《耶穌言行錄》

| | | 轉寄

Tē-33-tsiuⁿ,Iû-guân tī suaⁿ-tíng kóng tō-lí

作者 Ko Kim-sing. 2008.11.23

（Má-thài 6：5-18）.
Iâ-so͘ koh tsiong kî-tó ê tāi-tsì kà-sī lán，kóng lán m̄-thang tsin-tshiūⁿ ké-hó ê lâng，huaⁿ-hí khiā kong-hîng ê só͘-tsāi；tio̍h ji̍p ba̍t-pâng kuaiⁿ-mn̂g，kiû- lâng khuàⁿ buē tio̍h ê Pē，ia̍h m̄-thang tsin-tshiūⁿ pài-pu̍t ê lâng ta̍uh-ta̍uh liām，in-uī lán só͘ khiàm-īng，bē kiû ê tāi-sing，Thiⁿ-pē í-king tsai.Iâ-so͘ tsiū kà-sī in kî-tó，kóng，"Lín kî-tó tio̍h kóng，Guán tī thiⁿ-nih ê Pē，Guān Lí ê miâ sìng.Lí ê kok lîm-kàu.Lí ê tsí-ì tit tsiâⁿ，tī tuē-nih tsin-tshiūⁿ tī thiⁿ-nih.Guán ê ji̍t-si̍t，kin-á-ji̍t hō͘ guán.Sià-bián guán ê ko͘-hū，tshin-tshiūⁿ guán ia̍h ū sià-bián ko͘-hū guán ê lâng.Bo̍h-tit tshuā guán ji̍p tī tshì，tio̍h kiù guán thuat-lī hit ê pháiⁿ ê.In-uī kok，kuân-lîng，îng-kng lóng sī Lí só͘ ū，tāi-tāi bô tsīn.À-bīng. "Khuàⁿ tsit kuí kù kî-tó ê uē，ū kuí-nā hāng put-tsí iàu-kín ê kà-sī.Thâu-tsi̍t hāng，Siōng-tè m̄-nā tso-sing pó-iúⁿ lán，ia̍h ū hō͘ Ki-tok sio̍k-huê lán，koh huaⁿ-hí īng Sìng Sîn tîng-thâu-siⁿ lán，lán siông-siông tio̍h siàu-liām tsit hō ê tō-lí，jīn Siōng-tè tsuè Pē；īng kiáⁿ ê sim lâi tshin-kūn I.Tē-jī，Sī lán tio̍h kìng-tiōng I ê miâ，ia̍h kiû I hō͘ sè-kan lóng-tsóng ê lâng uē tsai I sī tsì-sìng，lâi kui tī I.Tē-saⁿ，Sī kiû Siōng-tè hō͘ lán kap lóng-tsóng ê lâng huaⁿ-hí hâng-ho̍k I ê kuán-hat，tsuè I ê peh-sìⁿ.Tē-sì，Siōng-tè ê tsí-ì tī thiⁿ-nih，lóng-tsóng tsun-thàn，bô uî-ke̍h；tio̍h kiû I hō͘ lán kap tuē-bīn-tsiūⁿ lóng-tsóng ê lâng ia̍h uē án-ni.Tē-gō͘，Thang tsai lán jio̍k-sin ū ha̍p-gî ê khiàm-īng，ia̍h thang tuì Siōng-tè kiû；tsóng-sī m̄-thang kè-thâu khuà-lū，ia̍h m̄-thang it-bī siūⁿ ài beh liâm-piⁿ tit-tio̍h hè-mi̍h put-tsí tsuē，tsik-tsū tsuè kú-tn̂g ê lō͘-īng，Ta̍k-ji̍t sī kiû ta̍k-ji̍t só͘ tio̍h īng ê tsiū hó；án-ni sī hián-bîng ti-tsiok ê sim，ia̍h Siōng-tè bô m̄ siúⁿ-sù lán.Tē-la̍k Tio̍h suè-jī siūⁿ ka-kī ū sià-bián lâng ê sim á bô；tio̍h kiû Siōng-tè siúⁿ-sù lán tsit hō ê sim，tsiah thang ǹg-bāng ka-kī ê tsuē-kuà uē tit-tio̍h Thiⁿ-pē ê sià-bián.Lán kî-tó ê sî tio̍h kí-tit ka-kī sī tāng-tsuē ê lâng，só͘-í tio̍h sîng-si̍t jīn-tsuē kiû sià-bián.Tē-tshit，Sè-kan sī tshì-liān ê só͘-tsāi，tsin-tsuē pháiⁿ-tāi uē ín-iú lán hām-lo̍h tsuē；koh lán ka-kī put-tsí luán-jio̍k，bô khuì-la̍t uē khah-iâⁿ pháiⁿ；só͘-í tio̍h kiû Thiⁿ-pē tsín-kiù，tsiah uē bián-tit guî-hiám.Sìng-tsheh kóng，"Lín kan-lân ê ji̍t kiû guá，guá tik-khak kiù lín.

"Lō͘-bé kuí kù sī hō͘ lán tsai lán só͘ tuì kî-tó ê，si7u7 kuân-lîng ê Siōng-tè；só͘-í tio̍h sìn，tio̍h uá-khò；in-uī I uē tsiâⁿ bān-hāng ê tāi-tsì.Kî-tó ê sî iàu-kín só͘ kóng ê uē m̄-thang kap sim bô tâng；siat-sú án-ni，tsiū buē-tit-thang kóng，"À-bīng，"á-sī"Sim tsìng só͘ guān；"ia̍h Thiⁿ-pē m̄ ún-tsún；só͘-í tio̍h īng sîng-si̍t ê sim，tsiū só͘ kiû ê uē tit-tio̍h.À-bīng ê ì-sù sī sîng-si̍t，sī tsí lán kî-tó tio̍h īng sîng-si̍t，in-uī Siōng-tè sī tsin-si̍t，kóng-tshut tsiū kiâⁿ.

Iâ-so͘ ia̍h kà-sī lán kìm-tsia̍h ê tō-lí.Kìm-tsia̍h ê ì-sù sī in-uī iu-būn jīn-tsuē tī Siōng-tè r5 bīn-tsîng；só͘-í m̄-thang tsin-tshiūⁿ ké hó ê lâng，tài iu-iông，pìⁿ bīn-sik，īng kìm-tsia̍h beh hō͘ lâng o-ló lán tsuè khiân-sing.Iâ-so͘ kóng，"Kìm-tsia̍h ê sî thâu-mn̂g tio̍h buah iû，bīn tio̍h sué，bo̍h-tit īng kìm-tsia̍h hō͘ lâng khuàⁿ，tsiū uē tit-tio̍h Thiⁿ-pē ê siúⁿ. "

思羅安台語點字網站