《耶穌言行錄》

| | | 轉寄

Tē-89-tsiuⁿ,Pí-tik m̄ jīn Iâ-so͘

作者 Ko Kim-sing. 2009.12.20

（Má-thài 26：69-75；Má-khó 14：66-72； Lō͘-ka 22：54-62；Iok-hān 18：15-27）
Lâng thua Iâ-so͘ kàu Kai-a-huat ê só͘-tsāi.Pí-tik hn̄g-hn̄g tè kàu gê-mn̂g，ji̍p-khì kap gê-ia̍h tsē，ài khuàⁿ tāi-tsì kàu bîng-pi̍k.Tī tiâⁿ-nih ū lâng khí hé，Pí-tik teh tsiò hé，ū tsi̍t ê lú-pī khuàⁿ i，tsiū kóng，"Tsit ê lâng ia̍h bat kap Iâ-so͘ tsuè-tui. "Pí-tik m̄ jīn，kā hit ê lú-pī kóng，"Guá m̄-bat I. "Tiap-á-kú koh ū tsi̍t lâng khuàⁿ-kìⁿ i，kóng，"I ia̍h sī I ê lâng. "Pí-tik kóng，"Guá m̄-sī. "Koh puàⁿ-sî kú，iū ū tsi̍t lâng tshut-la̍t kóng，"Tsit ê lâng si̍t-tsāi bat kap Iâ-so͘ tsuè-tui，in-uī sī Ka-lī-lī ê lâng. "Pí-tik lué-mē koh tsiù-tsuā kóng，"Lí só͘ kóng ê uē，guá buē hiáu-tit. "Teh kóng ê sî kue tsiū thî.Tsú ua̍t-thâu khuàⁿ Pí-tik，Pí-tik kì-tit Tsú ê uē. "Kue thî ê tāi-sing，lí uē saⁿ-pái kóng m̄-bat guá；"tsiū tshut-khì tuā thî-khàu.

Tha̍k tsí kuí tsat hō͘ lán thang tsai huān tāi-tsì m̄-thang uá-khò ka-kī ê khuì-la̍t，in-uī bô ún-tàng；tshin-tshiūⁿ Pí-tik kā Tsú kóng，"Sui-jiân kàu sí ia̍h bô kóng m̄-bat lí；"nā-sī koh bô luā-kú，tsiū kiaⁿ-hiâⁿ kóng pe̍h-tsha̍t，koh tsiù-tsuā kóng i m̄-bat Iâ-so͘.Pí-tik āu-lâi m̄-nā tsai ka-kī ê luán-jio̍k，ia̍h uàn-hūn ka-kī m̄ jīn Tsú ê tāng-tsuē，tuā-tuā huán-hué.Pí-tik huán-hué tsuē ê khuán-sit put-tsí thang tsuè lán ê khuàⁿ-iūⁿ.

思羅安台語點字網站