《耶穌言行錄》

| | | 轉寄

Tē-86-tsiuⁿ,Bua̍t-ji̍t ê sím-phuàⁿ

作者 Ko Kim-sing. 2009.11.29

（Má-thài 25：31-46）
Iâ-so͘ īng phì-jū kóng lóng-tsóng ê lâng lō͘-bé tio̍h siū sím-phuàⁿ，tsiū kóng，"Tng Jîn-tsú tit-tio̍h îng-kng，kap lóng-tsóng ê thiⁿ-sài kàu，tsē I îng-kng ê uī；bān peh-sìⁿ tsū-tsi̍p tī I ê bīn-tsîng，suî-sî pun-khui in，tshin-tshiūⁿ kò͘-iûⁿ ê pun biân-iûⁿ lī suaⁿ-iûⁿ；biân-iûⁿ lok tsiàⁿ-pîng，suaⁿ-iûⁿ lok tò-pîng.Ông tsiū kā tsiàⁿ-pîng ê lâng kóng，"Lín tuì guá ê Pē siū-un，thang tsìn-tsîng siū-hok，tsiū-sī tuì tshòng-tsō sè-kan í-lâi，thuè lín só͘ pī-pān—ê.In-uī guá iau，lín hō͘ guá tsia̍h；guá tshuì-ta，lín hō͘ guá lim；guá tshut-guā，lín hō͘ guá tuà；guá thǹg-pak-theh，lín hō͘ guá tshing；guá phuà-pīⁿ，lín tsiàu-kò͘ guá；guá tī kaⁿ-nih，lín hó khuán-thāi guá. "Gī ê lâng ìn kóng，"Tsú ah，sím-mi̍h sî khàoⁿ-kìⁿ lí iau，tsiū hō͘ lí tsia̍h？tshuì-ta，tsiū hō͘ lí lim？Sím-mi̍h sî khuàⁿ-kìⁿ lí phuà-pīⁿ，á-sī tī kaⁿ-nih，tsiū hó khuán-thāi lí？"Ông tsiū kā in kóng，"Guá si̍t-si̍t kā lín kóng，Í-king kiâⁿ án-ni khuán-thāi guá ê hiaⁿ-tī tē-it suè ê tsi̍t-ê，tsiū-sī kiâⁿ i khuán-thāi guá. "Koh kā tò-pîng ê lâng kóng，"Lín siū tsiù-tshàm—ê，tio̍h lī-khui guá，khì ji̍p íng-uán ê hé，tsiū-sī in-uī Mô͘-kuí kap i sù-tsiá pī-pān—ê.In-uī guá iau，lín bô hō͘ guá tsia̍h；tshuì-ta，lín bô hō͘ guá lim；tshut-guā，lín bô hō͘ guá tuà；thǹg-pak-theh，lín bô hō͘ guá tshīng；phuà-pīⁿ kap kuaiⁿ-kaⁿ，lín bô tsiàu-kò͘ guá. "In ìn kóng，"Tsú ah，guán sím-mi̍h sî khuàⁿ-kìⁿ lí iau，tshuì-ta，tshut-guā，thǹg-pak-theh，phuà-pīⁿ，kuaiⁿ-kaⁿ，tsiū bô ho̍k-sāi lí mah？"Ông tsiū kā in kóng，"Guá si̍t-si̍t kā lí kóng，Í-king bô kiâⁿ án-ni khuán-thāi tsiah ê tē-it suè ê tsi̍t-ê，tsiū-sī bô kiâⁿ i khuán-thāi guá. "Tsiah ê lâng siū íng-uán ê hîng-hua̍t，gī ê lâng ji̍p íng-uán-ua̍h. "

Tha̍k tsit tsiuⁿ thang tsai lâng sí liáu lóng-tsóng tio̍h siū sím-phuàⁿ；só͘-í lán iáu-kú ua̍h tī sè-kan tio̍h tāi-sing pī-pān āu-lâi sím-phuàⁿ ê tāi-tsì.Kiám-tshái mn̄g，"Tio̍h kiâⁿ sím-mi̍h lâi pī-pān，tsiah uē ún-tàng，m̄-sái kiaⁿ sí-āu ê sím-phuàⁿ？"Tsiū thang ìn kóng，"Tio̍h sìn uá-khò kiù-tsú，in-uī Sìng-tsheh kóng，"Sìn tsiū tit-tio̍h kiù；m̄ sìn tsiū tīng-tsuē. ""Kiám-tshái koh mn̄g，"Tsáiⁿ-iūⁿ uē tsai sī sîng-si̍t sìn I？"Ìn kóng，"Tio̍h khuàⁿ ū tshut-la̍t o̍h I ê só͘ kiâⁿ lâi thàn I lóng-tsóng ê kà-sī á bô. "Lán nā o̍h Kiù-tsù ê só͘ kiâⁿ，thàn I ê kà-sī，tsin-tsiàⁿ tsuè I ê ha̍k-sing，ài lī-ik tsìng-lâng.Tsit ê sī pîn-kù，sī sîng-si̍t thiàⁿ Tsú；tī sím-phuàⁿ ê sî tik-khak hō͘ Tsú tsiap-;a̍p kàu íng-uán-ua̍h.

思羅安台語點字網站