《巴克禮普世版聖經（試讀本）》

 | | | 轉寄

巴克禮普世版（試讀本） 哥林多後書第十二章

作者 巴克禮普世版小組 2015.07.12

Īⁿ-siōng kah Khé-sī
1 Sui-jiân bô lī-ik, guá it-tīng tio̍h khua-kháu. Guá beh kóng-khí Tsú hō͘ guá ê īⁿ-siōng kah khé-sī. 2 Guá tsai ū tsi̍t-ê Ki-tok-tô͘, tsa̍p-sì nî tsîng hō͘ Tsú tuà kàu tē-saⁿ-tsàn thiⁿ. Guá m̄-tsai i ê sing-khu ū tsiūⁿ-khì á-sī kan-taⁿ khuàⁿ-kìⁿ īⁿ-siōng. Tsí-ū Siōng-Tsú tsai. 3 Guá koh kóng tsi̍t-pái, tsit-ê lâng hông tshuā khì-kàu Lo̍k-hn̂g. I sī sing-khu siū-tsiap tsiūⁿ-khì á-sī kan-taⁿ khuàⁿ-kìⁿ īⁿ-siōng. Guá m̄-tsai, tsí-ū Siōng-Tsú tsai. 4 Tī Lo̍k-hn̂g, i thiaⁿ-tio̍h bē-tit-thang kóng ê uē, tsiū-sī lâng só͘ m̄-thang kóng ê tāi-tsì. 5 Guá beh uī-tio̍h tsit-ê lâng lâi khua-kháu, m̄-koh guá ê luán-jio̍k í-guā, guá bē uī-tio̍h ka-kī khua-kháu. 6 Kî-si̍t guá nā beh khua-kháu, mā bô sǹg-sī khong-khám, in-uī guá beh kóng ê sī sū-si̍t, m̄-koh guá ka-kī iok-sok, tsiah bián hō͘ lâng tuì guá ê phue-phîng tshiau-kuè i só͘ khuàⁿ-tio̍h kah só͘ thiaⁿ-tio̍h-.ê. 7 Uī-tio̍h beh hō͘ guá bē in-uī tit-tio̍h tsin-tsē ti̍k-pia̍t ê khé-sī lâi kuè-thâu kiau-ngō͘, tī guá ê sing-khu ū tsi̍t-ki tshì, tshin-tshiūⁿ Sat-tàn ê sù-tsiá lâi kā guá phah, bián-tit guá kuè-thâu kiau-ngō͘. 8 Uī-tio̍h tsit-hāng tāi-tsì, guá bat saⁿ-pái khún-kiû Tsú, hō͘ hit-ki tshì lī-khui guá. 9 Siōng-Tsú ìn-kóng, "Guá ê un-tián kàu-gia̍h lí īng, in-uī lí luán-jio̍k ê sî, Guá ê khuì-la̍t ē-tàng uân-tsuân huat-hui." Só͘-í guá tsin huaⁿ-hí, khah ài khua-kháu guá tsiah-ê luán-jio̍k, hō͘ Ki-tok ê khuì-la̍t tiàm tī guá ê sin-tsiūⁿ. 10 Uī-tio̍h Ki-tok ê iân-kò͘, guá huaⁿ-hí jím-siū luán-jio̍k, bú-jio̍k, pik-hāi, khùn-khó͘, in-uī guá luán-jio̍k ê sî, tian-tò ū khuì-la̍t.


11 Pó-lô Kuan-sim Ko-lîm-to Kàu-huē Guá it-ti̍t tsiâⁿ-tsò gōng-lâng, sī lín kā guá pik ê, in-uī guá ing-kai hō͘ lín o-ló tsiah tio̍h. Guá sui-jiân bô sím-mi̍h liáu-put-khí, si̍t-tsāi mā bô khah-su hiah-ê ti̍k-pia̍t ê "sù-tô͘". 12 Guá tī lín tiong-kan ū īng tsióng-tsióng ê jím-nāi lâi kiâⁿ sîn-jiah, kî-sū kah kuân-lîng, tsìng-bîng guá sī sù-tô͘. 13 Tû-liáu guá bô mâ-huân lín pang-tsō͘ guá í-guā, guá tuì-thāi lín ū tó tsi̍t-hāng pí kî-tha ê kàu-huē khah bô kàu-gia̍h? Tshiáⁿ lín guân-liōng guá tsiah-ni̍h "bô kong-tō". 14 Taⁿ guá tē-saⁿ pái tsún-pī beh khì lín hia, guá bē tsiâⁿ-tsò lín ê hū-tam, guá tuì lín bô sím-mi̍h iau-kiû. Guá só͘ ì-ài ê sī lín, m̄-sī lín ê kim-tsîⁿ. Kî-si̍t kiáⁿ-jî bô ing-kai uī-tio̍h pē-bú tsik-tsū, ing-kai sī pē-bú kā kiáⁿ-jî tsik-tsū tsâi-bu̍t. 15 Guá tsin huaⁿ-hí hù-tshut it-tshè lâi pang-tsō͘ lín, sīm-tsì hù-tshut guá ka-kī ê sèⁿ-miā. Kám kóng guá jú thiàⁿ lín, tit-tio̍h lín ê thiàⁿ jú tsió? 16 Án-ne lín tio̍h sîng-jīn guá m̄-bat kā lín thua-luī, m̄-koh ū-lâng kóng guá kî-khiáu, īng khuí-khiat ê pō͘-sò͘ lâi kā lín hām-hāi. 17 Guá kám ū phài siáⁿ-lâng khì kā lín phiⁿ? 18 Guá ū khǹg Thê-to khì lín hia, mā tshe-phài tsi̍t-ê hiaⁿ-tī kah i tsò-hué khì. Thê-to kám bat kā lín phiⁿ? Guán kám m̄-sī kāng tsi̍t-ê sim-sîn teh tsò? kāng tsi̍t-ê kha-pō͘ teh kiâⁿ? 19 Lín it-ti̍t siūⁿ-kóng guán tuì lín teh uī ka-kī piān-kái. Kî-si̍t m̄-sī! Guán tī Siōng-Tsú ê bīn-tsîng kóng Ki-tok ài guán kóng ê uē. Tshin-ài ê hiaⁿ-tī tsí-muē ah, guán só͘ tsò ê it-tshè lóng sī uī-tio̍h beh kā lín tsō-tsiū. 20 Guá khióng-kiaⁿ khì lín hia ê sî, kiám-tshái khuàⁿ-kìⁿ lín kah guá só͘ kî-thāi ê bô kāng-khuán, lín khuàⁿ-kìⁿ guá kah lín só͘ kî-thāi ê mā bô kāng-khuán. Khióng-kiaⁿ lín ū hun-tsing, uàn-tò͘, siū-khì, kiat-tóng, huí-pòng, kóng kha-tsiah-āu-uē, phòng-hong, hun-luān. 21 Mā khióng-kiaⁿ guá āu-piàn koh khì lín hia ê sî, guá ê Siōng-Tsú hō͘ guá tī lín ê bīn-tsîng kiàn-siàu, guá ē uī-tio̍h tsin-tsē lâng thî-khàu, in-uī in tuì í-tsîng só͘ huān ê tsuē, ù-uè, kan-îm kah hòng-tōng, kàu taⁿ iáu-buē hué-kái.