《耶穌言行錄》

| | | 轉寄

Tē-30-tsiuⁿ,Siú An-hioh-ji̍t

作者 Ko Kim-sing. 2008.11.02

（Má-tjai3 12：1-16；Má-khó 2：23-3：5）.
Huat-lī-sài lâng ū-sî tuì-tiōng guā-phê ê lé-só͘ khah tuì-tiōng iàu-kín ê tō-lí，án-ni ia̍h tuā tshò-gō͘.Iâ-so͘ īng kuí-nā hō ê huat-tō͘ tsik-pī Huat-lī-sài lâng ê m̄-tio̍h，hō͘ lán tsai An-hioh-ji̍t tsin ê tō-lí.Ū tsi̍t pái，tī An-hioh-ji̍t Iâ-so͘ kap ha̍k-sing king-kè tshân-hn̂g；ha̍k-sing iau，tsiū tiah be̍h-suī，īng tshiú jê lâi tsia̍h.Tsiàu in kok ê lē，tsit ê tāi-tsì bô thang hiâm，nā-sī Huat-lī-sài lâng hiâm kóng sī huān-tio̍h An-hioh-ji̍t ê tsuē.Iâ-so͘ kóng-khí kuí-nā hāng ê tō-lí pok-tó in.Tāi-sing ín-khí Tāi-pi̍t kap tè i ê lâng iau ê sî só͘ kiâⁿ ê tāi-tsì，tsiū-sī tsia̍h Siōng-tè king-lāi pâi-lia̍t ê piáⁿ.Tsiàu huat-tō͘ tsit hō ê piáⁿ，to̍k-to̍k tsè-si thang tsia̍h，pa̍t-lâng m̄-thang tsia̍h.Tāi-pi̍t kap tè i ê lâng lâi tsia̍h，ia̍h bô huān-hiâm，sī hō͘ lán tsai lâng ê sìⁿ-miā sī khah iàu-kín guā-phē ê lé-só͘.Iâ-so͘ koh ín-khí tsè-si tī tiān-tn̂g ê la̍i-bi̍n ho̍k-sāi ê tāi-tsì，tsiū-sī ta̍k-ê An-hioh-ji̍t tio̍h-buâ tsuè-kang，ia̍h bô huān-hiâm，in-uī só͘ kiâⁿ ê tāi-tsì，sī thàn Siōng-tè ê bīng-līng，tia̍niah sio̍k tī Siōng-tè tsuè sìng ê só͘-tsāi.Iâ-so͘ tsí ka-kī tsiū kông，"Tī-tsia ū pí tiān-tn̂g khah tuā ê. "Lâng ê tshiú só͘ khí ê tiān sī kuan-tsiò nā-tiāⁿ，Siōng-tè tsin-si̍t ê tiān sī Iâ-so͘ pún-sin.Tsè-si An-hioh-ji̍t tī tiān-lāi tsiàu huat-tō͘ ho̍k-sāi，siōng-tshiáⁿ bô tsuē，hô-hòng Iâ-so͘ ê ha̍k-sing tè I lâi kiâⁿ bô thang hiâm.Iâ-so͘ koh ín-khí sian-ti Hô-se-a tsi̍t tsat，tsiū-sī"Guá ài lîn-bín，m̄-ài tsè-sū. "Koh kóng，"An-hioh-ji̍t in-uī lâng ê lī-ik tsiah siat-li̍p，m̄-sī in-uī An-hioh-ji̍t tsiah siat-li̍p lâng；só͘-í Jîn-tsú sī An-hioh-ji̍t ê Tsú. "Jîn-tsú nā tsuè An-hioh-ji̍t ê Tsú，I ê ha̍k-sing tio̍h tsim-tsiok siú，tsit ê sī tsū-jiân ê tō-lí，tsóng-sī tio̍h thàn Tsú ê kà-sī lâi siú，iàu-kín tio̍h tsuè lâng ê lī-ik.Ē-tué só͘ kì-tsài tsit hāng ê tāi-tsì，ia̍h sī saⁿ-tâng ê tō-lí.

Koh āu ê An-hioh-ji̍t Iâ-so͘ ji̍p huē-tn̂g，tī hia ū tsi̍t lâng tshiú ko͘-tâ，ū lâng mn̄g kóng，"An-hioh-ji̍t i-pīⁿ thang mah？"Ì-sù sī beh gí-tiāⁿ I ê tsuē.Iâ-so͘ tsiū kóng，"Lín tiong-kan tsī-tsuī-á ū iûⁿ. "An-hioh-ji̍t pua̍h-lo̍h khiⁿ，bô khan i khí-lâi ah？Lâng kiám bô khah kuì-khì tī iûⁿ mah？
An-hioh-ji̍t kiâⁿ hó-sū sī ha̍p-gî. "Liâm-piⁿ kā hit ê lâng kóng，"Tio̍h tshun-tshiúⁿ. "I thàn Iâ-so͘ ê uē，liâm-piⁿ hó.Khuàⁿ tsit hāng só͘ kì-tsài ê tāi-tsì，tsiū tsai Iâ-so͘ put-tsí uē piān-tó tuì-ti̍k，ia̍h gâu thé-thiap lîn-bín lâng，ia̍h ū kuân thang pang-tsān lâng.Lán iàu-kín tio̍h o̍h tsit ê tshiú ko͘-tâ ê，thiaⁿ Iâ-so͘ ê bīng-līng liâm-piⁿ thàn.Sui-bóng pîng-só͘ bô khuì-la̍t thang tsuè tsi̍t hāng ê hó，tshin-tshiūⁿ ko͘-tâ ê tshiú iáu-kú nā khíng thàn Iâ-so͘ ê bīng-līng，tsiū uē tit-tio̍h khuì-la̍t.

思羅安台語點字網站