《耶穌言行錄》

| | | 轉寄

Tē-40-tsiuⁿ,Pháiⁿ ê hū-jîn-lâng siū sià-bián

作者 Ko Kim-sing. 2009.01.11

(Lō͘-ka 7:36-50)
Ū tsi̍t ê Huat-lī-sài lâng miâ Se-bûn，tshiáⁿ Iâ-so͘ kap i saⁿ- kap tsia̍h.Iâ-so͘ tsiū ji̍p i ê tshù tsē-toh.Siâⁿ-lāi ū tsi̍t ê hū-jîn-lâng pîng-sò͘ sī huān-tsuē ê lâng，i tsai Iâ-so͘ tsē toh tī Huat-lī-sài lâng ê tshù，tsiū tsiong tsi̍t gi̍k-kuàn ê hiuⁿ-iû tuà lâi，khiā tī Iâ-so͘ ê ka-tsiah-āu，the thî-khàu lâu ba̍k-sái tih-tâm Iâ-so͘ ê kha，īng thâu-mn̂g lâi tshit，koh tsim I ê kha，īng hiuⁿ-iû lâi buah.

Hit sî Iû-thài lâng tsē toh ê khuán-sit sī puàⁿ-tshiâ-gua̍t，kha khiau tī āu-bīn；só͘-í lâng tī āu-bīn uē-tit uá i ê kha.

Só͘ tshiáⁿ Iâ-so͘ ê Huat-lī-sài lâng khuàⁿ-kìⁿ tsit ê tāi-tsì，sim-lāi siūⁿ kóng，"Tsit ê lâng nā-sī sian-ti lâng tik-khak uē tsai bong I ê hū-jîn-lâng sī tsī-tsuī，ia̍h sī sím-mi̍h hō ê lâng，in-uī i pîng-só͘ sī huān-tsuē ê lâng. "Iâ-so͘ tsiū kā hit ê Huat-lī-sài lâng kóng，"Se-bûn ah，guá ū tsi̍t kù uē ài kā lí kóng.”Ìn kóng，"Tshiáⁿ Sian-siⁿ kóng.”Iâ-so͘ tsiū kóng，"Ū tsi̍t ê tsè-tsú，nn̄g lâng khiàm i gûn，tsi̍t lâng khiàm sì gō͘-tsa̍p niú，tsi̍t lâng gō͘ niú；nn̄g lâng lóng bô gûn thang hîng，gûn-tsú tsiū tsuè tsi̍t-ē sià-bián in ê tsè；taⁿ tshiáⁿ lí kóng tsí nn̄g lâng tah-lo̍h tsi̍t ê khah thiàⁿ tsè-tsú？"Se-bûn ìn kóng，"Guá phah-sǹg bô tshò. "Iâ-so͘ ua̍t thâu tsí hit ê hū-jîn-lâng kóng，"Guá ji̍p lí ê tshù，lí lóng bô īng tsuí hō͘ guá sué kha，nā-sī tsit ê hū-jîn-lâng īng ba̍k-sái lâi sué guá ê kha，īng thâu-mn̂g lâi tshit；lí lóng bô kā guá tsim-tshuì，nā-sī nā-sī tsit ê hū-jîn-lâng tuì guá ji̍p-lâi ê sî，tsim guá ê kha bô suah；lí lóng bô īng iû lâi buah guá ê thâu-khak，nā-sī tsit ê hū-jîn-lâng īng hiuⁿ-iû lâi buah guá ê kha.Só͘-í guá kā lí kóng，i ê tsuē-kuà tsuē-tsuē sià-bián，in-uī i put-tsí thiàⁿ guá，lâng nā tit-tio̍h sió-khuá ê sià-bián，i ê thiàⁿ-thàng ia̍h sī sió-khuá. "

Tsit ê hū-jîn-lâng tit-tio̍h tuā ê sià-bián，só͘-í i ê thiàⁿ-thàng ia̍h tuā.Iâ-so͘ tsiū tuì hū-jîn-lâng kóng，"Lí ê tsuē sià-bián lah. " Tâng tsē toh ê lâng saⁿ-kap gī-lūn kóng，"Tsit ê sū sím-mi̍h lâng uē sià-bián tsuē？"Iâ-so͘ koh kā hit ê hū-jîn-lâng kóng，"Lí ū sìn，tsiah ū tit-tio̍h kiù；taⁿ thang pîng-an tò-khì. "

Lán khuàⁿ tsit ê hū-jîn-lâng pí tshiáⁿ Iâ-so͘ ê Se-bûn kap tâng tsē toh ê lâng khah-iâⁿ，in-uī i uē tsai ka-kī ê m̄-tio̍h，ia̍h ū tshim-tshim huán-hué；koh tsai Iâ-so͘ uē sià-bián tsuē，só͘-í īng khiam-sùn ê sim lâi tsiū-kūn I.Koh i ，thiàⁿ Tsú ê sim ia̍h khah-iâⁿ tī Se-bûn，in-uī Se-bûn sui-bóng tshiáⁿ Iâ-so͘，nā-sī hū-jîn-lâng si̍t-tsāi ū hián-bîng i ê tsīn-sim.In-uī m̄ tān-nā tsuè tshin-tshiūⁿ lô͘-po̍k lâi sué Iâ-so͘ ê kha，ia̍h koh tshin-tshiūⁿ tsim I，īng put-tsí kuì ê hiuⁿ-ko buah I；tsiok-kiàn i ê thiàⁿ-Tsú，m̄-sī Se-bûn só͘ uē pí-phīng tit.I kì-jiân ū hián-bîng sîng-si̍t thiàⁿ Tsú ê pîn-kù，tsiū tit-tio̍h Tsú ê o-ló pí tsìng-lâng ia̍h khah tuā，tshin-tshiūⁿ tsit só͘-tsāi Tsú tsí-ū tuì i tsi̍t lâng kóng，"Lí ê sìn kiù lí，an-jiân tò-khì. "

Tsit tsiuⁿ só͘ kì-tsài ê tāi-tsì sī kà-sī lán kuí-hnag7 ê tō-lí.tsi̍t hāng，put-tsí tāng tsuē ê lâng m̄-sái sit-tsì，Iâ-so͘ uē kiù i.Koh tsi̍t hāng，ài Iâ-so͘ kiù lán，tio̍h tsai ka-kī ê tsuē，tshim-tshim huán-hué lâi uá-khò Iâ-so͘.Iū tsi̍t hāng，lán kì-jiân hō͘ Iâ-so͘ kiù，tio̍h hián-bîng kám-un ê sim put-tsí thiàⁿ Iâ-so͘.

思羅安台語點字網站