《耶穌言行錄》

| | | 轉寄

Tē-68-tsiuⁿ,Pù kap sòng-hiong ê phì-jū

作者 Ko Kim-sing. 2009.07.26

（Lō͘-ka 16：19-31）
Iâ-so͘ koh īng phì-jū kóng，"Ū tsi̍t ê hó-gia̍h lâng，pîng-sò͘ tshīng tsí-sik kap iù-pò͘ ê i-tsiûⁿ，ta̍k ji̍t tshia-huâ；koh ū sòng-hiong lâng miâ Lia̍p-sat-lō͘；thong sing-khu siⁿ-thiàⁿ，hō͘ lâng lok tī hit ê hó-gia̍h lâng ê mn̂g-kháu，ài tsiong hó-gia̍h lâng ê toh-kha só͘ ka-la̍uh ê lân-san mi̍h lâi tsí-ki，ū káu lâi tsī i siⁿ-thiàⁿ ê khang-tshuì；sòng-hiong lâng sí，thiⁿ-sài hû i lok tī A-pik-lia̍p-hán ê hing-tsîng；hó-gia̍h ê lâng ia̍h sí，khì bâi-tsòng；tī im-kan teh siū-khó͘，kia̍h-ba̍k hn̄g-hn̄g khàoⁿ-kìⁿ tī A-pik-lia̍p-hán hing-tsîng ū Lia̍p-sat-lō͘ tī-teh，tsiū kiò kóng，"Guá tsó͘ A-pik-lia̍p-hán ah，lîn-bín guá，tshe Lia̍p-sat-lō͘ īng tsńg-thâu-á-bé ùn-tsuí，lâi tih hō͘ guá ê tshuì-tsi̍h im-líng：in-uī guá tī tsit ê hé-iām put-tsí tshám. "A-pik-lia̍p-hán kā i kóng，"Kiáⁿ-sun ah，lí tio̍h kì-tit tsāi-siⁿ ê sî ū hióng-kè lí ê hok-khì，nā-sī Lia̍p-sat-lō͘ ū siū-kè kan-khó͘，taⁿ tsit-tiáp i tit-tio̍h an-uì，lí tú-tio̍h tshiⁿ-tshám；m̄-nā án-ni，lín kap guán ê tiong-kan ū tuā tshim-khiⁿ，só͘-í lâng ài tuì guán tsia king-kè kàu lín hia lóng buē，tuì lín hia king-kè kàu guán tsia ia̍h buē.

"Hó-gia̍h lâng ìn kóng，"Kì-jiân án-ni，tsiū kiû guá tsó͘，tio̍h tshe Lia̍p-sat-lō͘ ji̍p guá lāu-pē ê tshù；in-uī guá iáu ū gō͘ ê hiaⁿ-tī，tsiū thang tsí-sī in，bián-tit in ia̍h lâi tsit ê kan-khó͘ ê só͘-tsāi. "A-pik-lia̍p-hán kā i kóng，"In ū Mô͘-se kap sian-ti lâng ê tsheh，khó-í thang thiaⁿ. "Ìn kóng，"Tsó͘ A-pik-lia̍p-hán ah，buē：kiám-tshái lâng tuì im-kan lâi tsiū-kūn in，in tsiū huán-hué. "A-pik-lia̍p-hán kóng，"In m̄ thiaⁿ Mô͘-se kap sian-ti lâng ê uē，tsiū siat-sú û lâng tuì im-kan koh-ua̍h khí-lâi，in ia̍h m̄ thiaⁿ i kóng. ""

Lâng siông-siông lia̍h tsit ê sè-kan ê hó-gia̍h tsuè tuì-tiōng，lia̍h sòng-hiong tsuè iàm-tsiān，tsóng-sī Siōng-tè m̄-sī án-ni.Lâng sui-bóng hó-gia̍h，sim nā ǹg tī sè-kan，tī Siōng-tè ê bīn-tsîng sī tshin-tshiūⁿ sòng-hiong thǹg-pak-theh.Sui-bóng sòng-hiong tshin-tshiūⁿ Lia̍p-sat-lō͘ iáu-kú kìng-uì Siōng-tè，tsiàu Siōng-tè khuàⁿ si̍t-tsāi sī pù，in-uī tsit hō lâng só͘ ū ê ke-gia̍p sī lâng só͘ buē tshiúⁿ-tit—ê.Tsit ê phì-jū ia̍h kà-sī lán tio̍h kín-kín huán-hué tsuē，in-uī sí-āu lâng ê tāi-tsì í-king tiāⁿ-tio̍h.

思羅安台語點字網站