《耶穌言行錄》

| | | 轉寄

Tē-63-tsiuⁿ,Tio̍h thàiⁿ Siōng-tè，Koh thiàⁿ lâng

作者 Ko Kim-sing. 2009.06.21

（Lō͘-ka 10：25-37）
Ū tsi̍t ê kà lu̍t-huat ê sian-siⁿ lâi tshì Iâ-so͘ kóng，"Sian-siⁿ，guá ing-kai tio̍h tsáiⁿ-iūⁿ tsuè，tsiah uē tit-tio̍h íng-uán-ua̍h？"Iâ-so͘ ìn kóng，"Lu̍t-huat ê tsheh kì tsáiⁿ-iuⁿ？lí tha̍k sī tsáiⁿ-iūⁿ？"I ìn kóng，"Tio̍h tsīn-sim，tsīn-sìng，tsīn-la̍t，tsīn-ì thiàⁿ Tsú lí ê Siōng-tè；ia̍h tio̍h thiàⁿ lí ê tshù-piⁿ tshin-tshiūⁿ ka-kī. "Iâ-so͘ kā i kóng，"Lí só͘ ìn ê sī tio̍h；tsiàu án-ni kiâⁿ，tsiū uē ua̍h. "Hit ê lâng ài tshing-ho͘ ka-kī tsuè gī，mn̄g Iâ-so͘ kóng，"Sím-mi̍h lâng tsuè guá ê tshù-piⁿ？"Iâ-so͘ īng phì-jū lâi ìn，kóng，"Ū lâng tuì Iâ-lō͘-sat-líng lo̍h-khì Iâ-lī-ko，lō͘-nih tú-tio̍h tsha̍t，hō͘ in tshiúⁿ，koh hō͘ in phah kàu beh sí，in lō͘-bé hiat-ka̍k i，tsuè in khì.Khiok ū tsè-si tuì hit tiâu lō͘ king-kè，khuàⁿ-kìⁿ tsiū ti̍t-thàu kè-khì；koh ū Lī-bī lâng kàu hit só͘-tsāi，kiâⁿ-uá lâi khuàⁿ，ia̍h kìng-jiân tsuè i khì.Ū Sat-má-lī-a ê lâng kiâⁿ kàu hit só͘-tsāi，khuàⁿ-kìⁿ tsiū lîn-bín i；kūn-uá īng iû，īng tsiú lâi tò hit ê tio̍h-siong ê só͘-tsāi，pau-lau hó，tsiong ka-kī só͘ khiâ ê tsing-siⁿ hō͘ i khiâ，tshuā i kàu kheh-tiàm，tsiàu-kò͘ i；bîn-á-tsài tit-beh khí-sin，tsiū the̍h nn̄g tsîⁿ gûn hō͘ kheh-tiàm ê tsú-lâng，kā i kóng，Tio̍h tsiàu-kò͘ tsit ê lâng，só͘-huì nā khah ke，guá tò-tńg-lâi tsiū sǹg hîng lí.Taⁿ hō͘ lí phah-sǹg，tsí saⁿ lâng tah-lo̍h tsi̍t ê sī tsuè tú-tio̍h tsha̍t hit ê lâng ê tshù-piⁿ？Ìn kóng，Lîn-bín i ê lâng tsiū-sī.Iâ-so͘ kóng，Lí tio̍h khì án-ni o̍h lâi kiâⁿ. "

Iû-thài lâng kap Sat-má-lī-a ê lâng pún bô saⁿ óng-lâi.Iâ-so͘ tiâu-tî siat tsit ê phì-jū，sī hō͘ lán tsai，thiⁿ-ê ê lâng lóng sī tâng-phuāⁿ.Siat-sú khuàⁿ-kìⁿ sim-mi̍h lâng ū kan-khó͘，nā uē lī-ik，tsiū tio̍h lī-ik；kiám-tshái tio̍h īng ka-kī ê kang，á-sī tio̍h khai-huì pún-sin ê tsîⁿ，lóng tio̍h kam-guān.Sìng-tsheh kóng，"Ū ki-huē thang tuì tsìng-lâng kiâⁿ hó，tsiū tio̍h kiâⁿ. "

思羅安台語點字網站