《耶穌言行錄》

| | | 轉寄

Tē-32-tsiuⁿ,Iâ-so͘ tī suaⁿ-tíng kóng tō-lí

作者 Ko Kim-sing. 2008.11.16

（Má-thài 5：1-6：4）
Ū tsi̍t ji̍t，Iâ-so͘ tsiūⁿ suaⁿ the tsē，ha̍k-sing tsū-tsi̍p；Iâ-so͘ tsiū khui-thiah thian-kok ê tō-lí kà-sī in.Thâu-tsi̍t hāng sī kóng tsin ê hok-khì sī tsáiⁿ-iūⁿ：tsiū kóng，"Khang-hu sim，ai-siong，un-jiû，him-bō͘ gī，kiâⁿ lîn-bín，sim tshing-khì，hô-pîng，in-uī gī tú-tio̍h khún-tio̍h，uī-tio̍h guá siū lâng lué-mē khún-tio̍k，tsit tíng-hō ê lâng ū hok-khì. " Lâng ài tit-tio̍h thian-kok ê hok-khì tio̍h ū tsit hō ê sim-tsîng.Tsit hō hok-khì kap sè-kan lâng só͘ phah-sǹg tsuè hok-khì sī saⁿ tuì-huán，to̍k-to̍k tsit hō sī tsin，pa̍t hō lóng sī ké，lō͘-bé bô hō͘ lâng ti-tsiok ia̍h bô kú-tn̂g.Tsit hō tsiū-sī Sìng Sîn só͘ sù tī thian-kok ê peh-sìⁿ，sim-lāi tsāi siⁿ ū，sí-āu koh-khah tshim. Lâng nā tit-tio̍h tsit hō thian-kok ê khuán-sit tsiū uē tsuè ū lō͘-īng ê lâng，phì-jū tsuè tuē-nih ê iâm，sè-kan ê kng， ín-tshuā lâng kui îng-kng tī Thiⁿ-pē.

Gī-lūn tsit hō ê tō-lí bîng-pi̍k，Iâ-so͘ koh kà-sī lán tio̍h put-tsí suè-jī kiâⁿ hó，tsim-tsiok thàn Siōng-tè lóng-tsóng ê kài-lu̍t，m̄-nā guā-phuê tio̍h thàn，ia̍h tio̍h tsīn khuì-la̍t hō͘ sim-kuaⁿ lāi-bīn ê só͘ ái tú-tú ha̍p Siōng-tè ê kài-lu̍t，tshim-tshim ê ì-sù.M̄-nā m̄-thang khik-khui lâng，huán-tńg tio̍h thiàⁿ lâng tshin-vhhiunn7 thiàⁿ ka-kī.M̄-nā tio̍h thiaⁿ pîng-iú，ia̍h tio̍h thiàⁿ tuì-ti̍k.Lâng lué-mē lán，lán tio̍h kā i tsiok-hok；lâng uàn-hīn lán，lán tio̍h hó khuán-thāi i；lâng hām-hāi khún-tio̍h lán，lán tio̍h thuè i kî-tó；án-ni tsiū tsuè Thiⁿ-pē ê kiáⁿ-luī；in-uī Thiⁿ-pē īng ji̍t tsiò-kng hó ka[ m̄-hó ê lâng，īng hō͘ lūn-ti̍k gī-lâng kap put-gī ê lâng.Iâ-so͘ tsiah koh kóng tsi̍t kù tsin pau-hâm，tsiū-sī kóng，"Lín ê Thiⁿ-pē sī tsiâu-tsn̂g hó，lín tio̍h tsiâu-tsn̂g hó tshin-tshiūⁿ I. "

Iâ-so͘ ia̍h kíng-kài lán m̄-thang tsin-tshiūⁿ Huat-lī-sài lâng ké-iàⁿ ho̍k-sāi Siōng-tè，á-sī tsuè hó sū tiâu-kò͘-ì lâng khuàⁿ-kìⁿ，thang tit-tio̍h îng-hián tī lâng.Tsín-tsè sī ìng-kai tio̍h kiāⁿ ê tāi-tsì，tsóng-sī m̄-thang īng tsín-tsè kiû kong-lô，á-sī hō͘ lâng o-ló lán tsuè hó-sim；tsín-tsè ìng-kai in-uī lán sîng-si̍t ū tsû-sim，lîn-bín lâng ê kan-khó͘，ài lī-ik lâng；án-ni tsiū-sī ha̍p Siōng-tè ê ì-sū.Iâ-so͘ kóng，"Tsín-tsè ê sî，M̄-thang hō͘ tò-tshiú tsai tsiàⁿ-tshiú ê só͘ tsuè，tsiū uē tit-tio̍h Thiⁿ-pē ê siúⁿ. "

思羅安台語點字網站