《押韻啟應詩篇》

 | | | 轉寄

台語押韻啟應詩篇 49

作者 Tīⁿ Jî-gio̍k 2006.12.17

49　　Khó-la̍h hō͘-è ê si; kau hō͘ Ga̍k-kuaⁿ.

1a　Tsìng-peh-sìⁿ ah , lín lóng tio̍h thiaⁿ tsit-ê ,
　　眾 百 姓 啊， 恁 攏 著 聽 這 個，

1b　　　Sè-tsiūⁿ lóng-tsóng khiā-khí ê peh-sìⁿ ah ,
　　　　世 上 攏 總 居 起 的 百 姓 啊，

　　　　lín tio̍h àⁿ hī-khang thiaⁿ siông-sè .
　　　　恁 著 俯 耳 孔 聽 詳 細。

2a　Bô-lūn hā-tíng siōng-tíng pi-bî ,
　　無 論 下 等 上 等 卑 微，

2b　　　Hó-gia̍h sòng-hiong, lóng tio̍h án-ni .
　　　　好 額 貧 窮， 攏 著 按 呢。

3a　Guá ê tshuì beh kóng tì -huī ū kè-ta̍t,
　　我 的 嘴 要 講 智 慧 有 價 值，

3b　　　Guá ê sim só͘ siūⁿ sī thong-ta̍t .
　　　　我 的 心 所 想 是 通 達。

4a　Guá beh àⁿ hī-khang thiaⁿ phì-jū ê tsua̍t-tsiau,
　　我 要 俯 耳 孔 聽 譬 喻 的 絕 招 ，

4b　　　Guá beh īng khîm kué-bîng guá ê ò -biāu.
　　　　我 要 用 琴 解 明 我 的 奧 妙。

5a　Kan-ok tè guá ê kha-āu-tiⁿ sì -bīn uî guá,
　　奸 惡 隨 我 的 腳 後 跟 四 面 圍 我，

5b　　　Tī tsit-hō huān-lān ê ji̍t ,
　　　　在 此 號 患 難 的 日，

　　　　guá mih-sái kiaⁿ lâi ngia̍uh-ngia̍uh-tshuah?
　　　　我 何 必 驚 來 愕 愕 惙 ？

6a　Hiah-ê uá-khò in ê sè-li̍k--ê ,
　　那 些 倚 靠 伊 的 勢 力 者，

6b　　　Khua-kháu in ê pù -ū--ê .
　　　　誇 口 伊 的 富 有 者。

7a　Bô tsi̍t-ê ū huat-tō͘ thang sio̍k-huê ka-kī hiaⁿ-tī ê tuā-sè .
　　無 一 個 有 法 度 通 贖 回 自 己 兄 弟 的 大 小。

7b　　　Ia̍h buē-uē thuè i tsiong sio̍k-huê ê kè-tsîⁿ hō͘ Siōng-tè .
　　　　亦 不 會 替 他 將 贖 回 的 價 錢 給 上 帝。

8a　In-uī sio̍k-huê in ê sìⁿ-miā ê kè-tsîⁿ tsin kuì,
　　因為 贖 回 伊 的 性 命 的 價 錢 真 貴，

8b　　　Tsí-ū íng-uán pàng-suah tsit -ê kè-uī .
　　　　只 有 永 遠 放 撒 此 個 計 劃。

9a　Kiám ū khó-lîng hō͘ lâng tn̂g-tn̂g ua̍h--teh,
　　豈 有 可 能 使 人 長 長 活 著，

9b　　　Bô khuàⁿ-kìⁿ sìⁿ-miā ê kiat-bé .
　　　　無 看 見 性 命 的 結 尾。

10a　In -uī lâng khuàⁿ-kìⁿ tì-huī ê lâng sí ,
　　　因 為 人 看 見 智 慧 的 人 死，

10b　　　Gû-gōng ê lâng, kap ū lâng tshin-tshiūⁿ tsing-siⁿ,
　　　　　愚 憨 的 人， 與 有 人 親 像 畜 牲，

10c　Ia̍h tsuè-tsi̍t-ē bia̍t--khì;
　　　亦 作 一 下 滅 去;

10d　　　Lâu in ê tsîⁿ-tsâi hō͘ pa̍t-lâng--khì.
　　　　　留 伊 的 錢 財 給 別 人 去。

11a　In sim-lāi siūⁿ in ê tshù beh íng-uán tī-teh,
　　　伊 心 內 想 伊 的 厝 要 永 遠 在 的，

　　ia̍h siūⁿ in khiā-khí ê só͘-tsāi beh kàu bān-tāi ê sè-hē .
　　　亦 想 伊 居 起 的 所 在 要 到 萬 代 的世 系。

