《耶穌言行錄》

| | | 轉寄

Tē-77-tsiuⁿ,Sat-kai

作者 Ko Kim-sing. 2009.09.27

（Lō͘-ka 19：1-10）
Iâ-so͘ ji̍p Iâ-lī-ko teh king-kè ê sî，ū lâng miâ-kiò Sat-kai，sī tsuè siu-hiòng ê thâu-lâng，ia̍h sī hó-gia̍h lâng，ài khuàⁿ-kìⁿ Iâ-so͘ sī sím-mi̍h hō ê lâng，nā-sī lâng tsuē，ia̍h ka-kī sī ué-lâng，só͘-í khuàⁿ buē tio̍h；phah-sǹg Iâ-so͘ beh tuì hia king-kè，tsiū tsáu tsuè-tsîng，peh-tsiūⁿ sng-tsâi-tshiū thang lâi khuàⁿ.Iâ-so͘ kàu，kia̍h-ba̍k khuàⁿ i，kóng，"Sat-kai kín-kín lo̍h-lâi，kin-á-ji̍t guá beh tuà tī lín tshù. "I tsiū liâm-piⁿ lo̍h-lâi，huaⁿ-hí tsiap-la̍p Iâ-so͘.Tsìng-lâng hiâm Iâ-so͘ kóng，"Tsáiⁿ-iūⁿ khì hioh tī pháiⁿ-lâng ê só͘-tsāi. "

Sat-kai khí-lâi tuì Tsú kóng，"Tsú ah，guá tsiong só͘ ū ê tsi̍t-puàⁿ tsín-tsè sòng-hiong lâng；siat-sú bat bû-luā li̍k-sik lâng，tsiū tsiong sì-pē lâi pê i. "Iâ-so͘ kóng，"Kin-á-ji̍t tsí tsit ke tit-tio̍h kiù，in-uī tsit lâng tsuè A-pik-lia̍p-hàn ê hō͘-è；Jîn-tsú kàu，sī beh tshē sit-lo̍h ê lâng lâi kiù i. "

Lán nā ài tit-tio̍h tsin ê hok-khì tio̍h o̍h Sat-kai，huaⁿ-hí tsia̍p-la̍p Iâ-so͘，koh tio̍h o̍h i ê só͘ kiâⁿ.I í-king hō͘ Iâ-so͘ tiàu，tsiū liâm-piⁿ tshíⁿ-gō͘，siūⁿ tsá li̍k-sik lâng sī tuā m̄-tio̍h.Tsá Mô͘-se thuân lu̍t-lē kóng，"Lâng tsuè tsha̍t thau khan iûⁿ，tio̍h pê sì-pē. "Sat-kai sui-bóng bô tú-tú tshin-tshiūⁿ án-ni，tsóng-sī tsai i īng khuí-khiat ê kè-bô͘ lâi tit-tio̍h tsîⁿ，sī kap tsuè tsha̍t bô koh-iuⁿ，só͘-í tuì lâng the̍h tsi̍t-pē kam-guān pê-pó͘ sì-pē：án-ni hián-bîng i ê kū-sim kū-khuán lóng kué-uāⁿ tsuè sin. Lán tsuè Iâ-so͘ ê ha̍k-sing ing-kai ū tsit hō ê khuán-sit tsiah tio̍h.

思羅安台語點字網站