《耶穌言行錄》

| | | 轉寄

Tē-34-tsiuⁿ,Iû-guân sī suaⁿ-tíng só͘ kóng—ê

作者 Ko Kim-sing. 2008.11.30

（Má-thài 6：19-7：12）.
Iâ-so͘ khó͘-khǹg ha̍k-sing m̄-thang tsik-tsū gia̍p tī tuē-nih；sè-kan ê hù-kuì put-tsí khuài sit-lo̍h.Tio̍h tsik-tsū gia̍p tī thiⁿ-nih，tsiū íng-uán buē sit-lo̍h，buē pāi-huāi.Lán ê gia̍p tsik-tsū tī tah-lo̍h，lán ê sim-kuaⁿ ia̍h ǹg tī hia.Siat-sú lán ê sim bô ǹg tī thiam-tông，lâi ǹg tī sè-kan，sī tshin-tshiūⁿ ba̍k-tsiu hue，sim-lāi ê kng pìⁿ tsuè àm.Iâ-so͘ īng tsit hō ê phì-jū sī kà-sī lán m̄-thang tshiò-gō͘ tsin ê tō-lí，tio̍h suè-jī tsiàu-kò͘ sim-sìng phín-hīng，him-bō͘ íng-uán ua̍h ê tāi-tsì.

Lán o̍h Iâ-so͘ ê só͘ kiâⁿ，kui îng-kng tī Siōng-tè，tsiàu ki-huē lī-ik lâng，tsit ê thang kiò-tsuè tsik-tsū gia̍p tī thiⁿ-nih.Tshin-tshiūⁿ Iâ-so͘ pa̍t só͘-tsāi ê uē，tsiū-sī kóng，"Tio̍h īng put-gī ê tsîⁿ-tsâi kiat-kau hó ê pîng-iu2tsiu7 lín sòng-sit ê sî。Uē hō͘ i tsiap-la̍p tī kú-tn̂g ê tshù. "Iâ-so͘ koh kóng，"Tsi̍t lâng buē-uē ho̍k-sāi nn̄g ê tsú-lâng；kiám-tshái uàn tsit-ê，thiàⁿ hit-ê；kiám-tshái kìng-tiōng tsit-ê，khuàⁿ-khin hit-ê；lín buē-uē ho̍k-sāi Siōng-tè，suà ho̍k-sāi tsîⁿ-tsâi. " Iâ-so͘ ia̍h beh hō͘ lán m̄-sái khuà-lū tsáiⁿ-iūⁿ thang tsia̍h，tsáiⁿ-iūⁿ thang lim，tsáiⁿ-iūⁿ thang tshīng，tsiū kóng，"Tio̍h khuàⁿ pe ê tsiáu，bô tsìng bô tsoh，Siōng-tè ia̍h tsiàu-kò͘，lín liám bô khah kuì-khì tsiáu mah？koh tio̍h khuàⁿ pik-ha̍p-hue tsáiⁿ-iūⁿ tuā tsâng，bô tio̍h-buâ，bô pháng-tseh；ia̍h tsá Só͘-lô-bûn hâng-ngó͘ kàu-ki̍k，i ê saⁿ ê suí buē ta̍t-tio̍h tsit ê hue ê tsi̍t-luí.Siōng-tè siōng-tshiáⁿ hō͘ hue suí kàu án-ni，hô-hòng beh tsiàu-kò͘ lín sió-khuá sìn ê lâng mah？

Lán kiâⁿ lō͘ kiám-tshái khuàⁿ hue，á-sī tsiáu，tio̍h kì-tit sī Siōng-tè tshòng-tsō，ia̍h sī Siōng-tè the tsiàu-kò͘；koh ìng-kai tsai Siōng-tè m̄-nā tsiàu-kò͘ tsiah ê mi̍h nā-tiāⁿ，ia̍h put-sî koh-khah tì-ì the tsiàu-kò͘ lán.Hue，tsiáu m̄-sī kuì-khì ê mi̍h，lóng bô sim-sîn uē hiáu-tit o-ló Siōng-tè，ia̍h bô lîng-hûn thang tit-tio̍h kiù.Hue huat-siⁿ，bô kú tsiū siā；tsiáu káu sí ia̍h suah.Lán sí buē kóng suah，ū lîng-hûn uē íng-uán tī-the.Só͘-í lán iáu-kú tiàm sè-kan ê sî，tio̍h kiû Siōng-tè ê kok kap gī，sè-kan ê tāi-tsì m̄-sái khuà-lū，tsiū só͘ yio̍h īng ê mi̍h，Siōng-tè tsū-jiân hō͘ lán.

Lán ê lâng siông-siông gâu hiâm pa̍t-lâng ê m̄-tio̍h，kiám-tshái ka-kī ê m̄-tio̍h tuā，ia̍h lóng buē hiáu-tit siūⁿ，Iâ-so͘ tāng-tāng tsik-pī lán tsit hō ê khuán-sit，kíng-kài lán m̄-thang gí-gī lâng，kiaⁿ-liáu uē hō͘ Siōng-tè gí-gī lán；koh kóng，"Kè hó ê lâng ah，tio̍h tāi-sing tû-khì ka-kī ba̍k-tsiu-lāi ê îⁿ-á-tshâ，tsiah uē bîng-bîng khuàⁿ-kìⁿ thang tû-khì hiaⁿ-tī ba̍k-tsiū-lāi ê tsháu-á-iù. "

Iáu-kú m̄-thang iông-ún pháiⁿ-tāi tī kàu-huē lâi.Lâng tsin-tsiàⁿ ū pháiⁿ ê phín-hing，tio̍h kik i tshut.Kap tsit hō ê lâng kau-puê tsuè hiaⁿ-ti，sī bô lī-ik in，ia̍h kiám-tshái uē hāi ka-kī.Iâ-so͘ kóng，"Bo̍h-tit tsiong sìng ê mi̍h hō͘ káu，bo̍h-tit tsiong lín ê tsin-tsu hiat hō͘ ti. "Pháiⁿ phín-hīng si̍t-tsāi khó-ò͘ⁿ tī Siōng-tè ê bīn-tsîng.

Iâ-so͘ í-king kah lán m̄-thang khuà-lū āu-ji̍t ê sū，koh tsí-sī lán tsai Siōng-tè put-tsí uán-hūn pháiⁿ-tāi；kiám-tshái ū lâng siūⁿ ka-kī ê pîn-tsiān，bô lâng thang uá-khò，á-sī kiám-tshái siūⁿ ka-kī ê tāng tsuē put-tsí thang hō͘ Siōng-tè m̄-ti̍h，taⁿ ū sím-mi̍h lō͘ thang bián-tit sit-tsì，m̄-sái khuà-lū？

Tsiū-sī tio̍h tsiong lóng-tsóng ê tāi-tsì pâi-lia̍t tī Thiⁿ-pē ê bīn-tsîng，tit-tio̍h uá-khò I，kì-tit I ê thiàⁿ lán sī bān-pē khah iâⁿ pē-bú ê thiàⁿ.Iâ-so͘ kóng，"Kiû tsiū hō͘ lín，tshē tsiū tú-tio̍h，phah-mn̂g tsiū kā lín khui. "Ia̍h koh kóng，"Lín ài lâng khuán-thāi lín tsáiⁿ-iūⁿ，ia̍h tio̍h án-ni khuán-thāi lâng. "

思羅安台語點字網站