《耶穌言行錄》

| | | 轉寄

Tē-96-tsiuⁿ,Iâ-so͘ tshut-hiān hō͘ Sù-tô͘ khuàⁿ

作者 Ko Kim-sing. 2010.02.07

（Má-khó 16：12，13；Lō͘-ka 24：13-48）
Iâ-so͘ koh-ua̍h hit ji̍t ū tshut-hiān hō͘ Pí-tik khuàⁿ；ia̍h hit tsi̍t ji̍t ū nn̄g ê ha̍k-sing khì Í-má-ngó͘，nn̄g lâng saⁿ-kap kóng só͘ king-kè ê tāi-tsì，Iâ-so͘ kūn-uá kap in saⁿ-kap kiâⁿ.Ha̍k-sing bê-ba̍k buē jīn-tit.Iâ-so͘ kóng，"Lín kiâⁿ ê sî saⁿ-kap tâm-lūn sī sím-mi̍h tāi-tsì，tsiah ū iu-būn ê bīn-sik？"Tsi̍t lâng kóng，"Lí tī Iâ-lō͘-sat-líng kiám sī tuaⁿ-sin lâi hioh，iā m̄-tsai kūn-ji̍t só͘ king-kè ê tāi-tsì mah？"Iâ-so͘ kóng，"Sím-mi̍h tāi-tsì？"In tsiū kóng，"Ná-sat-li̍k lâng Iâ-so͘ ê tāi-tsì：I tsuè sian-ti lâng，tī Siōng-tè kap tsìng peh-sìⁿ ê bin-tsîng，só͘ kóng，só͘ kiâⁿ，tsiâu-tsn̂g hó，nā-sī lán ê tsè-si-tiúⁿ，iú-si-kuaⁿ kè-sàng I，gí sí-tsuē，tìng I tī si̍p-jī-kè.Tsit ê lâng guán pîng-sò͘ ū ǹg-bāng beh sio̍k-huê Í-sik-lia̍t ê peh-sìⁿ；m̄-nā án-ni，koh tsit ê tāi-tsì í-king tsiâⁿ ū saⁿ-ji̍t；guán ê tiong-kan kuí-nā ê hū-jîn-lâng hō͘ guán put-tsì gông-ngia̍u，sī in tsá-khì thàu-tsá khì bōng-nīh buē khuàⁿ-kìⁿ hit ê sin-si，tò-lâi kóng ū khuàⁿ-kìⁿ thiⁿ-sài tshut-hiān，kā in kóng Iâ-so͘. "

Iâ-so͘ kóng，"Bû-ti ê lâng ah，tsáiⁿ-iūⁿ m̄ sìn sian-ti lâng só͘ kóng w5 uē，ia̍h sim kàu tsiah tūn？Ki-tok siū hāi tsaih tit-tio̍h îng-kng，kiám m̄-sī ing-kai？Hit tia̍p Iâ-so͘ tuì Mô͘-se khì，í-ki̍p tsia̍h ê sian-ti lâng，huān-nā Sìng-tsheh só͘ kì-tsài ka-kī ê tāi-tsì ê，lóng-tsóng siông-sè kué-bîng.

Kūn-uá só͘ khì ê hiuⁿ-siā，Iâ-so͘ ná tshin-tshiūⁿ beh kiâⁿ khah hn̄g；nn̄g lâng kiông lâu I，kóng，"Sî í-king uàⁿ，ji̍t beh lo̍h，tshiáⁿ kap guán saⁿ-kap hioh；"Iâ-so͘ tsiū kap in hioh.Tsē-toh ê sî，Iâ-so͘ the̍h piáⁿ tsiok-siā，tsiū peh-phuà hō͘ in.Nn̄g lâng ba̍k-tsiu kng，uē jīn-tit Iâ-so͘，hut-jiân bô khuàⁿ-kìⁿ.Tsiū saⁿ-kap kóng，"I tī lō͘-nih lán kóng-uē，khui-thiah Sìng-tsheh ê sî，lán ê sim kiám bô jia̍t mah？"Tsik-sî khí-sim tò-khì Iâ-lō͘-sat-líng；tú-tio̍h tsa̍p-it ê sù-tô͘ kap tâng-phuāⁿ ê lâng tsuè tui teh kóng，"Tsú tsin-tsiàⁿ koh ua̍h hō͘ Se-bûn khuàⁿ-kìⁿ. "Tsí nn̄g lâng ia̍h tsiong lō͘-nih só͘ tú-tio̍h，kap peh-piáⁿ jin-tit Iâ-so͘，tsiah ê tāi-tsì lâi kóng.Teh kóng ê sî，Iâ-so͘ khiā tī in ê tiong-kan kóng，"Lín tsìng-lâng pîng-an. "Kóng ê sî，tsiong tshiú kap hing-ha̍h hō͘ in khuàⁿ；ha̍k-sing khuàⁿ-kìⁿ tsiū huaⁿ-hí，iáu-kú bô sìn lâi kî-kuài.Iâ-so͘ tsiū kóng，"Ū mi̍h thang tsia̍h á bô？"In hō͘ I，Iâ-so͘ tng in ê bīn-tsîng tsia̍h.Tsiū kóng "Mô͘-se ê lu̍t-kap sian-ti lâng ê tsheh，kap Si-phian só͘ kì-tsài tsí guá ê tāi-tsì lóng-tsóng uē ìng-giām，guá pîng-sò͘ kap lín tī-teh ê sî bat kóng. "Hit tia̍p Iâ-so͘ tsiū khui in ê sim-khiàu，hō͘ in uē thong-ta̍t tsiah ê Sìng-king.

思羅安台語點字網站