《耶穌言行錄》

| | | 轉寄

Tē-35-tsiuⁿ,Iû-guân suaⁿ-tíng kóng

作者 Ko Kim-sing. 2008.12.07

（Má-thài 7：13-28）.
Iâ-so͘ só͘ kóng ê tō-lí，lâi kué-bîng Siōng-tè ê kài-lu̍t，Ta̍k lâng ê liông-sim uē o-ló sī ki̍k hó ê kà-sī；nā-sī ta̍k lâng pún ê sim-sìng luán-jio̍k，ǹg sè-kan，thiàⁿ ka-kī，tsiū oh-tit kiâⁿ kàu ha̍p Siōng-tè ê ì-sù；só͘-í Iâ-so͘ īng ue̍h kap khuah ê mn̂g-lō͘ tsuè phì-jū，kiò lán tshíⁿ-gō͘，tsiū-sī kóng，" Ìng-kai tuì ue̍h-mn̂g ji̍p；in-uī thâu kàu tîm-lûn ê mn̂g khuah-khuah，lō͘ khuàⁿ-khǹg，tsuē-tsuē lâng ji̍p tī hia；thàu kàu ua̍h，mn̂g ue̍h，lō͘ suè-tiâu，tsió-tsió lâng tshē ū tio̍h. "Tsit ê tāi-tsì hō͘ lán tsai lâng tîm-lûn sī put-tsí khuài ê tāi-tsì，nā-sái thàn ka-kī ê pún-sìng nā-tiāⁿ；só͘-í phì-jū tsìng-lâng só͘ ài kiâⁿ sī khuah-tuā ê lō͘.To̍k-to̍k tit-tio̍h kiù sī put-tsí oh，tsiū-sī pún-sìng tio̍h uāⁿ sin lâi ǹg Siōng-tè，tio̍h pàng-sak ka-kī ê ì-sù，huán-hué kué-pìⁿ tsim-tsiok thàn tō-lí；só͘-í phì-jū mn̂g sī ue̍h，lō͘ sī suè-tiâu，ji̍p-khì kiâⁿ ê lâng tsio；tsiū-sī lâng nā bô sìn-khò Kiù-tsú，siū Sìng Sîn ê kám-huà，tsiū lóng buē kiâⁿ íng-uán-ua̍h ê lō͘.
Iâ-so͘ m̄-ài lán tshò-gō͘ kiâⁿ m̄-tio̍h lō͘ sit-lo̍h lîng-hûn，tsiū kah lán tio̍h tî-hông ká ê sian-siⁿ.In kiám-tshái guā-phê put-tsí hó tshin-tshiūⁿ iûⁿ，ia̍h kóng hó-thiaⁿ ê uē，iáu-kú sim-lāi tshin-tshiuⁿ tshâi-lông，m̄-thang hō͘ i bê-hi̍k.Ài tsai sian-siⁿ tsin á-sī ké，tio̍h khuàⁿ in ê phín-hing sī hó á-ssi7 pháiⁿ；ia̍h tio̍h khuàⁿ in ê kà-sī sī ín-tshuā lâng kiâⁿ hó ho̍k-sāi Siōng-tè lī-ik lâng á-bô.Iâ-so͘ kóng，"Hó tshiū kiat hó ké-tsí，pháiⁿ ê tshiū kiat pháiⁿ ê ké-tsí，khuàⁿ ké-tsí tsiū uē bat tshiū. "

Lán ia̍h tio̍h síng-tshat ka-kī ê sim-sìng，phín-hīng；m̄-thang phiàn ka-kī，phah-sǹg guā-phê pài Siōng-tè sī kàu-gia̍h.Iâ-so͘ kóng，"Lâng tshing-ho͘ guá kóng，"Tsú ah，"bô lóng-tsóng uē ji̍p thian-kok；to̍k-to̍k thàn guá Thiⁿ-pē ê tsí-ì ê lâng uē ji̍p. "Kàu sím-phuàⁿ ê ji̍t，Iâ-so͘ uē kā m̄ sín-thàn ê lâng kóng，"Tsuè m̄-hó ê lâng，guá m̄-bat lín；tio̍h lī-khui guá，tsuè lín khì. "

Iâ-so͘ gī-lūn tō-lí put-tsí siông-sè，tsiū īng khí tshù tsuè phì-jū，kiat-bé tsiū-sī kóng，"Thiaⁿ guá ê uē lâi kiâⁿ i ê lâng，phì-jū tshin-tshiūⁿ ū tì-sik ê lâng khí tshù tī tsio̍h-puâⁿ tíng；hō͘ lo̍h，tsuí lâu，hong tshe tōng-tio̍h tshù ia̍h buē tó，in-uī tuē-ki hē tī tsio̍h-puâⁿ tíng.Thiaⁿ guá ê uē tsiū m̄ kiâⁿ i ê lâng，phì-jū tshin-tshiūⁿ gōng-lâng khí tshù tī thô͘-sua tíng，hō͘ lo̍h，tsuí lâu，hong tshe tōng-tio̍h tshù，liâm-puⁿ tsiū tó，hit ê tó sī siong-tiōng. "

Sìng-tsheh pa̍t só͘-tsāi tshing-ho͘ Iâ-so͘ cgue3 tsio̍h-puâⁿ，koh kóng，Iâ-so͘ í-guā bô miâ thang uá-khò tit-tio̍h kiù；só͘-í lán tio̍h sìn，uá-khò Kiù-tsú Iâ-so͘，tsiah uē tshin-tshiūⁿ tì-sik ê lâng，khí kian-kò͘ ê tshù，kàu sím-phuàⁿ ê ji̍t ia̍h m̄-sái kiàn-siàu.Taⁿ tuì tah-lo̍h uē tsai sī sîng-si̍t uá-khò Kiù-tsú á bô？tsiū-sī tio̍h síng-tshat ka-kī，khuàⁿ ū sîng-si̍t hâng-ho̍k Iâ-so͘，thàn I ê kà-sī á bô.Nā bô thàn Kiù-tsú，khì uá-khò pa̍t-mi̍h，tsiū-sī tshin-tshiūⁿ gōng ê lâng khí tshù tī sua-nih，lō͘-bé tsiū kiàn-siàu.

思羅安台語點字網站