《耶穌言行錄》

| | | 轉寄

Tē-62-tsiuⁿ,Bo̍k-tsiá

作者 Ko Kim-sing. 2009.06.14

（Iok-hān 10：1-18）
Huān-nā tsuè hó ê bo̍k-tsiá sī put-tsí suè-jī tsiàu-kò͘ iûⁿ.Kiám-tshái ū iûⁿ bê-lō͘ sit-lo̍h，kín-kín khì tshē，tshē-tio̍h tsiū put-tsí huaⁿ-hí pē i tò-lâi.Lán tsiū-sī tshin-tshiūⁿ iûⁿ sit-lo̍h，Iâ-so͘ tsiū-sī tshin-tshiūⁿ hó ê bo̍k-tsiá，tuì thiⁿ kàng-lo̍h tshē lán tò-tńg，lâi kiù lán.Sìng-tsheh kóng，"Jîn-tsú tiâu-tî lâi kiù hit hō í-king sit-lo̍h ê lâng. "

Hó ê bo̍k-tsiá bô iàu-kín ka-kī ê siⁿ-miā，sī tsiàu-kò͘ i ê iûⁿ.Tsāi-tsá Tāi-pi̍t siàu-liân ê sî，tī Pik-lī-hîng teh kò͘ i ê lāu-pē ê iûⁿ.Ū tsi̍t ji̍t，hut-jiân ū tsi̍t tsiah sai lâi beh kā iûⁿ khì；Tāi-pi̍t tsiū khì tui i，phah i sí，lâi kiù hit tsiah iûⁿ.Hîm lâi kā iûⁿ，Tāi-pi̍t ia̍h káⁿ phah hîm sí.

Iâ-so͘ kam-guān īng sìⁿ-miā khì kiù I ê iûⁿ；I in-uī sè-kan lâng ê tsuē，kam-guān ka-kī siū-sí lâi kiù lâng thuat-lī Mô͘-kuí ê tshiú，tshin-tshiūⁿ tshut sai ê tshuì.Sìng-tsheh kóng，"Mô͘-kuí sī tshin-tshiūⁿ háu ê sai，teh tshē khuàⁿ ū sim-mi̍h thang tsia̍h. "

Hó ê bo̍k-tsiá ta̍k tsá-khí tshuā iûⁿ khì tshē ū tsháu ê só͘-tsāi lâi tsia̍h，kíng tshing-tsuí ê só͘-tsāi hō͘ in lim.Iâ-so͘ iúⁿ-tshī I ê ha̍k-sing ê sim-sîn ia̍h sī án-ni.Tāi-pi̍t ū kóng，"Iâ-hô-hua sī guá ê bo̍k-tsiá，só͘-í guá bô khiàm-kheh，hō͘ guá tiàm tī phang-tsháu ê hue-hn̂g，tshuā guá kàu tshing-tsuí ê khue. "

Hó ê bo̍k-tsiá put-tsí suè-jī tsiàu-kò͘ iûⁿ-á-kiáⁿ，khuàⁿ i buē kiâⁿ，tsiū phō i.Iâ-so͘ ia̍h sī án-ni；I sī put-tsí thiàⁿ suè-kiáⁿ，tshin-tshiūⁿ I tuì ha̍k-sing kóng，"Iông-ún suè-kiáⁿ tsiū-kūn guá，bo̍h-tit kim i. "Í-sài-a kóng，"I tsiàu-kò͘ peh-sìⁿ tshin-tshiūⁿ iûⁿ，phō iûⁿ-á-kiáⁿ tī hing-tsîng. "

Bo̍k-tsiá ū-sî tī iûⁿ-kûn ê tiong-kan kíng kuí tsiah iûⁿ，kó͘-tsui ê，īng ài-sioh ê mâi lâi hō in，put-tsí suè-jī tsiàu-kò͘ in，kàu ta̍k ê jīn-tit ka-kī ê mâi，bo̍k-tsiá kiò i， i tsiū lâi；Iâ-so͘ tsiū īng tsit hō ê tāi-tsì phì-jū I put-tsí thiàⁿ-sioh I ê ha̍k-sing.Nā-sī Kiù-tsú tsuè lán ê bo̍k-tsiá，m̄-sī tī iûⁿ-kûn ê tiong-kan kíng kuí ê lâi pó-sioh，sī lóng-tsóng hō͘ I kíng，lóng-tsóng hō͘ I pó-sioh；I uē jīn-tit ta̍k ê miâ，ta̍k ê ia̍h uē jīn-tit I ê siaⁿ，ái tè I.

Lán ing-kai tio̍h kiû Siōng-tè hō͘ lán ji̍p I ê iûⁿ-kûn，tit-tio̍h Iâ-so͘ tsuè lán ê bo̍k-tsiá.Iâ-so͘ tuì I ê ha̍k-sing kóng，"Lin suè kûn iûⁿ m̄-sái kiaⁿ；in-uī lín ê Thiⁿ-pē teh-beh tsiong I ê kok siúⁿ-sù lín. "

思羅安台語點字網站