《CTT出頭天園地》

 | | | 轉寄

I-sap 寓言 6

作者 TLH 2007.03.25

6. Sai kap Niáu-tshí
　Ū tsi̍t-pái, tsi̍t-tsiah sai teh khùn, tsi̍t-tsiah niáu-tshí-á peh khí-khì i ê sin-khu tíng, tsáu-lâi tsáu-khì. Sai hō͘ niáu-tshí-á tshá--tshéⁿ, khí-mo͘-bái, tsiū iōng tuā tshiú kā niáu-tshí-á hap--lo̍h--khì, tshuì koh khui~khui~khui, siuN7beh kā thun--lo̍h--khì.

　Niáu-tshí-á tuā-siaⁿ ai-kiû kóng, “Tāi-ông ah, tsit-pái tshiáⁿ lí guân-liōng--guá, lí ê un-tsîng guá ē íng-uán kì tī sim-kuaⁿ lāi. Bô tiāⁿ ū tsi̍t-ji̍t, guá ē-tàng pò-tap--lí. ” Sai thiaⁿ-tio̍h khì ài-tshiò, “Lí tsit-tsiah niáu-tshí-á-pó͘, ū sím-mi̍h tsâi-tiāu thang pò-tap--guá leh?” M̄-kú, sai iû-guân kā niáu-tshí-á pàng--khui, hō͘ i tsáu.

Kuè bô juā-kú, sai pua̍h-lo̍h-khì hām-tséⁿ. Phah-la̍h ê lâng beh kā ua̍h-lìng-lìng ê sai hiàn hō͘ kok-ông. In kā sai pa̍k tī tshiū-á-kha, beh khì tshuē tshia lâi tsài. Tsit-tsūn, tú-hó niáu-tshí-á tuì hia kiâⁿ--kuè, khuàⁿ-tio̍h sai pi-ai thòng-khó͘ ê bô͘-iūⁿ, tsiū tsáu kuè khì kā sai sin-khu tíng ê soh-á kā-tn̄g, tsin iāng-khì kā kóng, “Taⁿ, guá í-king pò-tap lí ê un-tsîng lah.” Niáu-tshí-á tsiū án-ne kā bān-siù-tsi-ông kiù tsáu.

　Tsiáu ē tī thiⁿ-tíng pue, hî ē tī tsuí--ni̍h siû, tō͘-ún-á ē tsǹg-thô͘, niáu-tshí-á ē ó͘-khang; lâng kóng, “ Lám-lám-bé mā ū tsi̍t-pō͘ that.” M̄-thang khuàⁿ niáu-tshí-á sè-tsiah koh bô-mi̍h, sió-tsut-á ū sî mā ē piàn ing-hiông!