《耶穌言行錄》

| | | 轉寄

Tē-26-tsiuⁿ,Táⁿ-tia̍p jia̍t-pīⁿ ê，thài-ko ê

作者 Ko Kim-sing. 2008.10.05

（Má-thài 8：1-4，14-17；Má-khó 1：29-45； Lō͘-ka 4：38-41，5：12-16）
Iâ-so͘ tuì huē-tn̂g tshut-lâi，kap Ngá-kok，Iok-hān khì Se-bûn，An-tik-lia̍t ê tshù.Hit king tshù ū tsi̍t hāng iu-būn ê tāi-tsì.Sī Pí-tik ê tiūⁿ-ḿ jia̍t-pīⁿ，piàn-sin jia̍t-kún-kún.Ha̍k-sing khiàⁿ-kìⁿ i huah kan-khó͘，tsiū put-tsí khó-lîn i，liâm-piⁿ pò Iâ-so͘.Iâ-so͘ ji̍p i ê pang，khan i ê tshiú，jia̍t tsiū thè，liâm-piⁿ tsiàu-guân，khì-lâi ho̍k-sāi tāi-ke.

Iâ-so͘ hit tia̍p piàn kiâⁿ Ka-lī-lī síng，thuân tō-lí；ū sî kuáⁿ kuí，ū sî i-pīⁿ；tsin-tsuē lâng tsiū-kūn Iâ-so͘ lâi tit-tio̍h I ê lîn-bín.

Ū tsi̍t ê thài-ko ê lâi，kuī tī Iâ-so͘ ê kha-ē，kiû kóng，"Tsú nā khíng，tik-khak uē hō͘ guá tshing-khì. "Hit ê thái-ko ê sī tsai Iâ-so͘ ū kuân uē i-hó i，in-uī sìn I sī Siōng-tè ê Kiáⁿ；tsóng-sī m̄-tsai Iâ-so͘ beh á m̄.Só͘-í kóng，"Tsú nā khíng，tik-khak uē hō͘ guá tshing-khì. "Iâ-so͘ lîn-bín，tshiú bong i kóng，"Guá khíng，lí thang tshing-khì. "Hit ê lâng liâm-piⁿ hó.Iâ-so͘ kah i khì hō͘ tsè-si giām，tsiàu Mô͘-se ê lē hiàn lé-mi̍h，tsuè tit-tio̍h tshing-khì ê kan-tsìng.

Thái-ko ê pīⁿ thang pí-phing tsuē ê khuán.Lâng nā bē tit-tio̍h sià-tsuē，bē hō͘ Sìng Sîn kám-huà，tī Siōng-tè ê bīn-tsîng put-tsí ù-uè，buē tit-tio̍h ji̍p thian-kok.Lán nā ài sim tshing-khì-siùⁿ，tio̍h o̍h hit ê thái-ko ê ê khuán，lâi tsiū-kūn Iâ-so͘；tsóng-sī m̄-sái gî-ngái Tsú khíng á m̄-khíng，in-uī Tsú bat kóng，"Huān-nā tsiū-kūn guá ê lâng，guá m̄ pàng-sak i. "

思羅安台語點字網站