《巴克禮普世版聖經（試讀本）》

 | | | 轉寄

巴克禮普世版（試讀本） 馬可福音第十三章

作者 巴克禮普世版小組 2013.03.10

Iâ-so͘ Ī-giân sìng-tiān Siū Huí-huāi (Mt 24:1-2; Lk 21:5-6)
Iâ-so͘ tuì sìng-tiān tshut-lâi ê sî. ū tsi̍t-ê bûn-tô͘ kā I kóng, " Lāu-su, Lí khuàⁿ leh, tsio̍h-thâu hiah-ni̍h tuā-tè, kiàn-tio̍k-bu̍t hiah-ni̍h tông-hông!" 13:2 Iâ-so͘ kā i kóng, " Lí khuàⁿ tsiah-ê tuā kiàn-tio̍k-bu̍t ò͘? Tsiong-lâi tī tsia bô tsi̍t-tè tsio̍h ē sio-tha̍h, lóng ē hō͘ lâng thiah kah pêⁿ-pêⁿ-pêⁿ."

Tsai-lān kah Pik-hāi (Mt 24:3-14;10:17-22;Lk 21:7-19)
13:3 Iâ-so͘ tī Kan-ná-suaⁿ ǹg sìng-tiān teh tsē ê sî, Pí-tik, Ngá-kok, Iok-hān kah An-tik-lia̍t thau-thau-á mn̄g Iâ-so͘ kóng, 13:4 " Tshiáⁿ kā guán kóng, tang-sî ē huat-sing tsit-ê tāi-tsì? Á tsiah-ê tāi-tsì beh huat-sing tsìn-tsîng, kám ū siáⁿ-mi̍h tiāu-thâu?" 13:5 Iâ-so͘ ìn kóng, " Lín tio̍h kín-sīn, m̄-thang hō͘ lâng kā lín bê-hi̍k. 13:6 Ū tsin-tsē lâng ē lī-iōng guá ê miâ, kóng, 'Guá sī Ki-tok', lâi bê-hi̍k tsin-tsē lâng. 13:7 Lín thiaⁿ-tio̍h tsiàn-tsing kah tsiàn-tsing ê hong-siaⁿ ê sî, m̄-bián kiaⁿ, in-uī tsiah-ê tāi-tsì it-tīng ē huat-sing, m̄-koh bua̍t-ji̍t iáu-buē kàu. 13:8 In-uī bîn-tso̍k ē khí-lâi kong-kik bîn-tso̍k, kok-ka mā ē kong-kik kok-ka. Ta̍k só͘-tsāi ē ū tē-tāng, koh ū ki-hng. Tsiah-ê tāi-tsì tsiū-sī thòng-khó͘ ê khai-sí. 13:9 " Lín ka-kī tio̍h kín-sīn, in-uī lâng ē kā lín kau hō͘ gī-huē, lín ē tī huē-tn̂g-ni̍h siū piⁿ-phah. Lín mā ē uī-tio̍h Guá ê iân-kò͘ khiā tī kuaⁿ-hú kah kun-ông ê bīn-tsîng, lâi tuì in uī Guá tsò kiàn-tsìng. 13:10 M̄-koh Hok-im it-tīng tio̍h tāi-sing thuân hō͘ bān-bîn. 13:11 Lâng kā lín lia̍h khì kau hō͘ huat-tîng ê sî, m̄-bián sing huân-ló beh án-tsuáⁿ kóng. Hit sî lín tio̍h tsiàu lín só͘ tit-tio̍h Sìng-Sîn ê tsí-sī lâi kóng, in-uī m̄-sī lín ka-kī teh kóng, sī Sìng-Sîn teh kóng. 13:12 Hiaⁿ-tī ē tshut-bē hiaⁿ-tī hō͘ i sí. Lāu-pē mā ē án-ne khuán-thāi kiáⁿ-jî. Kiáⁿ-jî ē khí-lâi kong-kik pē-bú, kā in hāi-sí. 13:13 Lín koh ē in-uī Guá ê miâ lâi hō͘ tsìng-lâng uàn-hūn, m̄-koh jím-nāi kàu lō͘-bué ê lâng, ē tit-tio̍h tsín-kiù."

