《耶穌言行錄》

| | | 轉寄

Tē-74-tsiuⁿ,Siàu-liân tshíng-mn̄g íng-uán-ua̍h

作者 Ko Kim-sing. 2009.09.06

（Má-thài 19：16-22；Má-khó 10：17-27； Lō͘-ka 18：18-23）
Iâ-so͘ tsiok-hok gín-ná jiân-āu bô luā-kú，ū tsi̍t ê siàu-liân lâng，ia̍h sī tsuè kuaⁿ，lâi tsiū-kūn Iâ-so͘，kuī-teh mn̄g kóng，"Hó ê sian-siⁿ ah，guá ing-kai tio̍h tsáiⁿ-iūⁿ tsuè，tsiah uē tit-tio̍h íng-uán-ua̍h？"Iâ-so͘ kóng，"Siáⁿ-sū tshing-ho͘ guá tsuè hó，bô tsi̍t lâng hó，to̍k-to̍k Siōng-tè nā-tiāⁿ；lí ái tit-tio̍h íng-ua̍h，tio̍h siú tsa̍p-tiâu-kài. "Hit ê lâng ìn kóng，"Guá tuì suè-hàn ê sî lóng siú；iáu-kú ū bē tsīn mah？"Iâ-so͘ ua̍t-thâu khuàⁿ，thiàⁿ—i kóng，"Iáu-kú ū khiàm tsi̍t hāng，tio̍h khì buē só͘ ū ê lâi tsín-tsè sòng-hiong lâng，tsiū ū tsîⁿ-tsâi tī thiⁿ-nih；koh tio̍h lâi tè guá. "Hit ê lâng thiaⁿ-kìⁿ tsit ê uē tsiū pìⁿ-bīn iu-būn，tsuè i khì，sī i ê tsîⁿ-tsâi tsuē ê iân-kò͘.Iâ-so͘ sì-kuè khuàⁿ，kā ha̍k-sing kóng，"Pù-lâng ji̍p Siōng-tè ê kok tsīn-tsāi oh. "

Sè-kan tsuē-tsuē lâng tshin-tshiūⁿ tsit ê siàu-liân lâng，lia̍h ka-kī tsuè hó lâng，bô siuⁿ Siōng-tè ê lu̍t-huat lâng thàn buē kàu，in-uī lâng guā-phê sui-bóng bô hián-bîng sím-mi̍h pháiⁿ，iáu-kú sim-lāi ū pháiⁿ ê liām-thâu；hō͘ Siōng-tè khuàⁿ，bô m̄ sǹg sī ū tsuē ê lâng.

Koh ū lâng tshin-tshiūⁿ tsit ê siàu-liân lâng，tuì-tiōng tsîⁿ-tsâi khah tuì-tiong Siōng-tè，ài tsuè Iâ-so͘ ê ha̍k-sing ia̍h buē tsiâⁿ.Tsóng-sī nā kam-guān khik ka-kī lâi tè Iâ-so͘，tsiū uē tit-tio̍h khah tuā ê hok-khì，tsiū-sī íng-uán buē pāi-huāi ê tsîⁿ-tsâi tī thiⁿ-nih.

思羅安台語點字網站