《耶穌言行錄》

| | | 轉寄

Tē-65-tsiuⁿ,Tshiáⁿ lâng-kheh ê phì-jū

作者 Ko Kim-sing. 2009.07.05

（Lō͘-ka 14：16-24）
Ū tsi̍t ji̍t，Iâ-so͘ tī Huat-lī-sài lâng ê tshù，tsē toh ê sî，siat phì-jū kóng，"Ū lâng pān tuā iân-sia̍h，tshiáⁿ tsuē-tsuē lâng-kheh；kàu tsia̍h ê sî，tshe lô͘-po̍k khì kā só͘ tshiáⁿ ê lâng-kheh kóng，"Tio̍h lâi，pah hāng mi̍h piān lah.

"Tsìng-lâng tsuè tsi̍t-ê sî；tsi̍t lâng kóng，"Guá ū bué tshân，ing-kai tio̍h khì khuàⁿ，tshiáⁿ hō͘ guá sî. "Koh tsi̍t lâng kóng，"Guá ū bué gû gō͘ tsiah，tio̍h khì tshì-khuàⁿ，tshiáⁿ hō͘ guá sî.

"Koh tsi̍t lâng kóng，"Guá tú-á tshuā bó͘，tsiah buē tit-thang lâi. "Hit ê lô͘-po̍k tò-khì kā i ê tsú-lâng kóng，Tsú-lâng siū-khì，huan-hù lô͘-po̍k kóng，Tio̍h kín-kín khì siâⁿ-nih ê tuā-kue sió-hāng tshuā sòng-hiong，phuà-siùⁿ，pái-kha，tshiⁿ-mî ê lâng lâi.Lô͘-po̍k kóng，Tsú ah，tsiàu lí só͘ huan-hù，taⁿ í-king kiâⁿ，iáu-kú ū tshun uī.Tsú-lâng koh huan-hù lô͘-po̍k kóng，Tio̍h khì tuā-lō͘-tìng，lî-pa-piⁿ，nā ū lâng tio̍h bián-kióng i ji̍p-lâi，hō͘ guá ê tshù lâng-kheh muá-muá.Guá kā lín kóng，Tāi-sing só͘ tshiáⁿ ê lâng，buē tit-tio̍h tshì-tsia̍h guá ê iân-sia̍h. "

Tsú-lâng sī tsí Siōng-tè，lô͘-po̍k sī tsí thuân-tō ê lâng.Iân-sia̍h sui-bóng pī-pān put-tsí hong-sīng，nā-sī lâng-kheh iáu-kú m̄ hō͘ I tshiáⁿ；ì-sù sī kóng hok-im ê tō-lí tāi-sing thuân Iû-thài lâng，tsóng-sī in ngī-sim m̄ tsiap-la̍p，só͘-í tshe lô͘-po̍k thuân tī pa̍t kok.Tsit ê phì-jū sui-jiân pún sī tsí Iû-thài lâng，ia̍h uē tsí ta̍k tāi thiaⁿ tō-lí tsuē-tsuē lâng.Siông-siông ū lâng m̄ ài tsiap-la̍p tō-lí，ia̍h īng sè-tsîng ê tāi-tsì lâi the-thok，tì-kàu sit-lo̍h tit-tio̍h un-tián ê ki-huē.Lâng nā tsai tsuē，ū khiam-pi ê sim，hit hō lâng sui-bóng sòng-hiong，iáu-kú Siōng-tè huaⁿ-hí īng un-tián hō͘ i.Sìng-tsheh kóng，"Tshuì-ta ê lâng tio̍h kàu tsuí-piⁿ，bô gûn ê lâng ia̍h thang lâi bué tsiú，bué ni，bué só͘ tsia̍h ê mi̍h，m̄-sái kè-tsîⁿ. "Koh kóng，"Tshuì-ta ê lâng tio̍h lâi；ài tit-tio̍h ua̍h-miā ê tsuí，thang pe̍h-pe̍h tit-tio̍h. "

思羅安台語點字網站