《CTT出頭天園地》

 | | | 轉寄

I-sap 寓言 9

作者 TLH 2007.04.15

9. Sì-kha-á Thó beh Ài Tsi̍t ê Kun-ông
　Ū tsi̍t-tīn sì-kha-á tuà tī tsi̍t-ê tsin sik-ha̍p in tuà ê sip-tē. In sì-kè thiàu, ô͘-pe̍h sńg. M̄-kuán sī kā pa̍t-lâng phùn tâm--khì, á-sī hō͘ pa̍t-lâng thún--tio̍h, lóng bô lâng ē tshuē mâ-huân.Ji̍t-tsí kuè-liáu tsin sóng-khuài, bô-huân bô-ló.

　M̄-kú, in kám-kak án-ne bô kàu lí-sióng, ǹg-bāng ū tsi̍t-ê kun-ông kap tsi̍t-thò sik-ha̍p in ê kui-huān, tsiū kā Thiⁿ-sîn iau-kiû, “Uí-tāi ê Sîn ah, tshiáⁿ sàng tsi̍t-ê kun-ông lâi thóng-tī--guán, hō͘ guán tāi-ke ū kui-kí.”

　Thiⁿ-sîn thiaⁿ-tio̍h in ê iau-kiû suà khí ài-tshiò, tsiū tàn tsi̍t tuā kho͘ guân-bo̍k lo̍h-khì in ê sip-tē. Tshiū-kho͘ lak lo̍h-khì sip-tē ê sî, huat-tshut tsin tuā ê tsuí-siaⁿ. Tsia-ê sì-kha-á tsi̍t khai-sí kám-kak tsin kiaⁿ-hiâⁿ, koh tsin hò͘ⁿ-kî, tsuân-pō͘ lóng tsông-khì tsuí-piⁿ beh khuàⁿ in ê Kun-ông tàu-té sī seⁿ-tsò siáⁿ-khuán.

　Tāi-ke uî tī hia tán tsi̍t-tuāⁿ sî-kan khuàⁿ “I” lóng bô tōng-tsīng. Ū tsi̍t-nn̄g-tsiah khah ióng-kám--ê tsiū mō͘-hiám uá-kīn “I”, sīm-tsì tuā-táⁿ tshun-tshiú khì kā bong, “I” iû-guân bô tín-tāng. Tsia-ê sì-kha-á ing-hiông kui-khì khí-lí “I” ê tíng-bīn thiàu-làng-suh. Kî-tha ê sì-kha-á lóng tuè in án-ne tsò.

　Kué tsi̍t-tuāⁿ sî-ji̍t, tsia ê sì-kha-á ta̍k-kang bô-îng suî-lâng ê tāi-tsì, kin-pún bô khì tsù-ì tio̍h in hit ê Kun-ông, liân kóng-khí mā bô! In kám-kak tse m̄-sī in su-iàu ê, só͘-í in koh kā Thiⁿ-sîn iau-kiû in ê guān-bāng, “Guán beh ài ê sī tsi̍t-ê tsiàⁿ-káng ê kun-ông, ē-tàng hō͘ guán siú kui-kí ê kun-ông.”

　Tsit-pái Thiⁿ-sîn tsin siū-khì, tsiū sàng tsi̍t-tsiah tuā-tsiah Lā-pue tsò in ê kun-ông. Lā-pue tsik-sî kā sì-kha-á lóng thiah-tsia̍h lo̍h-pak. Tsit-tsūn, sì-kha-á siūⁿ beh huán-hué mā í-king bē hù lah!

　Guān-bāng sī bān-tn̄g tshim-kheⁿ, íng-uán bô buán-tsiok ê sî-ji̍t. Huân-sū tio̍h-ài pí-kàu--kuè tsiah tsai hó-bái. Tsū-jiân ê kui-huān tsóng pí jîn-uî, giâm-keh koh tsân-khok ê kui-huān khah hó.