《耶穌言行錄》

| | | 轉寄

Tē-90-tsiuⁿ, Ka-lio̍k lâng Iû-tāi ê kiat-kio̍k

作者 Ko Kim-sing. 2009.12.27

（Má-thài 27：3-10； Sù-tô͘ Hīng-tuān 1：15-20）
Thiⁿ-kng，tsè-si-tiúⁿ，tiúⁿ-ló saⁿ-kap kè-bô͘ kong-kik Iâ-so͘，ài hō͘ I sí；tsiū pa̍k lâi thua I kè-sàng hō͘ tsóng-tok Pún-tiu Pí-lia̍p-to.Hit-sî buē sian-siⁿ ê Iû-tāi khuàⁿ-kìⁿ Iâ-so͘ tīng-tsuē tsiū huán-hué，the̍h hit ê gûn saⁿ-tsa̍p ê koh hîng tsè-si-tiúⁿ，tiúⁿ-ló，kóng，"Guá buē bô tsuē-kuà ê lâng ê huih，guá ū tsuē lah. "

Tsìng-lâng kóng，"Kap guán ū sím-mi̍h kap-sia̍p？lí ka-kī tio̍h tng. "Iû-tāi pàng hiat-ka̍k hiah ê gûn tī tiān-lāi，thè-khì tiàu-sí，sing-khu pua̍h-tó，pak-tó͘ li̍h-khui，tn̂g-á lâu-tshut.

Tsè-si-tiúⁿ kóng，"Īng huih-kè lok tī khò͘-pâng m̄ ha̍p-gî，"tsiū īng hit ê gûn bué tsi̍t-phiàn tuē，tsuè thióng-suaⁿ lâi tâi tshut-guā lâng.Lâng tsiū kiò hit ê tuē，"Huih-tuē. "

Lūn Iû-tāi buē sian-siⁿ，káⁿ bô phah-sǹg Iâ-so͘ uē hō͘ lâng tīng I sí-tsuē；kàu khuàⁿ I siū tīng-tsuē，tsiū huán-hué；tsóng-sī i ê huán-hué m̄-sī tshin-tshiūⁿ Pí-tik tshim-tshim uàn-hūn ka-kī ê tsuē，kiû sià-bián；put-kò sī tsai ka-kī ê só͘ kiâⁿ ū jiá tuā siū-khì，tsiū sit-tsì，lóng m̄-káⁿ ǹg-bāng Siōng-tè sià-bián i.

思羅安台語點字網站