《耶穌言行錄》

Tē-15-tsiunn,Siōng-tè ê Îunn-ko

作者 Ko Kim-sing.

listen


（Iok-hān 1：29-37）
Ū tsi̍t ji̍t，kiânn sué-lé ê Iok-hān khuànn-kìnn Iâ-soo lâi，tsīu kóng，"Khuànn Siōng-tè ê Îunn-ko，tam-tngg sè-kan lâng ê tsuē.Guá tāi-sing kóng，Āu-bé guá lâi，tāi-sing guá tī-teh，in-uī I pún-jiân khah tāi-sing guá，tsīu-sī tsit ê lâng. "

Tann Iok-hān tshing-hoo Iâ-soo tsuè Siōng-tè ê Îunn-ko，in-uī I tit-tio̍h thuè lâng sí，tam-tngg lâng ê cjue7，ná tshin-tshīunn tsuè sio̍k-tsuē ê tsè.Îu-thài lâng tsāi-tsá tsiáu Siōng-tè ê bīng-līng sóo hiàn ê tsè ta̍k hāng sī kuan-tsiò Iâ-soo.Hiàn-tsè ê sî tsè-si īng huih hìu，tsit ê tsīu-sī kuan-tsiò Li-tok ê huih sué-tû lâng ê tsuē.

Hiah ê hiàn-tsè ê tiong-kan put-tsí iàu-kín ê sī îunn-ko.Ū tiānn-tio̍h ê lē，ta̍k tsá-khí tio̍h tsè-hiàn tsi̍t tsiah，ta̍k ê-hngg ia̍h tio̍h án-ni.An-hioh-ji̍t tio̍h hiàn tîng-pē，līng-guā pa̍t-sî ia̍h tio̍h hiàn îunn-ko.Îunn-thài lâng ê tsueh-kî tiong-kan sǹg*Jû-ua̍t-tsueh tsuè iàu-kín.*Jû-ua̍t-tsueh tiong-kan，tē-it iàu-kín ê lé-sòo sī thâi îunn-ko hiàn-tsè Siōng-tè，lâi kì-liām tsāi-tsá Siōng-tè ê un-tián，kìu I ê peh-sìnn thuat-tshut Ai-ki̍p kok.In-uī tsit hō ê tāi-tsì tsīu tshing-hoo Iâ-soo，kiò tsuè Siōng-tè ê Îunn-ko.Tsing-sinn ê tiong-kan îunn-ko sǹg sī put-tsí tshing-khì，koh tsin kuai，in-uī án-ni īng îunn-ko kuan-tsiò Iâ-soo sī put-tsí ha̍p.Í-sài-a ū kóng，"I tsin-tshīunn îunn-ko hōo lâng khan kàu sí-tuē bô khui tshuì，tshin-tshīunn îunn tī tsián-mn̂g ê lâng ê bīn-tsîng bô tsuè siann. "

Siōng-tè ê Îunn-ko tsit tsūn tī thinn-nih tsē îng-kngg ê uī，tsuè Kìu-sè-tsú；lâng sìn I，uē tit-tio̍h sià-bián tsuē.Bua̍t-ji̍t Kìu-tsú beh koh kâi，hit sî sī tsuè sím-phuànn ê Tsú；puē-gi̍k ê lâng kiann-hiânn，kîu suann-thâu kóng，"Lí lâi the guán，khàm hōo guán bián-tit tsō-uī ê Tsú khuànn-kìnn；ia̍h bián-tit Îunn-ko ê tuā sīu-khì，in-uī Îunn-ko tuā sīu-khì ê ji̍t kàu，sím-mi̍h lâng tngg uē khí. "

Lán tio̍h hōo Îunn-ko sué lán tshing-khì，kì lán ê miâ tī a̍oh-miā ê tsheh，án-ni ún-tàng tsīunn-thinn，hióng-sīu íng-uán ê hok-khì kap thian-sîn gîm-si kóng，"Guān hok-khì，îng-kngg，kuân-lîng，khuì-la̍t，íng-uán kui tī tsō-uī ê Siōng-tè kap Îunn-ko. "

思羅安台語點字網站