Tuā Tsai-lān (Mt 24:15-28;Lk 21:20-24)
13:14 " Tng lín khuàⁿ-tio̍h hit-ê ' khó-ò͘ⁿ ê Huí-bia̍t-tsiá', khiā tī bô ing-kai khiā ê só͘-tsāi (tha̍k ê lâng tio̍h bîng-pi̍k), hit sî tī Iû-thài tē-khu ê lâng lóng tio̍h tsáu-khì suaⁿ-ni̍h bih. 13:15 Tī tshù-tíng ê lâng, m̄-thang ji̍p-khì tshù-lāi the̍h mi̍h-kiāⁿ. 13:16 Tī hn̂g-ni̍h ê lâng, m̄-thang tńg-lâi hiaⁿh guā-saⁿ. 13:17 Tī hiah-ê ji̍t-tsí, ū sin-īn kah hō͘ eⁿ-á tsia̍h-ling ê hū-jîn-lâng, si̍t-tsāi tsin put-hīng! 13:18 Lín tio̍h kî-tó, kiû Siōng-Tsú mài tī tang-thiⁿ-sî huat-sing tsiah-ê tāi-tsì. 13:19 In-uī hiah-ê ji̍t-tsí teh-beh ū tuā tsai-lān, sī tuì Siōng-Tsú tshòng-tsō sè-kan í-lâi m̄-bat ū án-ne, tsiong-lâi mā bē koh ū. 13:20 Nā m̄-sī Siōng-Tsú kiám-tsió hiah-ê ji̍t-tsí, bô-lâng ē tit-kiù, m̄-koh uī-tio̍h I só͘ kíng-suán ê tsú-bîn, I í-king ū kiám-tsió hiah-ê ji̍t-tsí. 13:21 " Hit sî nā ū-lâng kā lín kóng, ' Ki-tok tī tsia', á-sī kóng, ' Tī hia', m̄-thang siong-sìn. 13:22 In-uī beh ū ké Ki-tok kah ké-sian-ti ē tshut-hiān, kiâⁿ sîn-jiah kah kî-sū, tsīn-liōng beh lâi bê-hi̍k Siōng-Tsú ê suán-bîn. 13:23 Lín tio̍h kín-sīn. Guá í-king lóng sū-sian kā lín kóng à."

Jîn-tsú ê Kàng-lîm (Mt 24:29-31;Lk 21:25-28)
13:24 Tng hiah-ê tsai-lān kuè-liáu ê ji̍t-tsí, ji̍t ē piàn o͘-àm, gue̍h bē huat-kng, 13:25 Tsheⁿ ē tuì thiⁿ-tíng lak lo̍h-lâi, thiⁿ-tíng ê bān-siōng ē iô-tāng. 13:26 Hit sî, lâng ē khuàⁿ-tio̍h Jîn-tsú tshiong-muá tuā kuân-lîng kah îng-kng, tsē hûn kàng-lîm. 13:27 Hit sî, Siōng-Tsú ē tshe thiⁿ-sài tuì sì-hng, tuì tē-ki̍k kàu thiⁿ-piⁿ, tsū-tsi̍p I ê suán-bîn."

Bû-hua-kó-tshiū ê Kà-sī (Mt 24:32-35;Lk 21:29-33)
13:28 " Lín tio̍h tuì bû-hua-kó-tshiū tsit-ê phì-jū lâi ha̍k-si̍p. Tng tshiū-ki puh-íⁿ huat-hio̍h ê sî, lín to̍h tsai hē-thiⁿ teh-beh kàu à. 13:29 Án-ne lín khuàⁿ-tio̍h tsiah-ê tiāu-thâu, to̍h tsai Jîn-tsú í-king teh-beh tsài-lîm à, lâi-kàu mn̂g-kháu à. 13:30 Guá si̍t-tsāi kā lín kóng, " Tsit sè-tāi iáu-buē kuè-khì, tsiah-ê só͘-ū ê tāi-tsì lóng ē huat-sing. 13:31 Thiⁿ kah tē ē siau-sit, m̄-koh Guá ê uē bē siau-sit."

Bô-lâng Tsai Hit-ê Ji̍t, Hit-ê Sî (Mt 24:36-44)
13:32 " Kuan-hē hit-ê ji̍t kah hit-ê sî, bô-lâng tsai, tī thiⁿ-tíng ê thiⁿ-sài mā m̄-tsai, kiáⁿ mā m̄-tsai, kan-taⁿ Thiⁿ-Pē tsai. 13:33 Tio̍h kín-sīn, tio̍h kíng-síng lâi kî-tó, in-uī lín m̄-tsai hit-ê sî-khik tang-sî ē kàu. 13:34 Tse tú tshin-tshiūⁿ tsi̍t-ê lâng tshut-guā, kā kuân kau-tài i ê lô͘-po̍k, ū hun-phuè kang-tsok hō͘ ta̍k-lâng tsò, koh huan-hù kò͘-mn̂g ê tio̍h tiuⁿ-tî. 13:35 Só͘-í lín tio̍h tiuⁿ-tî, in-uī lín m̄-tsai lín ê tsú-lâng tang-sî ē tńg-lâi, hi̍k-sī beh-àm-á, hi̍k-sī puàⁿ-mê, hi̍k-sī kue thî ê sî, hi̍k-sī thiⁿ-kng ji̍t tshut ê sî. 13:36 khióng-kiaⁿ tsú-lâng hut-jiân tńg-lâi, khuàⁿ-tio̍h lín teh khùn. 13:37 Guá só͘ kā lín kóng ê, mā ū kā kûn-tsiòng kóng: Tio̍h tiuⁿ-tî."