《耶穌言行錄》

| | | 轉寄

Tē-50-tsiuⁿ,Iok-hān tshe ha̍k-sing，Hi-lu̍t thâi Iok-hān

作者 Ko Kim-sing. 2009.03.22

(Má-thài 11:2-6，14:1-12; Má-khó 6:14-29;Lō͘-ka 7:18-23).
Iâ-so͘ kóng tō-lí ê sî，Iok-hān iáu tī kaⁿ nih.Tuì i kuaiⁿ-kaⁿ liáu-āu bē bat khuàⁿ-kìⁿ Iâ-so͘，put-kò ū thiaⁿ-kìⁿ I kóng tō-lí，kiâⁿ sîn-jiah ê tāi-tsì;tsiū tshe nn̄g ê ha̍k-sing khì mn̄g Iâ-so͘，I si̍t-tsāi sī Ki-tok á m̄-sī.Iok-hān í-king ū bîng-bîng ê pîn-kù kuat-tuàn kan-tsìng Iâ-so͘ sī Ki-tok，taⁿ siáⁿ-sū koh-tsài mn̄g tsit ê tāi-tsì？"Ū lâng phah-sǹg Iok-hān iàu-kín ê ì-sù beh kà-sī ha̍k-sing.Khah bîng-pi̍k ê ha̍k-sing í-king siū i ê kan-tsìng khì tè Iâ-so͘;nā-sī iáu ū ha̍k-sing buē bîng-pi̍k，Iok-hān īng tsit hō ê huat-tō͘ hō͘ in bîng Iâ-so͘ ê tāi-tsì.Kiám-tshái Iok-hān lio̍h-lio̍h-á ū tsit hō ì-sù，iáu-kú tsiàu lán khuàⁿ，Iâ-so͘ só͘ ìn ê uē m̄-nā tsí ha̍k-sing，ia̍h sī tsí Iok-hān pún-sin.Ū lâng phah-sǹg Iok-hān tú-tio̍h kan-khó͘，sim-kuaⁿ khuà-lū siūⁿ kè-thâu，i ê sìn tsiām-sî jia-pè，só͘-í tshe lâng khì mn̄g Iâ-so͘ tsit ê tāi-tsì，sī ài tit-tio̍h ka-kī ê sim koh-tsài bîng-pi̍k.Kiám-tshái tāi-tsì sī án-ni，iáu-kú khah tuā-puàⁿ káⁿ m̄-sī.Koh ū lâng phah-sǹg Iok-hān ka-kī lóng bô gî-ngái Iâ-so͘ sī Ki-tok，to̍k-to̍k sī tiû-tû Iâ-so͘ ê só͘ kiâⁿ;m̄-tsai in-uī siáⁿ-sū iân-tshiân kàu tsiah kú，bô liâm-piⁿ kā tsìng-lâng kóng I sī Ki-tok.Iok-hān phah-sǹg Iâ-so͘ tsū-khiam siūⁿ kè-thâu，ài pik I tio̍h khah kín hō͘ tsìng-lâng tsai I sī Ki-tok.Nā-sī án-ni，Iok-hān ê ì-sù sui-jiân ū thàiⁿ Iâ-so͘，ài lâng jīn I tsuè Kiù-tsú，iáu-kú ū ，tsham hit ê tshiàm-kuân ê m̄-tio̍h.Tshin-tshiūⁿ Iâ-so͘ ê lāu-bú，tī Ka-ná ê siann5ai3 Iâ-so͘ háin-bîng I ê tuā kuân-lîng；án-ni Iâ-so͘ só͘ ìn Iok-hān ê uē lō͘-bé kù kàⁿ ū lio̍h-hio̍h-á pau-hâm tsik-pī ê ì-sù.Iâ-so͘ kā Iok-hān ê ha̍k-sing kóng，"Lín tio̍h tsiong só͘ khuàⁿ-kìⁿ，só͘ thiaⁿ-kìⁿ ê，khì kā Iok-hān kóng，Tshiⁿ-mî ê khuàⁿ-kìⁿ，pái-kha ê uē kiâⁿ，thái-ko-ê uē tshing-khì，sí ê uē koh-ua̍h，sòng-hiong ê uē thiaⁿ hok-im ê tō-lí;huān-nā bô khì-hiâm guá ê ū hok-khì. "Iok-hān ê ha̍k-sing tò-khì liáu，Iâ-so͘ tsiū thê-khí Iok-hān ê tāi-tsì，tuā o-ló í kóng.Sī Siōng-tè só͘ tshe ê lâng，koh tsik-pī Huat-lī-sài kap tha̍k-tsheh lâng，in-uī m̄-sìn Iok-hān só͘ kóng ê tō-lí.

