《耶穌言行錄》

| | | 轉寄

Tē-72-tsiuⁿ,Lia̍p-sat-lō͘

作者 Ko Kim-sing. 2009.08.23

（Iok-hān 11：1-46）
Má-tāi，Má-lī-a ê hiaⁿ-tī Lia̍p-sat-lō͘ phuà-pīⁿ，in tsiū tshe lâng tsiū-kūn Iâ-so͘ kóng，"Tsú ah，lí só͘ thiàⁿ ê lâng phuà-pīⁿ lah. "Iâ-so͘ thiaⁿ tsit ê uē，tī I ê só͘-tsāi iû-guân tiàm nn̄g ji̍t.Āu-lâi kā ha̍k-sing kóng，"Kap guá koh khì Iû-thài，lán ê pîng-iú Lia̍p-sat-lō͘ teh khùn，guá beh khì kiò i tshíⁿ. "Ha̍k-sing kóng，"I teh khùn tsiū hó. "Iâ-so͘ tsiū bîng-bîng kā in kóng，"Lia̍p-sat-lō͘ í-king sí lah，guá kai-tsài bô tī hia，hō͘ lín thang sìn；taⁿ kap guá khì tsiū-kūn i. "Iâ-so͘ kàu tè，Lia̍p-sat-lō͘ í-king bâi-tsòng sì ji̍t.Má-tāi thiaⁿ-kìⁿ Iâ-so͘ kàu，tshut-lâi ngiâ-tsih I kóng，"Tsú ah，lí nā tī tsia，guán ê hiaⁿ-tī tik-khak bô sí. "Iâ-so͘ kóng，"Lín ê hiaⁿ-tī uē koh-ua̍h. "Má-tāi kóng，"Guá tsai lō͘-bé ji̍t koh-ua̍h ê sî，i tik-khak koh-ua̍h.

"Iâ-so͘ kóng，"Hō͘ lâng koh-ua̍h sī guá，hō͘ lâng ū sìⁿ-miā ia̍h sī guá，sìn guá ê lâng sui-bóng sí，tik-khak ua̍h；nā ua̍h lâi sìn guá，íng buē sí；lí sìn mah？"Ìn kóng，"Tsú ah，sī；guá sìn lí sī Siōng-tè ê Kiáⁿ Ki-tok，só͘ ing-kai tio̍h lâi sè-kan ê lâng. "Má-tāi kóng liáu，tò-khì àm-tsīⁿ kiò Má-lī-a kóng，"Sian-siⁿ kàu，teh kiò lí. "Má-lī-a thiaⁿ-kìⁿ án-ni，kín-kín khí-lâi tsiū-kūn Iâ-so͘，phak tī I ê kha-ê kóng，"Tsú ah，lí nā tī tsia，guá ê hiaⁿ-tī tik-khak bô sí.

"Iâ-so͘ khuàⁿ-kìⁿ tsit ê hū-jîn-lâng thî-khàu，koh khuàⁿ-kìⁿ saⁿ-kap lâi ê Iû-thài lâng ia̍h thî-khàu，tsiū siong-sim huân-ló kóng，"I bâi-tsòng tī tah-lo̍h？"Ìn kóng，"Tsú lâi khuàⁿ.

"Iâ-so͘ lâu ba̍k-sái.Iâ-so͘ koh-tsài siong-sim kàu bōng—nih.Bōng sī tsio̍h-tōng，tíng-bīn ū hē tsio̍h.Iâ-so͘ kóng，"Suá-khì hit ê tsio̍h. "Má-tāi kóng，"Tsú ah，taⁿ í-king sì-ji̍t，sin-si hiú-nuā.

"Iâ-so͘ kóng，"Guá kiám bô kóng，Lín nā ū sìn uē khuàⁿ-kìⁿ Siōng-tè ê îng-hián？"Lâng tsiū tsiong tsio̍h suá-khui.Iâ-so͘ kia̍h-ba̍k kóng，"Pē ah，í-king thiaⁿ guá，guá kám-siā lí.Guá tsai lí siông-siông thiaⁿ guá，to̍k-to̍k kóng án-mi，hō͘ uî-teh khiā ê lâng lâi sìm lí sī tshe guá. "

Kóng liáu，tuā siaⁿ âu-kiò kóng，"Lia̍p-sat-lō͘ tshut-lâi. "Sí-lâng tsiū tshut-lâi，kha-tshiú tsat pò͘，bīn pau kun.Iâ-so͘ kóng，"Tháu khui hō͘ i kiâⁿ. "

Tuì án-ni tsuē-tsuē lâng sìn Iâ-so͘，hō͘ tsè-si-thâu kap Huat-lī-sài lâng it-huat uàn-hūn，kè-bô͘ beh hām-hāi.

Tsit ê tāi-tsì thang hō͘ lán kì-tit Iâ-so͘ khah tsá tuì Iû-thài lâng só͘ kóng ê tō-lí tsí-sī lán，I ū kuân，uē hō͘ lán tit-tio̍h sin ê sìⁿ-miā，tsiū-sī uē tîng-thâu-siⁿ lán ê sim，phì-jū hō͘ sim-si koh-ua̍h；ia̍h ū kuân uē hō͘ lán ê sing-khu tī bua̍t-ji̍t tuì bōng-nih tshut-lâi koh-ua̍h，tú-tio̍h hó pháiⁿ ê pò-ìng.Hit ê uē tsiū-sī"Sî beh kàu，tsit tia̍p tsiū-sī，sí ê lâng uē thiaⁿ-kìⁿ Siōng-tè ê Kiáⁿ ê siaⁿ，thiaⁿ ê lâng tik-khak ua̍h. "Pē ka-kī ū ua̍h-miā，siúⁿ-sù Kiáⁿ ū ua̍h-miā ia̍h sī án-ni.M̄-sái kî-kuài tsit ê tāi-tsì，sî beh kàu，bōng-lāi ê lâng lóng-tsóng uē thiaⁿ-kìⁿ Jîn-tsú ê siaⁿ tshut-lâi；tsuè hó ê lâng khí-lâi tit-tio̍h ua̍h，tsuè pháiⁿ ê lâng khí-lâi tú-tio̍h gí-tsuē.

思羅安台語點字網站