《耶穌言行錄》

| | | 轉寄

Tē-70-tsiuⁿ,Kî-tó bô ià，jīn-tsuē

作者 Ko Kim-sing. 2009.08.09

（Lō͘-ka 18：1-14）
Iâ-so͘ kā lâng kóng，"Lâng ing-kai siông-siông kî-tó m̄-thang ià，"tsiū siat phì-jū kóng，"Bó͘-uī ū tsi̍t ê kuaⁿ，bô kìng-uì Siōng-tè，ia̍h bô tuì-tiōng lâng，hit ê siâⁿ ū tsi̍t ê tsiú-kuáⁿ lâi kìⁿ i kóng，"Ū lâng kap guá kiat-siû，kiû lí thuè guá sin-uan. "Hit ê kuaⁿ kú-kú m̄ tshap，āu-lâi ka-kī siūⁿ kóng，"Guá sui-bóng bô kìng-uì Siōng-tè，ia̍h bô tuì-tiōng lâng，tsóng-sī tsit ê tsiú-kuáⁿ lâng ta̍uh-ta̍uh lâi kiáu-jiáu guá，tik-khak tio̍h thuè in sin-uan，bián-tit íng-íng lâi tsô-tsak guá. ""

Tsú koh kóng，"Lín tio̍h thiaⁿ put-gī ê kuaⁿ só͘ kóng ê uē；hô-hòng Siōng-tè só͘ kíng ê peh-sìⁿ mî-ji̍t kiû-kiò，Siōng-tè sui-jiân iân-tshiân，kiám m̄ thuè in sin-uan. "

Ū lâng lia̍h ka-kī tsuè gī lâi khuàⁿ-khin pa̍t lâng，Iâ-so͘ tsiong phì-jū kā in kóng，"Nn̄g lâng tsiūⁿ tiān-tn̂g kî-tó，tsi̍t ê sī Huat-lī-sài ê lâng；tsi̍t ê sī thiu-hiòng ê lâng.Huat-lī-sài ê lâng ka-kī khiā-teh kî-tó kóng，"Kám-siā Siōng-tè，guá m̄-sī tshin-tshiūⁿ tsìng-lâng kiâⁿ lik-sik，put-gī，îm-ok ê tāi-tsì，ia̍h bô tshin-tshiūⁿ hit ê thiu-hiòng；tsi̍t lé-pài ê tiong-kan guá kìm-tsia̍h nn̄g pái，ia̍h īng só͘ ū ê mi̍h tsa̍p-hūn thiu tsi̍t hūn. "Hit ê thiu-hiòng ê lâng hn̄g-hn̄g teh khiā，m̄-káⁿ kia̍h-ba̍k ǹg thiⁿ，tsiū tuî hing kóng，"Guá ū tsuē，Siōng-tè lîn-bín guá. ""Iâ-so͘ koh kóng，"Guá kā lín kóng，tsit ê lâng tò-khì in tshù tit-tio̍h tshing-gī，khah-iâⁿ hit ê lâng；in-uī lâng ka-kī sing tsuè kuâiⁿ，tik-khak uē kàng-lo̍h kàu tsuè kē；ka-kī tsuè kē，tik-khak uē sing kàu tsuè kuâiⁿ. "

思羅安台語點字網站