《耶穌言行錄》

| | | 轉寄

Tē-51-tsiuⁿ,Iâ-so͘ tī Khòng-iá tshī tsìng-lâng

作者 Ko Kim-sing. 2009.03.29

（Má-thài 14：13-21；Má-khó 6：30-44； Lō͘-ka 9：10-17；Iok-hān 6：1-13）
Iâ-so͘ thiaⁿ-kìⁿ Iok-hān siū hām-hāi，tsiū lī-khui hia tsiūⁿ tsûn khì khòng-iá；tsuē-tsuē lâng tsai，tsiū kiâⁿ lō͘ tè I.Beh thiaⁿ I kóng tō-lí，ài khuàⁿ I só͘ tsuè. Ji̍t beh àm，ha̍k-sing tsiū-kūn Iâ-so͘ kóng，" Tsia sī khòng-iá，sî í-king uàⁿ lah，tsiáⁿ sì-suàⁿ tsìng-lâng，hō͘ in khì hiuⁿ-siā bué tsia̍h.
" Iâ-so͘ kóng，"M̄-sái tsìng-lâng khì；lím thang hō͘ in tsia̍h. " Ha̍k-sing kóng，"Guán tī tsia bô só͘ ū；to̍k-to̍k ū gō͘ ê piáⁿ，nn̄g bé hî nā-tiāⁿ.
"Iâ-so͘ kóng，"The̍h lâi hō͘ guá. "Liâm-piⁿ huan-hù tsìng-lâng tsē tī tsháu-po͘，the̍h gō͘ ê piáⁿ，nn̄g bé hî，kia̍h-thâu ǹg thiⁿ tsiok-siā peh-phuà；tsiong piáⁿ hō͘ ha̍k-sing，ha̍k-sing hō͘ tsìng-lâng.Tsìng-lâng tsia̍h kàu pá，Iâ-so͘ tsiū tuì ha̍k-sing kóng，"Khioh hiah ê tsia̍h tshun ê seh，m̄-thang phah-sńg. "Ha̍k-sing thàn Iâ-so͘ ê uē，khioh tsa̍p-jī khing muá-muá.

Koh bô luā-kú，Iâ-so͘ koh the̍h kuí-nā ê piáⁿ，tām-po̍h suè-bé hî hō͘ sì-tshing lâng tsia̍h kàu pá，tsia̍h-liáu，tshun ū tshit nâ muá-muá.

Tsá-Í-lī-a hō͘ tsi̍t ê tsiú-kuáⁿ hū-jîn-lâng ê khì-kū lāi ê mī-hún buē kián，pân-lāi ê iû buē ta，kàu khòng-hān kè tsiah suah. Koh Í-lī-sa bat īng tām-po̍h piáⁿ-liāu kiong-kip tsīt pah lâng tsia̍h kàu ū tshun. Khuàⁿ-kìⁿ tsit nn̄g hāng ê tāi-tsì tsha-put-to saⁿ tshin-tshiūⁿ，tsóng-sī lāi-tiong tuā-tuā bô saⁿ-tâng. Í-lī-a kap Í-lī-sa só͘ kiâⁿ m̄-sī uá-khò sa-kī ê khuì-la̍t，tsiū-sī uá-khò Siōng-tè tsiah uē án-ni. Iâ-so͘ kiâⁿ ta̍k hāng ê sîn-jiah lóng sī īng ka-kī ê kuân-lîng，in-uī I sī Siōng-tè.

Iâ-so͘ khuàⁿ-kìⁿ lâng iau-go͘ tsiū lîn-bín，tse sī hián-bîng I ê tuā tsû-sim，tsiū-sī īng I pún-sin lâi iúⁿ-tshī lâng ê sim-sîn，tshin-tshiūⁿ I at kóng，"Guá tsiū-sī ua̍h-miā ê piáⁿ. "

Sè-kan ê mi̍h thang tsiām-sî iúⁿ-tshī sing-khu nā-tiāⁿ，Ki-tok uē hō͘ lán ê lîng-hûn íng-uán buē sí. Lâng sui-bóng ū mi̍h，m̄-tsia̍h uē sí；lâng ū Iâ-so͘ thang uá-khò，nā m̄-khíng tsiū-kūn，ia̍h tik-khak tîm-lûn.

思羅安台語點字網站