11b　　　In īng ka-kī ê miâ lâi hō-miâ ka-kī ê thó͘-tē .
　　　　　伊 用 自 己 的 名 來 號 名 自 己 的 土 地。

12a　Tsóng-sī lâng tiàm tī tsun-kuì ê tiong-kan bô juā kú,
　　　總 是 人 站 在 尊 貴 的 中 間 無 偌 久，

12b　　　Tshin-tshiūⁿ uē sí ê tsing-siⁿ khang-hu .
　　　　　親 像 會 死 的 畜 牲 空 虛。

13a　In kiâⁿ tsit-tiâu lō͘ , sī in ê gû-gōng,
　　　伊 行 此 條 路，是 伊 的 愚 憨，

13b　　　Tsóng-sī in í- āu ê lâng lóng iáu-kú lia̍h in ê uē tsuè tio̍h, teh tsông.
　　　　　總 是 伊 以 後 的 人 攏 尚 且 掠 伊 的 話 作 對，在 匆。

14a　In tshin-tshiūⁿ iûⁿ-kûn put-an ,
　　　伊 親 像 羊 群 不 安，

14b　　　Tiāⁿ-tio̍h tio̍h lo̍h im-kan;
　　　　　定 著 得 落 陰 間；

14c　Sí -bô beh tsuè in ê bo̍k-tsiá,
　　　死 無 要 作 伊 的 牧 者，

14d　　　Kàu tsá-khí tsìng-ti̍t ê lâng beh kuán-hat in tsi̍t-tsiah tsi̍t-tsiah.
　　　　　到 早 起 正 直 的人 要 管 轄 伊 一 隻 一 隻。

14e　In ê suí beh bia̍t-bô tī im-kan ê hái,
　　　伊 的 美 要 滅 無 在 陰 間 的 海，

14f　　　Tì -kàu bô khiā-khí ê só͘-tsāi.
　　　　　致 到 無 居 起 的 所 在。

15a　To̍k-to̍k Siōng-tè beh sio̍k-huê guá ê lîng-hûn lâi ko-sing,
　　　獨 獨 上 帝 要 贖 回 我 的 靈 魂 來 高 昇，

15b　　　Thuat-lī im-kan ê kuân-pìng;
　　　　　脫 離 陰 間 的 權 柄；

　　　　In-uī I beh tsiap-la̍p guá íng-sing.
　　　　　因 為 祂 要 接 納 我 永 生。

16a　Lâng huat-tsâi, ka-tîng ke-thiⁿ îng-kng,
　　　人 發 財， 家 庭 加 添 榮 光，

16b　　　Lí m̄-bián in-uī án-ni lâi kiaⁿ, ba̍k-tsiu ian-n̄g ;
　　　　　你 不 免 因 為 按 呢 來 驚， 目 珠 煙 暈；

17a　In -uī i sí , bô tsi̍t-hāng uē tuà--khì,
　　　因 為 他 死，無 一 項 會 帶 去，

17b　　　I ê îng-kng buē-uē tè i khì.
　　　　　他的 榮 光 不 會 隨 他 去。

18a　I tsāi-siⁿ sui-jiân ka-kī khua-kháu ū hok-khì,
　　　他 在 生 雖 然 自 己 誇 口 有 福 氣，

18b　　　（Lí nā gâu tsiàu-kò͘ ka-kī , lâng beh o-ló lí ,）
　　　　　你 若 賢 照 顧 自 己，人 要 讚美 你，

19a　Nā-sī i beh kui kàu i li̍k-tāi ê tsó͘-kong hia,
　　　若 是 他 要 歸 到 他 歷 代 的 祖 公 彼，

19b　　　In íng-uán bô khuàⁿ-kìⁿ ji̍t-kng teh siā .
　　　　　伊 永 遠 無 看 見 日 光 在 射。

20a　Lâng tiàm-tī tsun-kuì ê tiong-kan, ia̍h bô tshíⁿ-gō͘ ,
　　　人 站 在 尊 貴 的 中 間，亦 無 醒 悟，

20b　　　Sī tshin-tshiūⁿ uē sí ê tsing-siⁿ bô huat-tō͘ .
　　　　　是 親 像 會 死 的 畜 牲 無 法 度。