《耶穌言行錄》

| | | 轉寄

Tē-97-tsiuⁿ,Iâ-so͘ hō͘ To-má sìn

作者 Ko Kim-sing. 2010.02.14

（Iok-hān 20：24-31）
Iâ-so͘ tshut-hiān hō͘ tsìng hák-sing khuàⁿ，hit ê-hng To-má bô tī-teh，āu-lâi tò-lâi，tsìng ha̍k-sing īng Tsú koh-ua̍h ê tāi-tsí kā i kóng.Tō-má kóng，"Bô hō͘ guá khuàⁿ-kìⁿ I ê tshiú tiong-ng só͘ tìng ê jiah，īng tsńg-thâu-á thàm khuàⁿ I ê jiah，īng tshiú thàm khuàⁿ I ê hing-ha̍h，guá iā m̄ sìn. "

Kè pueh ji̍t ha̍k-sing koh tsū-tsi̍p，tsiū-sí lán hiān-tsāi ê an-hioh-ji̍t ê-hng，To-má tī-teh，mn̂g í-king kuaiⁿ，hut-jiân khuàⁿ-kìⁿ Iâ-so͘ khiā tī tiong-ng kóng，"Lín tsìng-lâng pîng-an，"tsiū kā To-má kóng，"Tshun lí ê tsńg-thâu-á thàm khuàⁿ guá ê tshiú，īng tshiú thàm khuàⁿ guá ê hing-ha̍h，ing-kai tio̍h sìn，m̄-thang giâu-gî. "To-má khuàⁿ-kìⁿ tsin-tsiàⁿ sī Iâ-so͘，tsiu7kong2，"Guá ê Tsú，guá ê Siōng-tè ah. "Iâ-so͘ kóng，"To-má ah，lí khuàⁿ-kìⁿ tsiah sìn，bô khuàⁿ-kìⁿ lâi sìn，hit hō lâng ū hok-khì. "

Lán hiān-tsāi ê pài-la̍k ji̍t tī Kū-iok ê sî-tsūn sī an-hioh-ji̍t，lán ê Tsú Iâ-so͘ ê sin-si hit ji̍t kui ji̍t hioh tī bōng-lāi，kàu bîn-ná-tsài thiⁿ-kng，tsiū-sī tshit ji̍t ê thâu-tsi̍t ji̍t，Tsú koh-ua̍h tuì bōng-nih tshut-lâi，tshut-hiān hō͘ kuí-nā lâng khuàⁿ-kìⁿ.Kàu ê-hng-sî tsìng sù-tô͘ tsū-tsi̍p，Tsú tshut-hiān tī in tiong-kan tsiok-hok in.Koh kè tsi̍t lé-pài，iû-guân sī tshit ji̍t ê thâu ji̍t，sù-tô͘ koh tsū-tsi̍p，Tsú koh-tsài tshut-hiān tī in ê tiong-kan.Tuì hit tia̍p liáu-āu，Sin-iok ê kàu-huē siông-siông siú tshit ji̍t ê thâu ji̍t tsuè sìng-ji̍t，kiò-tsuè Tsú ê ji̍t，lán ê lé-pài-ji̍t tsiū-sī.

思羅安台語點字網站