gúa īng tik-kóng-á
一開始我用竹管á
Tsò tsînn-tâng-á
做錢筒á
Khiām-tsînn
儉錢
Tsi̍t-tsat tik-kóng-á
一節竹管á
Úe tsi̍t-ê sè-sè tn̂g-hîng--ê
Úe一個細細長形ê
Gîn-kak-á khang
銀角á孔
Tsînn khǹg ē--lo̍h-khì
錢khǹg會落去
The̍h bē tshut-lâi
提bē出來
Tán i múa tsiah phùa hōo khui
等伊滿才破hōo開
Gín-á mā ē-tàng khiām tsin tsē tsînn
囡仔mā會tàng儉真濟錢
Gúa liān kah ū huat-tōo kā gîn-kak-á
我練 kah 有法度 kā 銀角á
Ùi hit-ê khang
Ùi hit ê 孔
Giaunnh--tshut-lâi
Giaunnh--出-來
Tong-jiân, gúa m̄-bat phùa kè pùann-ki tik-kóng-á
當然，我m̄-bat 破過半支竹管á
Āu--lâi īng súi-tang-tang ê âng-ti-á
後來用 súi-tang-tang ê 紅豬á
Tong-jiân, gúa mā m̄-bat thâi kùe
當然，我 mā m̄-bat thâi 過
Pùann-tsiah ti-á
半隻豬á
Tsit-má gúa gîn-hâng hit-kha tsînn-tâng-á
Tsit-má 我銀行hit kha 錢筒á
Tong-jiân mā m̄-bat senn tshut pùann-tsiah ti-á-kiánn
當然，mā m̄-bat 生出半隻豬á kiánn
--2003/5/14 Harvard