《巴克禮普世版聖經(試讀本)》

| | | 轉寄

巴克禮普世版(試讀本) 約翰一書第三章

Siōng-Tsú ê Kiáⁿ-jî
1 Lín siūⁿ-khuàⁿ Thiⁿ-Pē juā-ni̍h thiàⁿ lán, hō͘ lán thang kiò-tsò Siōng-Tsú ê kiáⁿ-jî. Sū-si̍t-siōng lán sī I ê kiáⁿ-jî, só͘-í sè-kan-lâng m̄-bat lán, sī in-uī in m̄-bat Siōng-Tsú. 2 Tshin-ài ê hiaⁿ-tī tsí-muē, tsit-má lán tsò Siōng-Tsú ê kiáⁿ-jî, tsiong-lâi ē piàn án-tsuáⁿ iáu-buē hián-bîng. Lán tsai I nā tsài-lîm, lán tsiū ē tshin-tshiūⁿ I, in-uī lán ē khuàⁿ-tio̍h I ê tsin-siōng. 3 Ki-tok sī sûn-kiat, só͘-í tuì Ki-tok ū tsit-tsióng ǹg-bāng ê lâng ē ka-kī pó-tshî sûn-kiat. 4 Lâng nā huān-tsuē tsiū-sī uî-puē Siōng-Tsú ê lu̍t-huat, in-uī tsuē tsiū-sī uî-puē lu̍t-huat. 5 Lín tsai Ki-tok hián-hiān sī beh tû-khì lâng ê tsuē, m̄-koh I pún-sin bô tsuē. 6 Kah Ki-tok kiat-liân ê lâng bē kè-sio̍k huān-tsuē. Kè-sio̍k huān-tsuē ê lâng m̄-bat khuàⁿ-tio̍h Ki-tok, mā lóng m̄-bat I. 7 Sè-kiáⁿ, m̄-thang hō͘ lâng kā lín bê-hi̍k. Tsun-hîng kong-gī tsiah sī gī-lâng, tú tshin-tshiūⁿ Ki-tok sī gī-lâng. 8 Kè-sio̍k huān-tsuē ê lâng sī sio̍k Mô͘-kuí, in-uī Mô͘-kuí tuì khí-thâu to̍h huān-tsuē. Siōng-Tsú ê Kiáⁿ hián-hiān ê bo̍k-tik sī beh huí-huāi Mô͘-kuí ê kang-tsok. 9 Siōng-Tsú ê kiáⁿ-jî bē kè-sio̍k huān-tsuē, in-uī ū Siōng-Tsú ê ua̍h-miā tī in lāi-bīn. Kì-jiân Siōng-Tsú sī in ê Thiⁿ-Pē, in bē kè-sio̍k huān-tsuē. 10 Siōng-Tsú ê kiáⁿ-jî kah Mô͘-kuí ê kiáⁿ-jî khu-pia̍t kah tsin tshing-tshó. Bô tsun-hîng kong-gī kah bô thiàⁿ hiaⁿ-tī tsí-muē ê lâng to̍h m̄-sī Siōng-Tsú ê kiáⁿ-jî.

Tio̍h Sio-thiàⁿ
11 Lán tio̍h sio-thiàⁿ, tse sī lín tuì khí-thâu to̍h thiaⁿ-tio̍h ê sìn-sit. 12 Lán m̄-thang tshin-tshiūⁿ Kai-ún, i sio̍k siâ-ok, thâi-sí ka-kī ê sió-tī. I Sím-mi̍h iân-kò͘ thâi-sí ka-kī ê sió-tī? In-uī i ê hîng-uî siâ-ok, m̄-koh sió-tī ê hîng-uî tsìng-ti̍t. 13 Hiaⁿ-tī tsí-muē, sè-kan-lâng nā uàn-hūn lín, m̄-thang kám-kak kî-kuài. 14 Lán tsai lán í-king tshut-sí ji̍p-ua̍h, in-uī lán ū thiàⁿ hiaⁿ-tī tsí-muē. Bô thiàⁿ-sim ê lâng iáu tī sí-bông ê kuán-hat. 15 Uàn-hūn hiaⁿ-tī á-sī tsí-muē ê lâng tsiū-sī sat-jîn-huān. lín mā tsai sat-jîn-huān bô íng-uán ê ua̍h-miā tī i ê sim-lāi. 16 Ki-tok uī lán hi-sing sèⁿ-miā, lán tsiū án-ne tsai sím-mi̍h sī thiàⁿ-sim. Lán mā ing-kai uī-tio̍h hiaⁿ-tī á-sī tsí-muē hi-sing sèⁿ-miā. 17 Nā ū hó-gia̍h-lâng khuàⁿ-tio̍h i ê hiaⁿ-tī á-sī tsí-muē ū khiàm-khueh bô tông-tsîng liân-bín ê sim, ná ē-tàng kóng i thiàⁿ Siōng-Tsú? 18 Sè-kiáⁿ, sio-thiàⁿ m̄-thang kan-taⁿ īng uē á-sī īng tshuì kóng, tio̍h īng hîng-tōng lâi tsìng-bîng.

Tī Siōng-Tsú Bīn-tsîng Ū Tsū-sìn
19 Tsiū án-ne, lán tsai lán sī sio̍k tsin-lí ê lâng. Lán nā siū liông-sim tsik-pī, tī Siōng-Tsú ê bīn-tsîng lán ē-tàng an-ún tsū-tsāi. 20 In-uī Siōng-Tsú pí lán ê sim khah tuā, mā ta̍k-hāng lóng tsai. 21 Tshin-ài ê hiaⁿ-tī tsí-muē, lán ê liông-sim nā bô kā lán tsik-pī, lán tī Siōng-Tsú ê bīn-tsîng tsiū thang an-jiân tsū-tsāi. 22 Lán bô-lūn tuì Siōng-Tsú kiû sím-mi̍h lóng ē tit-tio̍h, in-uī lán ū tsun-siú I ê bīng-līng, tī I ê bīn-tsîng tsò I só͘ huaⁿ-hí ê tāi-tsì. 23 I ê kài-bīng sī án-ne, lán tio̍h sìn I ê Kiáⁿ Iâ-so͘ Ki-tok ê miâ, mā tio̍h tsiàu I hō͘ lán ê bīng-līng sio-thiàⁿ. 24 Tsun-siú Siōng-Tsú ê kài-bīng ê lâng tsiū-sī kah I kiat-liân. Tuì Siōng-Tsú siúⁿ-sù hō͘ lán ê Sìng-Sîn, lán tsai Siōng-Tsú ū kah lán kiat-liân.