《耶穌言行錄》

Tē-14-tsiunn,Iâ-soo hōo Môo-kuí tshì

作者 Ko Kim-sing.

listen



Hit-tia̍p kiáu-āu Sìng Sîn tshuā Iâ-soo khì khòng-iá，iá-sìu ê sóo-tsāi，hōo Môo-kuí tshì-liān.Iâ-soo tiàm hia sì-tsa̍p-ji̍t kú，kìm-tsia̍h kî-tó.Tsai iau ê sî Môo-kuí tsīu lâi kā i kóng，"Lí nā-sī Siōng-tè ê Kiánn，tio̍h bīng-līng tsiah ê tsioh-thâu pìnn-tsuè piánn. "Iâ-soo kóng，"Sìng-tsheh ū kóng，Lâng tit-tio̍h ua̍h，m̄-nā uá-khò piánn，sī uá-khò Siōng-tè sóo kóng ê uē，tsiah uē ua̍h. "Tsit hō ê tshì-liān bô tsiânn.Môo-kuí tsīu tshuā Iâ-soo kàu Sìng ê kiann-siânn，hōo-I khiā tiān-tíng，kā I kóng，Tsú in-uī lí ū huan-hù I ê thinn-sài，in tsīu uē īng tshíu hû-tshî lí，bián-tit lí ê kha tak-tio̍h tsio̍h. "Iâ-soo kóng，"Sìng-tshah ia̍h ū kóng，Bo̍h-tit tshì Tsú lí ê Siōng-tè. "Tsit hō ê tshì-liān ia̍h bô tsiânn.Môo-kuí tsīu tshuā Iâ-soo tsīunn-khì ki̍k kuâinn ê suann，tsiong thinn-ē bān-kok kap lóng-tsóng ê tsun-kuì īng-kngg ê tāi-tsì hōo I khuànn，kā I kóng，"Lí nā phak-the pài guá，tse lóng-tsóng beh hōo lí. "Iâ-soo kóng，"Sat-tàn thè-khì，Sìng-tsheh ū kóng，"Tio̍h pài Tsú lí ê Siōng-tè，to̍k-to̍k ho̍k-sāi I nā-tiānn. "Iâ-soo lóng bô lo̍h Môo-kuí ê khuân-thò，Môo-kuí tsīu lī-khui，thinn-sài lâi ho̍k-sāi I .

Tsāi-tsá Môo-kuí īng tsuâ lâi bê-hi̍k lán ê sí-tsóo liáu，Siōng-tè tuì tsuâ kóng，"Guá hōo lí kap hū-jîn-lâng kiat uan-sîu，lí ê hōo-è kap i ê hōo-è ia̍h sī án-ni；i uē siong-hāi lí ê thâu-khak，lí uē siong-hāi i ê kha-āu-tinn. "Iâ-soo hōo Môo-kuí tshì-liān ia̍h bô sīu bê-hi̍k，sī tú-tú ìng-giām koh-khah siông-sè.

Lán sīunn Iâ-soo sóo tú-tio̍h ê tshì-liān tsīu tsai Môo-kuí tsin lī-hāi，gâu tshē-phāng īng huat-tōo kè-bôo bê-hi̍k lâng；ū sî ia̍h īng Sìng-king ê uē lâi tò-tshì lâng.Sù-tôo Pí-tik pí-phīng Môo-kuí sī tshin-tshīunn the háu ê sai；sì-kuè kiânn，ài thun-kā lâng.

Lán khuànn Iâ-soo tī khòng-iá-nih，sóo īng ê khì-hâi thâi-iânn Môo-kuí sī Sìng-tsheh sóo kì-tsài ê uē，tú-tú ha̍p Pó-lô sóo kóng ê phì-jū kóng. "Siōng-tè ê tō-lí sī Sìng Sîn ê kiàm；"sóo-í lán tio̍h khûn-khûn káng-kìu Sìng-tsheh，tsiong tō-lí siu-khǹg tī sim-lāi，siông-siông siàu-liām.<ôo-kuí bíng，lán luán-jio̍k，iáu-kú m̄-sái sit-tsì.Iâ-soo í-king khah-iânn，lán uá-khò I，ia̍h tik-khak khah-iânn.Sìng-tsheh kóng，"I kì-jiân tú-tio̍h tshì-liān sīu kan-khóo，tsīu uē pang-tsān tú-tio̍h tshì-liān ê lâng"（Hi-pik-lâi 2：18）.

思羅安台語點字網站