《耶穌言行錄》

| | | 轉寄

Tē-76-tsiuⁿ,Tshiⁿ-mî Pa-tí-mái

作者 Ko Kim-sing. 2009.09.20

（Má-thài 20：29-34；Má-khó 10：46-52； Lō͘-ka 18：35-43）
Ū tsi̍t ji̍t Iâ-so͘ kūn Iâ-lī-ko，ū nn̄g lâng tshiⁿ-mî，tsē tī lō͘-kîⁿ kiû-khit；tsi̍t lâng miâ kiò Pa-tí-mái，thiaⁿ-kìⁿ Iâ-so͘ kàu，tuā siaⁿ kiò kóng，"Tāi-pi̍t ê hō͘-è，Iâ-so͘ ah，lîn-bín guá.
"Tsìng-lâng hiâm i，kah i tsīng-tsīng.I it-huat kiò kóng，"Tāi-pi̍t ê hō͘-è ah， lîn-bín guá. "Iâ-so͘ thîng kha hah lâng kiò i；suî-sî kiò tshiⁿ-mî ê kóng，"An lí ê sim khí-lâi，Iâ-so͘ kiò lí.
"Tshiⁿ-mî ê pàng hiat-ka̍k i ê saⁿ，khí-lâi tsiū-kūn Iâ-so͘.Iâ-so͘ kóng，"Lí ài guá tsáiⁿ-iūⁿ tsuè？"Tshiⁿ-mî ê kóng，"Sian-siⁿ，guá ài tit-tio̍h khuàⁿ-kìⁿ. "Iâ-so͘ kóng，"Tsuè lí khì，lí ê sìn i-hó lí. "Tshiⁿ-mî ê suî-sî tit-tio̍h khuàⁿ-kìⁿ，tè Iâ-so͘ tī lō͘-nih.

Lán sing-khu sui-bóng bô tshiⁿ-mî，sim-ba̍k sit-tsāi bô kng，in-uī pún m̄-bat Siōng-tè，buē hiáu kiâⁿ tsìng-tit ê lō͘，khuán-sit tshiⁿ-tshiūⁿ tshiⁿ-mî.Siat-sú ài thuat-lī tsit hō kan-khó͘，tio̍h o̍h Pa-tí-mái，i tsai Iâ-so͘ kàu，tsiū sīng ki-huē kiû lîn-bín.Koh tio̍h o̍h i ê hó-táⁿ kuat-tuàn，lâng ài tsó͘-tòng，i lóng bô kiaⁿ，sī tit-tit kiû kàu tit-tio̍h.Lán nā án-ni，Iâ-so͘ tik-khak uē thiaⁿ lán só͘ kiû，lâi si-un.

思羅安台語點字網站