《耶穌言行錄》

| | | 轉寄

Tē-38-tsiuⁿ,Thiaⁿ tō-lí ê kuan-hē

作者 Ko Kim-sing. 2008.12.28

(Má-thai 11:20-28；Lō͘-ka 10:10-22)
Iâ-so͘ tī Ko-lia̍p-sìn，Pik-sài-tāi，Ka-pik-lông ta̍uh-ta̍uh kóng tō-lí，kiâⁿ sîn-jiah；kàu bé lâng bô huán-hué，Iâ-so͘ tsiū tsik-pī kóng in ū tsai-ē，ia̍h sím-phuàⁿ ê ji̍t in ê hîng-hua̍t pí Tshui-lô Se-tùn，Só͘-to-má tng koh-khah buē khí.

Lán khuàⁿ Iâ-so͘ tsik-pī tsí kuí-nā ê siâⁿ，ū thang tsuè lán ê kàm-kài，tsiū-sī lán ū ki-huē thang thiaⁿ tō-lí，ia̍h ū Sìng-tsheh thang láng-kiù，làu-gia̍h thang tsai Iâ-so͘ tsin-tsiàⁿ sī Kiù-tsú；lán nā lia̍h tsit ê tāi-tsì tsuè bô iàu-kín，lán ê kuan-hē pí tsuē-tsuē bē siū tō-lí ê lâng khah tuā；tshin-tshiūⁿ Iâ-so͘ ū kóng，"Huān-nā tsuē-tsuē hō͘ i，tik-khak tuì i thó tsuē-tsuē. "

Iâ-so͘ ū siat-li̍p tshit-tsa̍p lâng，hō͘ in khì thuân tō-lí；hia ê lang5to2-lâi，sin put-tsí juaⁿ-hí hê-hok Iâ-so͘，kóng，"Tsú ah，uá-khò lí ê miâ，kuí ia̍h hâng-ho̍k guán. "Iâ-so͘ kóng，"Bo̍h-tit in-uī án-ni lâi huaⁿ-hí，tio̍h lia̍h lín ê miâ lì tī thiⁿ-nih tsuè huaⁿ-hí. "Iâ-so͘ án-ni kà-sī，hō͘ lán tsai tē-it thang huaⁿ-hí ê tāi-tsì，tsiū-sī hō͘ Siōng-tè kì lán ê miâ tī ua̍h-miā ê tsheh.

Hit-sî Iâ-so͘ sim-lāi huaⁿ-hí kóng，"Pē ah，thiⁿ-tuē ê Tsú，guá o-ló Lí；in-uī Lí tsiong tsit ê tō-lí tuì ū tì-huī，ū tsâi-lîng ê lâng khǹg-ba̍t；nā-sī tuì suè-kiáⁿ tsiū hián-bîng；si̍t-tsāi ah，Pē lí hó ê ì-sù tsin-tsiàⁿ án-ni. "Tsit só͘-tsāi só͘ kì-tsài sī lán ê Tsú Iâ-so͘ siūⁿ kàu Siōng-tè tsàiu ka-kī hó ê ì-sù khuán-thāi lâng，lâi thuè siū-un ê lâng tshíⁿ-gō͘，m̄-thang uá-khò ka-kī ê tì-sik；tio̍h khiam-pi tsin-tshiūⁿ suè-hàn ê gín-ná，tsiah thang ǹg-bāng Siōng-tè ê un-tián，tshin-tshiuⁿ Si-phian kóng，"Un-jiû ê lâng tik-khak īng gī tshuā i，īng tō-lí kà-sī i. "

思羅安台語點字網站