《巫義淵台語常用字》

 | | | 轉寄

常用字_33....「俶」

作者 巫義淵 2013.02.24

俶有三个讀音：1.tshiok (雀) 2.siok (宿) 3.thik (斥)。這字佇台文界真少人會曉使用。第一個讀音：tshiok、是開始的意思。例如：俶載[tshiok-tsài]起頭的意思，俶擾[tshiok-jiáu]開始擾亂的含意，抑是泛指所有動亂。第二個讀音：siok、是整理的含意。例如：俶裝待發[siok-tsong thāi-huat]綣行李準備起行的意思。第三個讀音：thik、是高遠的款式。通作倜。例如：俶儻[thik-thóng]＝倜儻[thik-thóng]超逸、超然物外；卓越不群的意思。

重點字詞：
【俶】1.tshiok (雀) 2.siok (宿) 3.thik (斥)。
【俶儻】[thik-thóng] (斥統)。俶儻不羈。
【俶擾】[tshiok-jiáu] (雀爪)。俶擾不寧。
【俶裝】[siok-tsong] (淑宗)。俶裝待發。

用例：
馬英九先生佇選舉的時陣，四界去 Home Stay 攏是【俶儻不羈】[thik-thóng put-ki]無拘小節，因按呢有人就相信伊是台灣人，亦附和伊講、台灣是中華民國、中華民國就是台灣，台灣人不是被殖民！這就是予人無法度理解的僥疑問題，既然咱的國家是自己的，為甚麼咱豈一定愛做中國人，國名也愛號做中國(中華民國)才會使？2012年3月22日國民黨的榮譽主席吳伯雄先生，佇北京佮中國共產黨的總書記胡錦濤先生見面的時陣，講台灣佮中國的關係是一國兩區，吳伯雄事後強調這是受人之託、忠人之事，意思就是奉馬英九的命令所講的話，造成全台灣的民心攏【俶擾不寧】[tshiok-jiáu put-lîng]，人人人心惶惶，佇國外若有卡卡的人、攏【俶裝待發】[siok-tsong thāi-huat]行李khuán 咧準備欲 làng 港，離開這塊主權 giōng 欲予人賣去的台灣。