Bô juā-kú tú-tio̍h Hi-lu̍t ông siⁿ-ji̍t，siat iân tshiáⁿ lóng-tsóng ê kuaⁿ kap tsun-kuì ê lâng.

Hi-lu̍t ê hū-jîn-lâng miâ kiò Hi-lô-tí，ū tsi̍t ê tsa-bó͘-kiáⁿ，jip8lai5 thiàu-bú hō͘ lâng khuàⁿ.Hit sî ，Hi-lu̍t ông tsin huaⁿ-hí，kiò tsa-bó͘-kiáⁿ lâi，beh siúⁿ i，kóng，"Huān lí só͘ kiû，guá hō͘ lí，"koh tsiù-tsuā kóng，"Guá tio̍h tsáiⁿ-iūⁿ kiû？"Hi-lô-tí tsá luān-lûn kè i ê peh，āu-lâi pàng-sak tiōng-hu kè sió-tsik，hō͘ Iok-hān tsik-pī.Hi-lô-tí tsiū put-tsí uàn-hūn Iok-hān，ài hō͘ i sí;taⁿ thiaⁿ-kìⁿ i ê tsa-bó͘-kiáⁿ só͘ kóng ê uē，tsiū sīng ki-huē，kah i tuì Hi-lu̍t kóng，"Kiû Iok-hān ê thâu. "Tsa-bó͘-kiáⁿ thaiⁿ-kìⁿ lāu-bú ê uē lóng bô kiaⁿ，huán-tńg huaⁿ-hí，án-ni thang tsai sī o̍h i lāu-bú ê khuán-sit.Tsa-bó͘-kiáⁿ kín-kín khì kā ông kóng，"Guá ài kiâⁿ sué-lé Iok-hān ê thâu-khak，puâⁿ-tíng tsik-sî siúⁿ-sù.
"Ông huân-ló，nā-sī í-king tsiù-tsuā，koh in-uī tâng toh ê lâng tī-teh，tsiah huan-hù hō͘ i，tshe lâng khì kaⁿ Iok-hān tsám-siú，hē thâu-khak tī puâⁿ nih，lâi hō͘ tsa-bó͘ gín-á liâm-piⁿ hō͘ lāu-bú.

Iok-hān ê ha̍k-sing kàu，siu sin-si tsong i，tsiū khì kā Iâ-so͘ kóng.

Hi-lu̍t tsuè tsit ê tāi-tsì liáu-āu，sim lóng buē pîng-an；thiaⁿ-kìⁿ Iâ-so͘ kiâⁿ tsuē-tsuē sîn-jiah tsiū kóng，"Tse sī kiâⁿ sué-lé Iok-hān sí lâi koh-ua̍h，tsiah ū kiâⁿ koh-iūⁿ ê kuân-lîng. "
Tshin-tshiūⁿ Sìng-tsheh só kóng，"Kiâⁿ pháiⁿ ê lâng sui-bóng bô lâng ji̍p，ia̍h ka-kī the tsáu. "

Tuì tsit ê tāi-tsì lán tio̍h tsai khǹg uàn-hūn lâng ê sim，sī hō͘ Mô͘-kuí ū phāng thang bê-hi̍k;hit hō lâng ná huān-tsuē ná siong-tiōng，só͘-í Sìng-tsheh kóng，"Uàn-hūn hiaⁿ-tī ê lâng，tsuē kap thâi lâng pîⁿ-pîⁿ. "

思羅安台語點字網站