《巴克禮普世版聖經(試讀本)》

| | | 轉寄

巴克禮普世版(試讀本) 啟示錄第八章

Tē-tshit-ê Hong-ìn
1 Iûⁿ-ko khui tē-tshit-ê hong-ìn ê sî, thiⁿ-tíng tsīng-tsīng iok puàⁿ-tiám-tsing kú. 2 Jiân-āu guá khuàⁿ-tio̍h hit tshit-ê thiⁿ-sài khiā tī Siōng-Tsú ê bīn-tsîng, in ū niá-siū tshit-ki la-pa. 3 Līng-guā tsi̍t-ê thiⁿ-sài phâng kim hiuⁿ-lô͘ lâi khiā tuà tsè-tuâⁿ piⁿ. I ū niá-siū tsin-tsē hiuⁿ thang kah tsìng sìn-tô͘ tsò-hué kî-tó hiàn tī pó-tsō tsîng ê kim tsè-tuâⁿ tíng. 4 Hiuⁿ-ian kah tsìng sìn-tô͘ ê kî-tó tuì thiⁿ-sài ê tshiú tshìng kàu Siōng-Tsú ê bīn-tsîng. 5 Jiân-āu thiⁿ-sài phâng hit-ê hiuⁿ-lô͘, tsiong tsè-tuâⁿ-tíng ê hué té kàu muá tsiah hiat lo̍h-khì tē-tsiūⁿ, suî-sî ū tân-luî ê siaⁿ, sih-nà kah tē-tāng.

Lat-pah
6 Gia̍h tshit-ki lat-pah hit tshit-ê thiⁿ-sài tsún-pī hó-sè beh pûn. 7 Thâu-tsi̍t-ê thiⁿ-sài pûn, suî-sî ū pha̍uh kah hué tsham hueh piàⁿ-lo̍h tē-tsiūⁿ. Saⁿ-hūn tsi-it ê tē sio-sio-khì, saⁿ-hūn tsi-it ê tshiū-ba̍k sio-sio-khì, só͘-ū ê tsheⁿ-tsháu mā lóng sio-sio-khì. 8 Tē-jī ê thiⁿ-sài tsi̍t-ē pûn, suî-sî ū tshin-tshiūⁿ hué teh sio ê tuā-suaⁿ hiat-lo̍h hái. Saⁿ-hūn tsi-it ê hái piàn-tsò hueh. 9 Hái-ni̍h só͘ ū ê ua̍h-mi̍h saⁿ-hūn tsi-it sí-khì. Tsûn-tsiah mā ū saⁿ-hūn tsi-it phuà-khì. 10 Tē-saⁿ ê thiⁿ-sài tsi̍t-ē pûn, suî-sî ū tuā-lia̍p tsheⁿ tuì thiⁿ-tíng lak lo̍h-lâi, tshin-tshiūⁿ teh-to̍h ê hué-pé, lak tī saⁿ-hūn tsi-it ê kang-hô kah tsuí-guân. 11 Tsit-lia̍p tsheⁿ ê miâ-kiò-tsò "Khó͘-hiāⁿ". Saⁿ-hūn tsi-it ê tsuí piàn khó͘. Tsin-tsē lâng uī-tio̍h tsiah-ê tsuí sí-khì, in-uī tsuí piàn khó͘. 12 Tē-sì ê thiⁿ-sài tsi̍t-ē pûn, ji̍t ê saⁿ-hūn tsi-it, gue̍h ê saⁿ-hūn tsi-it, tsheⁿ ê saⁿ-hūn tsi-it, lóng siū-tio̍h kong-kik, tì-sú ji̍t, gue̍h, tsheⁿ ê saⁿ-hūn tsi-it piàn-tsò àm. Ji̍t-sî saⁿ-hūn tsi-it bô kng, àm-sî mā saⁿ-hūn tsi-it bô kng. 13 Jiân-āu guá koh khuàⁿ, ū thiaⁿ-tio̍h tsi̍t-tsiah tī khong-tiong teh pue ê ing-tsiáu tuā-siaⁿ kóng, "Ū tsai-hō à, ū tsai-hō à, tuà tī tē-tsiūⁿ ê lâng ū tsai-hō à, in-uī kî-tha saⁿ-ê thiⁿ-sài teh-beh koh pûn lat-pah!"