《耶穌言行錄》

| | | 轉寄

Tē-83-tsiuⁿ,Iâ-lō͘-sat-líng tó-huāi kap bua̍t-ji̍t

作者 Ko Kim-sing. 2009.11.08

（Má-thài 24：1-44；Má-khó 13：1-33； Lō͘-ka 21：5-28）
Iâ-so͘ tshut tiān，ha̍k-sing tuì I kóng，"Sian-siⁿ，tshiáⁿ khuàⁿ tsit king tiān kàu tsiah suí？"Iâ-so͘ kóng，"Sî beh kàu，bô lâu nn̄g-tè tsio̍h saⁿ-tha̍h，tsiū-sī lóng thiah-huāi. "Iâ-so͘ tī Kaⁿ-ná-suaⁿ，ha̍k-sing tsiū lâi thau mn̄g kóng，"Tshiáⁿ kā guán kóng，tī-sî ū tsit ê tāi-tsì，koh lí lîm-kàu，kap sè-kan ê bua̍t-ji̍t ū sím-mi̍h tiāu-thâu？"Iâ-so͘ tsiū kóng，"Tit-beh ū tsuē-tsuē lâng ké guá ê miâ lâi，ka-kī kóng sī Ki-tok，lâi bê-hi̍k tsìng-lâng.Lín tit-beh thiaⁿ kau-tsiàn，kap kau-tsiàn ê hong-siaⁿ，kok kong-kik kok，peh-sìⁿ kong-kik peh-sìⁿ，ki-hng，un-i̍k，tuē tín-tāng，lín in-uī guá ê miâ uē tú-tio̍h tsai-lān，hō͘ bān peh-sìⁿ uàn-hūn.Ū lâng beh iàm-tsiān kū-tsua̍t guá，tsóng-sī thun-lún kàu bé ê lâng tit-tio̍h kiù.Thian-kok ê hok-im tit-tio̍h piàn-thuân tī phó͘ thiⁿ-ē，jiân-āu bua̍t-kî kàu. " Iâ-so͘ ia̍h kà-sī I ê ha̍k-sing kóng，nā khuàⁿ-kìⁿ Iâ-lō͘-sat-líng teh-beh bia̍t-bô ê tiāu-thâu，tsiū tio̍h kín-mé tsáu siám-pī.Jiân-āu iok-lio̍k sì-tsa̍p nî，Iâ-lō͘-sat-líng tú-tio̍h Lô-má kok ê lâng lâi tsâu-bia̍t，hit-sî sit-tsāi tsin tuā tshiⁿ-tshám ê tāi-tsì.Ū lâng gō—sí，ū lâng thâi—sí，ū lâng sio—sí，ū lâng lia̍h khì tìng si̍p-jī-kè，ū lâng lia̍h khì guā-kok，tú-tio̍h tsin-tsuē kan-khó͘，to̍k-to̍k Iâ-so͘ ê ha̍k-sing kì-tit Iâ-so͘ kóng ê uē，tāi-sing tsáu siám-pī tī suaⁿ-lāi.

Lūn bua̍t-ji̍t，Iâ-so͘ bô kóng tī-sî，iáu-kú sī kóng bô phài-phe，bô tiuⁿ-tî ê sî hut-jiân uē kàu；só͘-í ing-kai kín-sin7lai5 pī-pān，in-uī m̄-tsai Tsú sím-mi̍h sî uē kàu.

思羅安台語點字網站