《耶穌言行錄》

Tē-11-tsiunn,Iâ-soo tùi Ai-ki̍p tò-lâi，Kàu sann-tsa̍p hè ê tāi-tsì

作者 Ko Kim-sing.

listen

（Má-thài 2：19-23；Lōo-ka 2：40-52）
Hi-lu̍t sí liáu-āu，Tsú ê thinn-sài tī Ai-ki̍p thok-bang7tshut-hiān kā Iok-sik kóng，"Khí-lâi tshūa Enn-á kap lāu-bú khì Í-sik-lia̍t ê tūe-hng，in-ūi ài hāi-sí Enn-á ê lâng í-king sí lah. "Iok-sik liâm-pinn khí-lâi，tshūa Enn-á kap lāu-bú kàu Í-sik-lia̍t ê tūe-hng.Thiann-kìnn Hi-lu̍t ê kiánn sùa-tsiap tsùe ông tsiū kiann，m̄-kánn khì khiā-khí tī Pik-lī-hîng；nā-sī tī bāng nih tit-tio̍h bi̍k-sī，tsiah khì Ka-lī-li Ná-sat-li̍k.Iâ-soo tiàm hia kàu tūa-hàn.Sìng-tsheh ū kóng，"Enn-á tsiām-tsiām tūa，tsing-sîn ióng-kiānn，tì-hūi tshiong-múa，Siōng-tè ê un-tián pì-iū I. "

Iû-thài lâng ū tsi̍t ê *Pûann-kè-tsueh，sī tsá tshut Ai-ki̍p ê sî，Siōng-tè siat-li̍p ê .Iok-sik kap Má-lī-a ta̍k nî tsiūnn Iâ-lōo-sat-líng lâi siú tsit ê tsueh，kau3Ia5-soo tsa̍p-jī hè ê sî，I ê pē-bú tshūa I sann-kap khì，tâng-kiânn ê lâng ia̍h tsin-tsūe.Tsueh-kî bîng-pi̍k，tāi-ke tò-lâi，Iâ-soo iáu-kú tī Iâ-loo7sat-líng，pē-bú m̄-tsāi，lia̍h-tsún kiò sī tshap tī tâng-kiânn ê lâng ê tiong-kan.Kiânn kàu tsi̍t ji̍t lōo，tsiah tshē bô，tsiū tò-tńg khì Iâ-lōo-sat-líng tshē.Tshē kàu sann ji̍t āu，tī tiān-nih tsiah tú-tio̍h，khùann-kìnn I tsē tī sian-sinn ê tiong-kan the tâm-lūn.Lâng thiann-kìnn I ê ūe lóng-tsóng kî-kùai I ê tshang-miâ，gau5in3-tap.Pē-bú khùann-kìnn ia̍h kî-kùai；I ê lāu-bú kóng，Kiánn，siánn-sū hōo gúan kàu án-ni？lí ê pē kap gúa iu-būn tshē lí.Iâ-soo ìn kóng，"Mi̍h-sái tshē gúa？
kiam2m7-tsai gúa ing-kai tī gúa ê Pē ê sóo-tsāi？
"Pē-bú thiann būe hiáu-tit，tsóng-sī lāu-bú tsiong tsiah ê ūe khǹg tī sim-lāi.Iâ-soo tsiū kap in tò-khì Ná-sat-li̍k，hàu-sūn pē-bú.Án-ni thang hōo lán tsai Iâ-soo tī sè-kan lóng tsīn lu̍t-huat lâi kiânn.Tē gōo tiâu kóng，"Tio̍h hàu-kìng lí ê pē-bú. "Iâ-soo án-ni kiânn sī ài lâng o̍h I ê bôo-iūnn.Gín-ná sui-jiân būe kàu tshin-tshiūnn Iâ-soo án-ni，iáu-kú tio̍h kiû Sìng Sîn pang-tsan lâi o̍h，tsiū Siōng-tè tik-khak huann-hí thiann，hōo-in ná kú ná o̍h hó ê khúan-sit.

Tùi Iâ-soo tsa̍p-jī hè kàu sann-tsa̍p hè，hit ê tiong-kan Sìng-tsheh bô lóng kì-tsài，iáu-kú tsai Iok-sik sī tsùe ba̍k ê sai-hū，phah-sǹg Iâ-soo ia̍h sī án-ni，in-ūi Sìng-tsheh kì-tsài，ū lâng kiò I tsùe ba̍k sai-hū.Án-ni hōo lán tsai I kánn ū pang-tsān Iok-sik tsùe kang thàn tsia̍h.I si̍t-tsāi sī Siōng-tè，iáu-kú"Khut-hā tsùe lâng，tsiânn lôo-po̍k ê khúan-sit. "Án-ni lán tio̍h o̍h Iâ-soo khiam-pi ê khúan-sit.Sìng-tsheh kóng，"Lín ing-kai tio̍h ū Ki-tok Iâ-soo hit hōo ê sim. "（Hui-li̍p-pí 2：5）

思羅安台語點字網站