《耶穌言行錄》

| | | 轉寄

Tē-82-tsiuⁿ,Tsiú-kuáⁿ lâng la̍p-tsîⁿ

作者 Ko Kim-sing. 2009.11.01

（Má-khó 12：41-44；Lō͘-ka 21：1-4）
Ū tsi̍t ji̍t，Iâ-so͘ tī khò͘-pâng tuì-bīn teh tsē，khuàⁿ-kìⁿ tsìng-lâng īng gûn la̍p-lo̍h khò͘-pâng，hó-gia̍h ê lâng la̍p tsuē-tsuē.Ū tsi̍t ê sòng-hiong ê tsiú-kuáⁿ lâng lâi la̍p tsi̍t lî nā-tiāⁿ.Iâ-so͘ tsiū kā ha̍k-sing kóng，"Tsit ê sòng-hiong ê tsiú-kuáⁿ lâng la̍p-lo̍h khò͘-pâng pí tsìng-lâng khah-tsuē.In-uī tsìng-lâng sī tsiong ū tshun ê tsîⁿ-tsâi lâi la̍p，tsit ê tsiú-kuáⁿ lâng tsiū-sī tsiong i só͘ ū ê lóng-tsóng lâi la̍p，"án-ni sǹg sī tsuân ke-gia̍p.

Lūn tuê-iân la̍p hō͘ Siōng-tè，bô-lūn tsuē-tsió，iàu-kín tio̍h o̍h tsit ê tsiú-kuáⁿ lâng ê tsīn-sim tshut-la̍t，án-ni Siōng-tè tsiū huaⁿ-hí，tshin-tshiūⁿ Sìng-king kóng，"Lín tuê-gûn ta̍k lâng tio̍h tsiàu sim só͘ huaⁿ-hí—ê，m̄-sái iu-būn，m̄-sái bián-kióng，in-uī Siōng-tè sī thiàⁿ hit hō huaⁿ-hí tuê ê lâng. "

La̍p-tsîⁿ hō͘ Siōng-tè tio̍h tsiàu Siōng-tè só͘ hō͘ lán ê khuì-la̍t，Siōng-tè hō͘ lâng tsuē-tsuē，lâng huán-tńg la̍p tsió，Sìng-tsheh sǹg sī tshin-tshiūⁿ tsuè-tsha̍t tshiúⁿ Siōng-tè ê tsîⁿ-tsâi.Kiám-tshái Siōng-tè hō͘ lán ê khuì-la̍t tsin sió-khuá，lán tio̍h la̍p sió-khuá；nā tsīn khuì-la̍t，tsiū m̄-sái kiàn-siàu，in-uī Sìng-tsheh kóng，"Lâng huaⁿ-hí tsuè，tsiū tit-tio̍h tsiap-la̍p，tsiàu i só͘ ū，m̄-sī tsiàu i só͘ bô. "

思羅安台語點字網站