《耶穌言行錄》

| | | 轉寄

Tē-78-tsiuⁿ,Má-lī-a īng iû buah Iâ-so͘

作者 Ko Kim-sing. 2009.10.04

（Má-thài 26：6-13； Má-khó 14：3-9；Iok-hān 12：1-8）
Puâⁿ-kè-tsueh la̍k-ji̍t tsîng，Iâ-so͘ kàu Pik-tāi-nî，tsiū-sī Lia̍p-sat-lō͘ sí koh-tsài ua̍h ê só͘-tsāi.Ū lâng in-uī Iâ-so͘ siat iân-sia̍h，Má-tāi pān iân-sia̍h ê sū；tsē uī ê tiong-kan Lia̍p-sat-lō͘ iā tī-teh.Má-lī-a tsiong ki̍k tsin，ki̍k kuì-khì ê phang-iû tsi̍t kun，lâi buah Iâ-so͘ ê kha，īng thâu-mn̂g lâi tshit；phang-bī kàu muá tshù.Ū tsi̍t ê ha̍k-sing beh buē Sian-siⁿ，sī Ka-lio̍k lâng Se-bûn ê kiáⁿ miâ kiò Iû-tāi；i kóng，"Siáⁿ-sū m̄ khì buē tsit ê phang-iû，thang tit-tio̍h gûn saⁿ-tsa̍p，lâi tsín-tsè sòng-hiong lâng ah？"Iû-tāi kóng án-ni，m̄-sī beh tsiàu-kò͘ sòng-hiong lâng，put-kò sī in-uī i kuán hit ê tsîⁿ-tē，beh thau-the̍h só͘ tué ê gûn-hāng nā-tiāⁿ.

Iâ-so͘ kóng，"Tshut-tsāi i，tsit ê hū-jîn-lâng khǹg tsit ê phang-iû，sī pī-pān guá bâi-tsòng ê ji̍t ê lō͘-īng.In-uī sòng-hiong ê lâng siông-siông kap lín tī-teh，guá bô siông-siông kap lín tī-teh. "Iâ-so͘ koh kóng，"Piàn thiⁿ-ē put-lūn sím-mi̍h só͘-tsāi，thuân tsit ê hok-im，iā tik-khak kóng-khí tsit ê hū-jîn-lâng ê só͘ kiâⁿ hō͘ lâng kì-liām. "

Lūn tsit ê hū-jîn-lâng tit-tio̍h Iâ-so͘ ê kà-sī，sui-jiân buē pí-tit tsa̍p-jī sù-tô͘ ê hó ki-huē，tsóng-sī i ê thiaⁿ Tsú pí tsuē-tsuē lâng khah iâⁿ，koh tsai Iâ-so͘ ê tāi-tsì pí pa̍t lâng ia̍h khah siông-sè.Lán thang tsai thiaⁿ tō-lí tio̍h jīn-tsin suè-jī siuⁿ，tsiah uē ǹg-bāng Sìng Sîn ê pang-tsān，uē tsìn-pō͘ thong-ta̍t tō-lí.Nā bô，m̄-nā buē bîng-pi̍k tō-lí，kiaⁿ-liáu huán-tńg uē tshin-tshiūⁿ Iû-tāi，m̄-nā ka-kī buē kiâⁿ hó，ia̍h m̄ huaⁿ-hí pa̍t lâng hó ê só͘ kiâⁿ.

思羅安台語點字網站