《耶穌言行錄》

| | | 轉寄

Tē-21-tsiuⁿ,Sat-má-lī-a ê hū-jîn-lâng

作者 Ko Kim-sing. 2008.08.31

（Iok-hān 4：1-42）
Iok-hān kuaiⁿ-kaⁿ ê sî，Iâ-so͘ lī-khui Iû-thài，khì Ka-lī-lī.Lō͘ tuì Sat-má-lī-a king-kè，in-uī hit síng sī tī Iû-thài Ka-lī-lī nn̄g síng ê tiong-kan.Iâ-so͘ kiâⁿ kàu Sū-ka，sing-khu siān.Hit só͘-tsāi ū tsi̍t ê tsíⁿ，sī Ngá-kok só͘ khui ê；Iâ-so͘ tsē tī hia，ha̍k-sing ji̍p siâⁿ bué tsia̍h.

Ū tsi̍t ê hū-jîn-lâng tuì Sat-má-lī-a siâⁿ-lāi tshut-lâi tshiūⁿ-tsuí，Iâ-so͘ kóng，"Hō͘ guá lim. "Hū-jîn-lâng kónh，"Lí sī Iû-thài lâng，beh thài uē kā guán Sat-má-lī-a lâng thó tsuí？"In-uī Iû-thài lâng kap Sat-má-lī-a ê lâng bô saⁿ óng-lâi.Káng-kiù Sìng-tsheh tsiū tsai，tsá Í-sik-lia̍t tsa̍p ê tsi-phài ê lâng hō͘ A-su̍t kok ê ông lia̍h-khì ê sî，A-su̍t kok ê ông tshe pún-kok ê peh-sìⁿ puaⁿ khì Sat-má-lī-a khiā.Só͘-í Sat-má-lī-a lâng m̄-sī tsiàⁿ Í-sik-lia̍t ê lâng.Khí-thâu ê sî in sī pài pu̍t，āu-lâi suà ū kìng-uì Iâ-hô-hua.Koh Í-su-la̍h kap Nî-hi-bi tshuā Iû-thài lâng tuì Pa-pí-lûn tò-lâi，ài tī Iâ-lō͘-sat-líng koh-tsài khì tsi̍t king tiān，Sat-má-lī-a lâng ài kap in saⁿ-kap khí，Iû-thài lâng m̄ hō͘ i hūn，tuì án-ni nn̄g-pîng kiat-uàn.

Tiān khí hó，Sat-má-li-a ê lâng m̄ khíng khì hia pài Siōng-tè，sī tī Sat-má-lī-a Ki-lī-sim suaⁿ ū līng-guā khí tsi̍t king；tsiū nn̄g-pîng saⁿ uàn-hūn koh-khah tshim.

Iâ-so͘ thiaⁿ-kìⁿ hū-jîn-lâng ê uē，tsiū kóng，"Lí nā tsai kā lí thó tsuí lim sī tsī-tsuī， lí tik-khak kiû guá，guá tik-khak īng ua̍h ê tsuí hō͘ lí；lâng nā lim tsit ê tsuí uē koh tshuì-ta；lim guá só͘ hō͘ i ê tsuí，íng-uán buē tshuì-ta. "

Hū-jîn-lâng lóng buē hiáu-tit Iâ-so͘ ê ì-sù，kan-ta thiaⁿ-kìⁿ Iâ-so͘ kóng，"Lim tio̍h guá ê tsuí íng-uán buē tshuì-ta，"tsiū kóng，"Tsú ah，kì-jiân lí ê tsuí lim buē tshuì-ta，tshiáⁿ lí hō͘ guá lim.

"Iâ-so͘ kóng tsiah ê uē sī phì-jū nā-tiāⁿ，si̍t-tsāi m̄-sī kóng tuē-bīn-tsiūⁿ ê tsuí，sī kóng Sìng Sîn īng tō-lí kám-huà lâng ê sim.Sìng Sîn uē iúⁿ-tshī lâng ê lîng-hûn，tshin-tshiūⁿ lâng tshuì-ta lim tsuí uē iúⁿ-tshī sing-khu.Lâng bô lim sing-khu uē sí，nā bô siū tō-lí ê kám-huà，lîng-hûn uē tîm-lûn.Iâ-so͘ kā hū-jîn-lâng kóng，"Tio̍h khì kiò lí ê tiōng-hu lâi. "Ìn kóng，"Bô tiōng-hu. "Iâ-so͘ tsiū kā i kóng i àm-tsīⁿ só͘ kiâⁿ ê tāi-tsì，hū-jîn-lâng tsiah lia̍h Iâ-so͘ tsuè sian-ti，tsiū mn̄g Iâ-so͘ kóng，"Pài Siōng-tè ê só͘-tsāi tio̍h tī tá-lo̍h？in-uī Iû-thài lâng kóng tio̍h tī Iâ-lō͘-sat-líng，Sat-má-lī-a ê lâng kóng tio̍h tī Sat-má-lī-a. "Iâ-so͘ ìn kóng，"Tio̍h sìn guá，ji̍t beh kàu，lín kìng-pài Thiⁿ-pē put-lūn tī tsit ê suaⁿ，put-lūn tī Iâ-lō͘-sat-líng.Tsin kìng-pài ê lâng，īng sîn īng sîng-si̍t pài Thiⁿ-pē；in-uī Thiⁿ-pē ài lâng án-ni pài I.Siōng-tè sī sîn，pài I ê lâng tio̍h īng sîng-si̍t. "

Hū-jîn-lâng kóng，"Guá tsai Bí-sài-a tit-beh lâi，I nā kàu tik-khak īng tsìng hāng ê tō-lí lâi kà-sī guán. "Iâ-so͘ kóng，"Tsit-tia̍p kap lí kóng-uē ê tsiū-sī. "Hū-jîn-lâng thiaⁿ-kìⁿ tsit kù huaⁿ-hí，liâm-piⁿ pàng-sak tsuí-pân ji̍p siâⁿ khì kā lâng kóng，"Lâi khuàⁿ tsi̍t lâng，guá pîng-sò͘ só͘ kiâⁿ ê tāi-tsì，I lóng-tsóng tsai，thang kóng，káⁿ sī Ki-tok. "Tsìng-lâng tshut siâⁿ tsiū-kūn Iâ-so͘.Tú-tú hit-tia̍p ha̍k-sing bué mi̍h lâi，tshiáⁿ Iâ-so͘ tsia̍h，Iâ-so͘ kóng，"Guá ū mi̍h thang tsia̍h，lín m̄ tsai. "Hit sî ha̍k-sing buē bîng-pi̍k，saⁿ-kap kóng，"Thàn Siōng-tè ê tsí-ì sī guá ê bí-niû. "Hit ji̍t sǹg sī Sat-má-lī-a lâng hok-khì ê ji̍t-tsí，in-uī tsuē-tsuē lâng sîng-si̍t sìn Iâ-so͘，suà tshiáⁿ Iâ-so͘ kap in tuà.Iâ-so͘ tiàm hia nn̄g ji̍t tuì án-ni sìn ê lâng ke-thiⁿ it-huat tsuē.

Hiān-sî Iâ-so͘ tsē tī Thiⁿ-pē ê tsiàⁿ-tshiú pîng，ia̍h huaⁿ-hí īng ua̍h-miā ê tsuí hō͘ kiû I ê lâng.Sìng-tsheh kóng，"Tshuì-ta ê tio̍h lâi，ài tit-tio̍h ua̍h-miā ê tsuí uē pe̍h-pe̍h tit-tio̍h. "

思羅安台語點字網站