《台語荒漠甘泉（全羅版）》

"Iâ-soo sóo thiànn ê lâng"

作者 陳清俊 翻譯

listen


Pueh ge̍h tshue-tsa̍p (Pueh ge̍h tsa̍p ji̍t)

"Kì-jiân thiann-kìnn I phuà-pīnn, tsīu tī sóo tuà ê sóo-tsāi îu-guân tuà nn̄g ji̍t." (Iok-hān 11:6)

Tsú Iâ-soo hōo Lia̍p-sat-lōo tuì sí koh-ua̍h ê sîn-jiah kì-sū, sī īng “Má-tāi, kap I ê tsí-bē, kap Lia̍p-sat-lōo, lóng sī Iâ-soo sóo thiànn ê lâng.” (Iok-hān 11:5) tsi̍t kù uē tsuè khai-sí. Siōng-tè ná tshin-tshīunn ài īng tsit ê king-bûn kà-sī lán, I tuì-hù lán ê hong-huat bô-lūn juā am-khàm, juā sîn-pì, i ê tiong-sim-tiám, ki-pún-siōng sī ài lán kánn siong-sìn koh khíng-tīng I bû-hān, lán put-phuè, íng-uán put-piàn ê thiànn-thàng. Tsóng-sī tī thiànn ê lāi-bīn ū thòng-khóo huat-sing.

Má-tāi, Má-lī-a bô huâi-gî, Iâ-soo uē tsīn-liōng pâi-tû it-tshè ê tsóo-tòng, bô hōo in ê hiann-tī sí-khì. Tsóng-sī I thiann-kìnn Lia̍p-sat-lōo phuà-pīnn liáu-āu, îu-guân tī sóo khiā-khí ê sóo-tsāi tuà nn̄g ji̍t.

“Tsóng-sī” “kì-jiân” hōo lán thang khì sīunn, Iâ-soo bô li̍p-khik kàu Má-tāi, Má-lī-a ê tshù, m̄-sī in-uī bô thiànn in, si̍t-tsāi sûn-suì sī uī tio̍h thiànn. Nā m̄-sī uī-tio̍h bû-hān ê thiànn, I pún uē kín-kín khì kái-tû I sóo thiànn ê lâng ê siong-pi, tshit khì in ê ba̍k-sái, bô koh siong-pi khóo-thàng. Tsí ū Siōng-tè thiànn ê li̍k-liōng hōo Kìu-tsú ap-tsè I tsû-ài ê sim-tn̂g, thìng-hāu khóo-thàng ê thinn-sài uân-sîng i ê kang-tsok.

Siánn lâng uē kóo-kè thua-buâ kap khóo-thàng tuì lán ū lī-ik? Nā m̄-sī ū in, lán thái uē tit-tio̍h ki-tok-tôo sing-ua̍h ê tsin-tsuē hó ê tik-hīng. Nā m̄-sī ū khó-giām sìn-sim ê buâ-liān, lán ná uē ū sìn-sim? Nā sī bô tn̂g-tn̂g sīu-khóo ê thé-giām, bô khóo-lān ê puê-ióng, lán thái uē ū jím-nāi ah?

Tshin-ài ê! Thâu-tsîng ê lōo bô thang kiann,
Lán sóo bat ê Tsú tī sin-pinn sann kap kiânn,
Tshing-tshing tshó-tshó tī lán sim-iánn,
Lán sī I sóo thiànn ê kiánn.

I thiànn lán tngg oo-im thinn,
Siong-sim ji̍t hōo lán oh tam khí,
Iáu sī beh sìn-khò I,
In-uī lán sī I sóo thiànn kiánn-jî,

Sî-kan, kái-piàn it-tshè sū,
Khiok buē kái-piàn I ê un-huī,
Ki-tok ê sim tshiong-muá jîn-tsû,
In-uī lán sī I sóo thiànn kiánn-luī.



附註:《荒漠甘泉》漢羅版kap "Hong-bôoKam-tsuânn"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com