《耶穌言行錄》

| | | 轉寄

Tē-79-tsiuⁿ,Iâ-so͘ khiâ lû ji̍p siâⁿ，Kuáⁿ sing-lí lâng tshut tiān

作者 Ko Kim-sing. 2009.10.11

（Má-thài 21：1-22；Má-khó 11：1-9； Lō͘-ka 19：29-40；Iok-hān 12：12-19）
Iâ-so͘ tsiūⁿ Iâ-lō͘-sat-líng，kàu Pik-huat-kî uá Ka-ná suaⁿ，tsiū tshe nn̄g ê ha̍k-sing kóng，"Lín khì tsîng-bīn ê hiuⁿ-tsng，tsiū uē tú-tio̍h lû-bú pa̍k—teh，ū suè-tsiah lû saⁿ-kap tī-teh，tio̍h tháu kā i khan lâi.Ū lâng kap lín piān-pok，tsiū tio̍h kóng，"Tsú beh īng i，"in tik-khak thàn lâi pàng i lâi.Án-ni sī ìng-giām sian-ti lâng ê uē kóng，"Kā Sûn ê tsa-bó͘-kiáⁿ kóng，Lín ê ông kàu，un-jiû khiâ lû，kap lû ê suè-tsiah，tsiū-sī lû-á-kiáⁿ. ""Ha̍k-sing suî-sî khì，tsiàu bīng-līng lâi kiâⁿ，khan lû kap lû-á-kiáⁿ，tsiong i ê saⁿ lok tī tíng-bīn，hû Iâ-so͘ tsiūⁿ-khì khiâ.Tsìng-lâng īng saⁿ pho͘ lō͘，ū-ê tshò tshiū-ki pho͘ tī lō͘—nih.Tsîng-āu tsìng-lâng tuā siaⁿ kiò kóng，"Tāi-pi̍t ê hō͘-è，bān hok-khì ah；thok-tiōng Tsú ê miâ lâi ê ing-kai tit-tio̍h un-tián；tī tíng-bīn bān hok-khì. "

Iâ-so͘ ji̍p Iâ-lō͘-sat-líng，khì tiān-nih，sì-kuè khuàⁿ tsiah ê mi̍h；tsiah tshut-khì kàu Pik-tāi-nî.Bîn-á-tsá-khí koh khì tiān-tn̂g，tī lō͘-nih iau，khuàⁿ-kìⁿ bû-hua-kó tshiū，tsiū uá-kūn i，nā-sī bô só͘ tit-tio̍h，kan-ta hio̍h nā-tiāⁿ；tsiū kā tshiū kóng，"Lí ê ké-tsí íng-íng bô koh kiat，"tshiū liâm-piⁿ ko͘-tâ.

Iâ-so͘ ji̍p tiān kuáⁿ hit lāi-bin tsuè sing-lí ê lâng；tshia-tó uāⁿ tsîⁿ—ê ê toh，kap buē tsíⁿ-á—ê ê í；m̄-tsún tuà khì-kū tuì tiān-nih kè，tsí-sī lâng kóng，"Sìng-tsheh kiám bô kì-tsài kóng，"Guá ê tshù sī tshing-ho͘ tsuè tsìng peh-sìⁿ kî-tó ê tshù？"lín huán-tńg hō͘ i tsuè tsha̍t-siū. "

Iâ-so͘ tsîng bat tsi̍t pái kuáⁿ tiān-lāi tsuè sing-lí ê lâng，kàu tsit pái sī tē-jī pái.

Tshiⁿ-mî—ê，pái-kha—ê tī tiān-nih tsiū-kūn Iâ-so͘，i-hó i. Tsè-si-tiúⁿ，tha̍k-tsheh lâng thiaⁿ I só͘ kóng，khuàⁿ I só͘ kiâⁿ，koh khuàⁿ suè-kiáⁿ o-ló Iâ-so͘，tsiū siⁿ-khí uàn-hūn，kè-bô͘ beh hāi I，nā-sī m̄-káⁿ，in-uī tsìng-lâng kî-kuài I ê tō-lí.

Í-king àm，Iâ-so͘ tshut siâⁿ.

Iâ-so͘ hit sî khiâ lû ji̍p Iâ-lō͘-sat-líng，hián-bîng ông ê khuán-sit；si̍t-tsāi m̄-sī ài kiû thé-biān，miâ-siaⁿ，iàu-kín sī beh ìng-giām lóng-tsóng sian-ti só͘ tshàm-gú ê tāi-tsì.

Lūn I kàu tiān kiâⁿ giâm-giâm ê huat-tō͘ lâi kuáⁿ tsuè sing-lí ê lâng，koh ín Sìng-tsheh tāng-tāng tsik-pī in，hām tsit pái ū nn̄g pái.I kiâⁿ án-ni，tsiok-kiàn I ū Siōng-tè ê kuân.

Koh tī lō͘-nih ū tsiù-tsó͘ bû-hua-kó tshiū，kà-sī lán tio̍h sîng-si̍t ho̍k-sāi Siōng-tè lâi kiâⁿ hó，m̄-thang uá-khò guā-phê ê hó khuàⁿ.

思羅安台語點字網站