《耶穌言行錄》

| | | 轉寄

Tē-71-tsiuⁿ,Má-tāi，Má-lī-a

作者 Ko Kim-sing. 2009.08.16

（Lō͘-ka 10：38-42）
Tī Pik-tāi-nî ū tsi̍t ke hiaⁿ-tī tsí-bē saⁿ lâng lóng sī Iâ-so͘ só͘ thiàⁿ.Ū tsi̍t ji̍t，Iâ-so͘ kàu tsit só͘-tsāi，in tsí-bē tsi̍t lâng miâ Má-tāi ngiâ-tsih I ji̍p tshù.I ê sió-bē miâ Má-lī-a tsē tī Iâ-so͘ ê kha-ē thiaⁿ tō-lí.Má-tāi pān tāi-tsì tsuē-tsuē，sim-kuaⁿ hūn-tsa̍p，tsiū lâi kā Iâ-só͘ kóng，"Tsú ah，guá ê sió-bē pàng hō͘ guá ka-kī pān tāi-tsì，lí kiám bô iàu-kín？Tio̍h kah i lâi pang-tsān guá. "Iâ-so͘ ìn kóng，"Má-tāi ah，Má-tāi ah，lí in-uī tsuē-tsuē hāng ê tāi-tsì khuà-lū hūn-tsa̍p，tsóng-sī tsi̍t hāng iàu-kín；Má-lī-a só͘ kíng sī hó ê ki-gia̍p，lóng buē sit-lo̍h—ê. "

Liāu-lí ke-sū，hó khuán-thāi lâng-kheh sui-jiân sī tio̍h，iáu-kú m̄-thang tuì-tiōng tsit hō ê tāi-tsì siuⁿ kè-thâu，tì-kàu liân-luī lán bô îng thang thiaⁿ tō-lí.

Tio̍h o̍h Má-lī-a ê him-bō͘ tō-lí，m̄-káⁿ sit-lo̍h ki-huē，tuì-tiōng thiⁿ-tíng buē tshiúⁿ-the̍h ê ki-gia̍p.

思羅安台語點字網站