《耶穌言行錄》

| | | 轉寄

Tē-55-tsiuⁿ,Pí-tik jīn Iâ-so͘ Tsuè Siōng-tè ê Kiáⁿ

作者 Ko Kim-sing. 2009.04.26

（Má-thài 16：13-20；Má-khó 8：27-30； Lō͘-ka 9：18-22）
Iâ-so͘ kàu Kai-sat-lī-a Hui-li̍p-pí ê só͘-tsāi，ū tsi̍t ji̍t kap ha̍k-sing the kóng-uē，mn̄g in kóng，"Lâng kóng guá sī tsī-tsuī？"Hāk-sing in kóng，"Ū lâng kóng lí sī kiâⁿ sué-lé Iok-hān；ū lâng kóng lí sī Í-lī-a；ū lâng kóng sī Iâ-lī-bí，á-sī sian-ti ê tsi̍t-ê tsi̍t-ê. "Iâ-so͘ kóng，"Lín kóng guá sī tsī-tsuī？"Se-bûn Pí-tik in kóng，"Lí sī íng-ua̍h Siōng-tè ê Kiáⁿ Ki-tok. "

Iâ-so͘ kóng，"Se-bûn Pa-iok-ná lí ū hok-khì，in-uī tsí-sī lí ê m̄-sī lâng，si7gua2 ê Thiⁿ-pē.Guá koh kā lí kóng，Lí sī Pí-tik；guá the-beh tī tsit ê tsio̍h-puâⁿ tíng khí guá ê kàu-huē，im-hú buē iâⁿ i. "

Iâ-so͘ kiò Se-bûn tsuè "Pa-iok-ná，"i-sù sī Iok-ná ê kiáⁿ.Se-bûn khí-thâu lâi tè Iâ-so͘，hit sî Iâ-so͘ tsiū līng-guā hō i ê miâ Ki-huat á-sī Pí-tik.Ki-huat sī Hi-pik-lâi ê im，Pí-tik sī Hi-lia̍p ê im，ì-sù saⁿ-tâng，tsiū-sī "Tsio̍h-thâu. "Iâ-so͘ hō͘ I tsit ê miâ sī tshin-tshiūⁿ tāi-sing kóng，i āu-lâi tī kàu-huē lāi kian-kò͘ ê khuán-sit. Pí-tik pún bô án-ni，kuí-nā pái hián-bîng khuài-khuài iô-tāng，nā-sī kàu lō͘-bé Iâ-so͘ ê un hō͘ I tsin kian-kò͘，ná tshin-tshiūⁿ tsio̍h-puâⁿ tsi̍t-puaⁿ-iūⁿ.Án-ni-siⁿ tsí nn̄g hāng ê ì-sù，sī tshin-tshiūⁿ kóng，"Iok-ná ê kiáⁿ Se- bûn ah，lí tit-tio̍h bat guá m̄-sī tuì ka-kī ê tì-huī，ia̍h m̄-sī tuì pa̍t-lâng ê kà-sī，sī tuì guá Thiⁿ-pē ê tsí-sī；tsit ê sī lí ê tuā hok-khì.Koh lí tú-á só͘ jīn guá ê tāi-tsì，kap lí miâ tsuè "tsio̍h"sio-ha̍p；guá ê kàu-huē ê uē-ki tsiū-sī tsit ê tsio̍h-puâⁿ，íng-íng buē tshia-tó huí-huāi. "

Iâ-so͘ kóng "Tsit ê tsio̍h-puâⁿ"hit kù，kiám-tshái sī tsí Pí-tik tú-á só͘ jin ê tō-lí，in-uī hit hāng ê tō-lí sī hok-im ê kun-pún；á kiám-tshái Iâ-so͘ the kóng-uē ê sî ū īng tshiú kí ka-kī；nā án-ni hit kù tsiū-sī tsí I pún-sin；tshin-tshiūⁿ Iâ-so͘ tsi̍t pái tī tiān-tn̂g the kóng tō-lí，tsiū kóng，"Lín huí-huāi tsit ê tiān，guá saⁿ-ji̍t koh khí. "Ū lâng khuàⁿ Iâ-so͘ hit pái kóng "Tsit ê tiān"lâi tsí I ka-kī，tsiū phah-sǹg tsit pái kóng "Tsit ê tsio̍h-puâⁿ"ia̍h tik-khak sī tsí I pún-sin.Tsí nn̄g hō ê kué-she iàu-kín ê ì-sù sī saⁿ-tâng.Iâ-so͘ īng"tsio̍h-puâⁿ"tsí ka-kī sī put-tsí ha̍p.Sìng-tsheh tsin-tsuē só͘-tsāi kiò Siōng-tè tsuè"tsio̍h-puâⁿ"，ia̍h kuí-nā só͘-tsāi thang pí-phīng tsuè tsio̍h，in-uī Iâ-so͘ hō͘ i lio̍h-á o̍h I pún-sin hit hō ê khuán-sit.Pa̍t ê sù-tô͘ ia̍h sī án-ni；tsóng-sī lâng lâi kóng Pí-tik tsuè tsio̍h-puàⁿ，hō͘ kàu-kuē khí tī ê tíng-bīn，sī ki̍k tuā tshò-gō͘.To̍k-to̍k Iâ-so͘ Ki-tok ū tsit hō ê kuân；kàu-huē uá-khò lâng tik-khak huí-huāi；kàu-huē uá-khò"Íng-ua̍h Siōng-tè ê Kiáⁿ Ki-tok"tsiah uē íng-uán tī-teh.

思羅安台語點字網站