《耶穌言行錄》

| | | 轉寄

Tē-66-tsiuⁿ,Sit-lo̍h koh tit-tio̍h ê phì-jū

作者 Ko Kim-sing. 2009.07.12

（Lō͘-ka 15 tsiuⁿ）
Tsìng thiu-hiòng kap kiâⁿ pháiⁿ ê tsiū-kūn Iâ-so͘.Huat-lī-sài lâng，tha̍k-tsheh lâng ki-tshì kóng，"Tsit lâng sī tsiap-la̍p pháiⁿ-lâng kap in tsia̍h. "Iâ-so͘ tsiū siat phì-jū kóng，"Lín tiong-kan sím-mi̍h lâng ū tsi̍t pah tsiah ê iûⁿ，sit-lo̍h tsi̍t tsiah，kiám bô pàng-sak káu-tsàp-káu tsiah tī suaⁿ-nih，khì tshê só͘ sit-lo̍h—ê kàu tio̍h？Tshē-tio̍h，huaⁿ-hí tsiū pē tī king-thâu tíng tò—lâi；kàu tshù，tsiū kiò pîng-iú kap tshù-piⁿ tsū-tsi̍p，kā in kóng，"Tio̍h kap guá huaⁿ-hí，guá só͘ sit-lo̍h ê iûⁿ í-king tshē tio̍h. "Guá kā lín kóng，"Tshin-tshiūⁿ án-ni，huān-tsuē ê lâng tsi̍t lâng huán-hué，tsiū thiⁿ-nih in-uī i ū huaⁿ-hí，khah huaⁿ-hí káu-tsa̍p-káu ê gī-lâng m̄-sái huán-hué—ê. "Á-sī hū-jîn lâng ū tsa̍p ê gûn-á，sit-lo̍h tsi̍t-ê，kiám bô tiám ting sàu tshù siông-sè tshē kàu tio̍h？Tshē-tio̍h tsiū kiò pîng-iú kap tshù-piⁿ tsū-tsi̍p，kā in kóng，"Tio̍h kap guá huaⁿ-hí，só͘ sit-lo̍h ê gûn-á í-king tshē-tiòh. "Guá kā lín kóng，Tshin-tshiūⁿ án-ni，huān-tsuē ê lâng tsi̍t lâng huán-hué，tsiū tī Siōng-tè，thiⁿ-sài ê bīn-tsîng ia̍h ū huaⁿ-hí. ""

Koh kóng，"Lâng ū nn̄g ê kiáⁿ；hit ê tē-jī kiáⁿ tuì lāu-pē kóng，"Pē ah，lí tsiong guá só͘ ing-kai tit ê ke-hé lâi pun hō͘ guá. "Lāu-pē tsiū kā in pun ke-hé.Bô luā kú tē-jī kiáⁿ siu-si̍p lóng-tsóng só͘ ū ê mi̍h，tshut-guā khì hn̄g-hn̄g ê só͘-tsāi，tī hia hòng-tōng，ke-hé lóng huí-huāi.Só͘ ū ê mi̍h í-king īng liáu-liáu，tú-tio̍h hit só͘-tsāi tuā ki-hng，tsiū tsai khiàm-kheh ê kan-khó͘；tsiah khì uá hit só͘-tsāi tsi̍t ê peh-sìⁿ，hit lâng tshe i khì suaⁿ-nih tshī ti；bô lâng hō͘ i tsia̍h，tsiū ài tsiong ti só͘ tsia̍h ê tāu-ngueh lâi tsí-ki；āu-lâi tshíⁿ-gō͘ tsiū ka-kī kóng，"Guá lāu-pē ū hiah tsuē ê tn̂g-kang，lóng-tsóng ū thang tsia̍h put-tsí kàu-gia̍h，ia̍h guá teh-beh gō-sí；taⁿ guá tio̍h khí-sin khì tshē guá ê lāu-pē，kā i kóng，Pē ah，guá tik-tsuē thiⁿ，ia̍h tik-tsuē lí，taⁿ liáu-āu guá buē kham-tit kiò tsuè lí ê kiáⁿ，tio̍h lia̍h guá tsuè tn̂g-kang khuán-thāi. "Tuì hit tia̍p tsiū khí-sin tò-khì tshē i ê lāu-pē；lī iáu-kú hn̄g，lāu-pē khuàⁿ-kìⁿ，khó-lîn，tsáu kūn tsîng phō i ê ām-kún tsim—i.Kiáⁿ tuì lāu-pē kóng，"Pē ah，guá tik-tsuē thiⁿ，ia̍h tik-tsuē lí，taⁿ liáu-āu buē kham-tit kiò tsuè lí ê kiáⁿ. "Lāu-pē tsiū huan-hù I ê lô͘-po̍k kóng，"Hit ê tē-it hó ê phàu hiahnn lâi kā i tshīng，tsiong tshiú-tsí hō͘ i kuà，uê tshīng i ê kha，ia̍h hit tsiah puî ê gû-á khan lâi thâi，lán lâi tsia̍h，lâi huaⁿ-hí；in-uī guá tsit ê kiáⁿ sí ū koh-ua̍h，sit-lo̍h ū koh tit-tio̍h.

