《台語荒漠甘泉（全羅版）》

"Àm-tiong sing-tióng"

作者 陳清俊 翻譯

listen



Pueh ge̍h jī-sì (Pueh ge̍h jī-tsa̍p-sì ji̍t)


"Guá ū tsiah ê mi̍h, kàu-gia̍h ū tshun, guá í-king tshiong-tsiok." (Hui-li̍p-pí 4:18)

Guá ū tsi̍t-pún uân-gē ê tsu, kî-tiong tsi̍t tsiunn ê miâ tsin tshù-bī, kiò-tsuè “Tī im-àm-tshù sing-tióng ê hue.” Tsu nih kóng-kàu hue-hn̂g lāi ū ji̍t-kngg tsiò buē-tio̍h ê sóo-tsāi, tān-sī ū ê hue m̄-nā uē tī àm-àm ê kak-lo̍h tuā-tsâng, iā sī su-iàu im-àm ê sóo-tsāi, hōo i sing-tióng khah hó-sè, koh uē khui hue.

Lîng-sìng ê sè-kài iā ū luī-sū ê tsîng-hîng. Ki-tok-tôo tī bu̍t-tsit khuân-kíng ki̍k khùn-lân ê sî, huán-tńg bōo-sīng khui hue. Tī im-àm tiong tióng-tuā. Tsit ê tsîng-hîng nā-sī phànn-kóo bô tsin-si̍t, lán tsuánn-īunn uē lâi kái-sik sù-tôo Pó-lô ê it-sing king-li̍k ah?

I siá tíng-bīn king-bûn ê sî, sī sīu kuainn tī Lô-má, i tsú-iàu ê sù-bīng ná tshin-tshīunn sīu tshiat-tn̄g. Tsóng-sī tsīu tī tse oo-àm ê khuân-kíng, i ê hue tuā-tuā khui tshut-lâi, tsi̍t-phiàn tshàn-lān. Pó-lô í-tsîng khó-lîng sī khuànn-tsuè tuā-lōo pinn hiánn-ba̍k ê hue, ū ji̍t-kngg tsin bōo-sīng, hiān-tsāi i sīu khíng-tīng, i sóo piáu-hiān bô-pí ê kian-kiông kap bí-lē. Siōng-tè ê ìng-ún phah-khui i sóo tsiông-lâi buē-bat thé-giām kè ê pó-tsông.

Tsiah-ê pó-tsông tiong ū Ki-tok ê un-tián, thiànn-thàng, hí-lo̍k, pîng-an tíng-tíng ê kî-biāu phín-tsit, in tī oo-àm tiong tsiah uē hián-lōo tshut ún-tsông tī luē-tsāi ê kong-hui. Àm, sip, lah-sap ê kann-lô piàn-tsuè Siōng-tè tsin-tō ê tîunn-sóo. Pó-lô sîng-sīu tio̍h i í-tsîng sóo buē-bat king-li̍k tio̍h ê hiah-nih hong-hù hiah-nih khuah-tuā ê lîng-sìng sán-gia̍p!

Lán kiám m̄-tsai, Sè-kan lâng, bô-lūn lâm á-sī lú tú-tio̍h oo-àm, koo-tuann ê sî, tsīu ná tshin-tshīunn teh tshīng kuì-tiōng ê ông-phàu, ū tit-tio̍h li̍k-liōng, kuân-ui, kap hi-bāng mah? Lâng sīu kuainn-kann, tsiong i ê tsâi-sán hong khí-lâi, tsóng-sī buē-thang hong-tiâu i tsing-sîn-siōng ê tsin-tsiànn tsâi-sán. In ê bu̍t-tsit khuân-kíng sī khuat-hua̍t ná sua-bôo khòng-iá, tsóng-sī “Khòng-iá kap ta-sò ê tuē tik-khak huann-hí; sua-bôo ia̍h beh khuài-lo̍k, koh tshin-tshīunn muî-kuì khui-hue.” (Í-sài-a 35:1). --- John Henry Jowett

Liân siōng suí ê hue, tī ji̍t-thâu ê kngg ē, i ê ē-bīn iā ū ka-kī ê iánn. Kngg ná kiông, i ê iánn, ná bîng-hián.

附註:《荒漠甘泉》漢羅版kap "Hong-bôoKam-tsuânn"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com