《押韻啟應詩篇》

台語押韻啟應詩篇 11

作者 Tinn Jî-gio̍k

11 Tāi-pi̍t ê si, kau hōo Ga̍k-kuann.

1a　Gúa sī úa-khò Iâ-hô-hua,
　　我　是　倚靠　耶　和　華，
　　lín siánn-sū tùi gúa ê sîn-hûn oo-pe̍h huah?
　　恁　甚　事　對　我　的神　魂　黑　白　喝？
1b　　　Lín tio̍h tshin-tshiūnn tsiáu, pe-khì lín ka-kī ê suann.
　　　　恁　當　親　像　鳥，　飛　去　恁　自己　的山。

2a　Khùann ah , pháinn-lâng tiunn king, an in ê tsìnn bih tī mn̂g-phāng,
　　看 啊，歹 人 張 弓， 安 伊 的 箭 匿 在 門 縫，
2b　　　Beh àm-tsīnn siā sim-lāi tsìng-ti̍t ê lâng.
　　　　要 暗 靜 射 心 內 正 直 的 人。

3a　Tūe-ki nā tó-hūai--khì,
　　地 基 若 倒 壞 去，
3b　　　Gī -lâng iáu ūe tsùe sím-mi̍h?
　　　　義 人 尚 會 做 甚 麼？

4a　Iâ-hô-hua tī I ê sìng-tiān,
　　耶 和 華 在 祂 的 聖 殿，
4b　　　Iâ-hô-hua ê pó-tsō tī thinn ê tshim-ian.
　　　　耶 和 華 的 寶 座 在 天 的 深 淵。

4c　I ê ba̍k-tsiu teh khùann tūe-tsiūnn múi tsi̍t-phāng.
　　祂 的 目 珠 在 看 地 上 每 一 縫。
4d　　　I ê ba̍k-tsiu kàm-tshat sè-kan-lâng.
　　　　祂 的 目 珠 鑑 察 世 間 人。

5a　Iâ-hô-hua tiâu-tsa gī-lâng kap pháinn-lâng,
　　耶 和 華 調 查 義 人 及 歹 人，
5b　　　To̍k-to̍k I ê sim ùan-hūn ài kiông-pō ê lâng.
　　　　獨 獨 祂 的 心 怨 恨 愛 強 暴 的 人。

6a　I beh tsiong lô-bāng pha tī pháinn-lâng,
　　祂 要 將 羅 網 撒 在 歹 人，
6b　　　Bô thang siám-phiah.
　　　　無 通 閃 避。

6c　Ū hé-iām, jiû-n̂g , kap jia̍t-hong teh hang,
　　有 火 燄、 硫 黃、 及 熱 風 在 烘，
6d　　　Tsùe in pue-tiong ê hūn-gia̍h.
　　　　做 伊 杯 中 的 份 額。

7a　In-ūi Iâ-hô-hua sī kong-gī , I huann-hí kong-gī ,
　　因 為 耶 和 華 是 公 義，祂 歡 喜 公 義，
7b　　　Tsìng-ti̍t ê lâng beh kìnn-tio̍h I ê bīn lâi huann-hí .
　　　　正 直 的 人 要 見 著 祂 的 面 來 歡 喜。