"Tāi-ke tsiū teh huaⁿ-hí.Nā-sī hit ê tuā-kiáⁿ tī suaⁿ-nih，hit sî tò-lâi，lī tshù bô luā hn̄g，thiaⁿ-kìⁿ ga̍k-khì kap thiàu-bú ê siaⁿ，tsiū kiò tsi̍t ê lô͘-po̍k lâi，mn̄g i，tsit ê sī sím-mi̍h tāi-tsì？Ìn i kóng，"Lí ê sió-tī kàu lah；lí ê lāu-pē tit i pîng-an tò-lâi，tsiū lâi thâi hit tsiah puî ê gû-á. "Tuā-kiáⁿ siū-khì，m̄ ji̍p-khì；lāu-pē tsiū tshut-lâi khǹg i.Tuā-kiáⁿ tuì lāu-pē kóng，"Guá ho̍k-sāi lí tsiah tsuē nî，lóng m̄-bat uî-ke̍h lí ê bīng-līng，lí ia̍h lóng m̄-bat tsiong tsi̍t tsiah iûⁿ-á-kiáⁿ siúⁿ-sù guá，hō͘ guá thang kap pîng-iú lâi huaⁿ-hí；nā-sī lí tsit ê kiáⁿ kau-puê tshiong-ki phuà-huì lí ê ke-hé，tó—lâi，liâm-piⁿ thuè i thâi puî ê gû-á. "Lāu-pē in kóng，"Kiáⁿ ah，lí siông-siông kap guá tī-teh，guá só͘ ū—ê lóng sī lí ê；tsóng-sī lí tsit ê sió-tī sí koh-ua̍h，sit-lo̍h koh tit-tio̍h，lán ing-kai tio̍h huaⁿ-hí khuài-lo̍k. ""

Lán pún lī-khui Siōng-tè tsuè Mô͘-kuí ê lô͘-tsâi，sing-khu，lîng-hûn lóng buē pîng-an，ná tshin-tshiūⁿ tē-jī kiaⁿ.Nā-sī Siōng-tè iáu-kú tsún lán huán-hué lâi tsiū-kūn I，koh pâi-pí bān-hāng hok-khì hō͘ lán hióng-siū；án-ni thang tsai I si̍t-tsāi sī jîn-tsû ê Pē.Koh khuàⁿ Sìng-tsheh ū kì-tsài Siōng-tè ê uē kóng，"Puē-gi̍k guá ê kiáⁿ ah，lín tsit tia̍p kui tī guá tik-khak thiàⁿ lín，guá ê siū-khì tsiū suah，bô beh hîng-hua̍t lín. "

思羅安台語點字網站