《耶穌言行錄》

| | | 轉寄

Tē-67-tsiuⁿ,Put-gī kuán-ke ê phì-jū

作者 Ko Kim-sing. 2009.07.19

（Lō͘-ka 16：1-13）
Iâ-so͘ kāi I ê ha̍k-sing kóng，"Hó-gia̍h lâng ū tsi̍t ê kuán-ke，hō͘ lâng tuì i ê tsú-lâng hiâm i，kóng sī phuà-huì tsú-lâng ê tsâi-bu̍t.Tsú-lâng tsiū kiò i lâi，kā i kóng，"Guá só͘ thiaⁿ-kìⁿ lí tsit ê tāi-tsì sī tsáiⁿ-iūⁿ？Tio̍h kap guá tshing-siàu，lí buē-tit-thang iû-guân tsuè kuán-ke.

"Kuán-ke tsiū sim-lāi ka-kī siūⁿ kóng，"Tsú-lâng tit-beh lut guá kuán-ke ê thâu-lō͘，taⁿ guá tio̍h tsáiⁿ-iūⁿ？Kia̍h tî-thâu bô khuì-la̍t，kuāⁿ ka-tsù iū kiàn-siàu.Guá taⁿ siūⁿ ū pō͘ lah，sit-lo̍h kuán-ke ê thâu-lō͘，tsiū uē hō͘ lâng tsiap-la̍p tī in ê tshù. "I tsiū kiò khiàm tsú-lâng ê tsè—ê，tsi̍t-lâng tsi̍t-lâng kah i lâi，tuì hit ê thâu-tsi̍t ê kóng，"Lí khiàm guá ê tsú-lâng luā-tsuē？"Ìn kóng，"Tsi̍t-pah tháng ê iû. "Kuán-ke tsiū kā i kóng，"The̍h lí ê tuaⁿ khì siá gō͘-tsa̍p. "Koh tuì tsi̍t ê kóng，"Lí khiàm luā-tsuē？"Ìn kóng，"Tsi̍t-pah tsio̍h ê be̍h. "Tsiū kā i kóng，"The̍h lí ê tuaⁿ khì siá pueh-tsa̍p.

"Tsú-lâng khuàⁿ-kìⁿ put-gī ê kuán-ke só͘ kiâⁿ，tsiū o-ló i ê kè-tì；in-uī tsit sè-kan ê lâng pí kng-bîng ê lâng khah ū kè-tì lâi pān in ê sū.Guá kā lín kóng，Lín tio̍h īng put-gī ê tsîⁿ-tsâi kiat-kau hó ê pîng-iú，tì-kàu lín sòng-sit ê sî uē hō͘ I tsiap-la̍p tī kú-tn̂g ê tshù.Lâng tī sió-khuá ê tāi-tsì tsīn-tiong，tsiū tī tuā tsat ê sū ia̍h tsīn-tiong；tī sió-khuá ê tāi-tsì put-gī，tsiū tī tuā tsat ê sū ia̍h put-gī. "

Tsit ê bé-kù hō͘ lán tsai Iâ-so͘ īng tsit hō ê phì-jū，m̄-sī beh kà-sī lán tio̍h o̍h hit ê kuán-ke put-gī ê só͘ kiâⁿ；to̍k-to̍k kà-sī lán tio̍h tāi-sing pī-pān āu-lâi ê tāi-tsì.

Siōng-tè sī tsuè lán ê Tsú，īng tsîⁿ-tsâi tsâi-tiāu hō͘ lán， ì-sù sī beh īng lán tsuè khì-kū lâi lī-ik lâng，kui îng-kng tī tsì-sìng ê miâ.Lán nā tsīn-tiong，m̄-nā sìn Iâ-so͘，koh o̍h I ê só͘ kiâⁿ，ho̍k-sāi Siōng-tè pang-tsān lâng，tsit ê tsiū thang kiò tsuè tsik-tsū tsîⁿ-tsâi tī thiⁿ-nih，á-sī kiat-kau hó ê pîng-iú，āu-lâi thang tsiap-la̍p lán tī kú-tn̂g ê tshù.

思羅安台語點字網站