《耶穌言行錄》

| | | 轉寄

Tē-41-tsiuⁿ,Huat-lī-sài lâng huí-pòng Iâ-so͘ uá-khò kuí-ông

作者 Ko Kim-sing. 2009.01.18

(Má-thài 12:22-45;Lō͘-ka 11:14-26).
Ia-so͘ tī sè-kan ê sî，kiâⁿ tsuē-tsuē sîn-jiah，i-piⁿ，kuáⁿ-kuí，páiu-bîng I sī Siōng-tè ê Kiáⁿ.Huat-lī-sài lâng sui-jiân khuàⁿ-kìⁿ，kò͘-ì m̄-sìn，huí-pòng Iâ-so͘ kóng，"I sī uá-khò kuí-ông，tsiah kuáⁿ-kuí. "Iâ-so͘ īng put-tsí tāng ê uē kíng-kài，koh mn̄g，"Siat-sú Sat-tàn kuáⁿ Sat-tàn，tsiū-sī ka-kī saⁿ uan-ke，i ê kok thái-thó khiā uē tiâu？"Iâ-so͘ koh siat phì-jū kóng，"Siâ-sîn lī-khui lâng，kiâⁿ-iû khòng-hān ê tuē，tshē an-hioh ê só͘-tsāi，buē tit-tio̍h，kóng，"guá beh tò-khì só͘ tshut-lâi ê tshù；kàu，tsiū khuàⁿ-kìⁿ í-king piàⁿ-sàu tsuê-tsíng；suî-sî khì koh tshuā tshit ê sîn pí ka-kī khah pháiⁿ，ji̍p-lâi khiā-khí；hit ê lâng lō͘-bé huān-tio̍h，pí tāi-sing koh-khah tshám. "Iâ-so͘ koh kóng，"Tsit ê pháiⁿ sè-tāi ia̍h tshin-tshiūⁿ án-ni. "

Iû-thài lâng kú-kú hō͘ Mô͘-kuí tī-lí，kàu Iâ-so͘ lâi kóng tō-lí，kiâⁿ sîn-jiah，khǹg in tio̍h huán-hué；hit-sî Mô͘-kuí sit-lo̍h kuân，phì-jū tshin-tshiūⁿ hit ê siâ-kuí lī-khui lâng ê sing-khu.Iû-thài tso̍k nā thàn ki-huē huán-hué tsuē，sîng-siū Iâ-so͘ ê kà-sī，sîng-si̍t jīn I cgue3 Kiù-tsú，tsiū tit-tio̍h ki̍k tuā ê hok-khì；khó-sioh m̄ tsiap-la̍p I，huán-tńg kū-tsua̍t I，tsiū lō͘-bé tshám kàu-ki̍k.Lâng nā sîng-si̍t tsiap-la̍p Iâ-so͘ tsiū bô koh hō͘ Mô͘-kuí tī-lí；nā m̄-khíng tsiap-la̍p，Mô͘-kuí uē koh-tsài lâi pé-pa̍k hit ê lâng koh-khah tiâu.

Lán tha̍k tsit ê phì-jū ìng-kai tio̍h tsai ka-kī pún ia̍h sī án-ni hō͘ Mô͘-kuí kuán-hat；nā bô tit-tio̍h Iâ-so͘ tsín-kiù，tsiū buē thuat-lī tī i ê tshiú.Ū tsuē-tsuē lâng bat thiaⁿ Iâ-so͘ ê hok-im，bîng-bîng tsai tio̍h tsáiⁿ-iūⁿ tsuè，koh ài tsuè，to̍k-to̍k sū uá-khò ka-kī ê khuì-la̍t，bô uá-khò Iâ-so͘，sui-jiân ū iok-sok ka-kī bián-lē kiâⁿ hó，ia̍h buē kú-tn̂g.Tsit hō lâng tsin-tsiàⁿ tshin-tshiūⁿ phì-jū só͘ kóng：Mô͘-kuí sui-bóng tsiām-sî lī-khui，sim bē bat uāⁿ-sin，Mô͘-kuí uē koh-tsài kàu，in-uī tsai lâng nā bô uá-khò Iâ-so͘ buē iâⁿ i.

Lán tio̍h pik-tshiat kiû Sìng Sîn tiàm tī lán ê sim，tsiū bián-tit hō͘ Mô͘-kuí bê-hi̍k，hām-lo̍h tsuē.

思羅安台語點字網站