《CTT出頭天園地》

 | | | 轉寄

I-sap 寓言 10

作者 TLH 2007.04.22

10. Suaⁿ teh Tín-tāng

　Ū tsi̍t-ji̍t, ū lâng tsù-ì tio̍h suaⁿ teh tín-tāng, suaⁿ-tíng teh tshìng ian. Thó͘-tē mā teh phi̍h-phi̍h-tsùn, tshiū-á tn̄g-tsat tó--lo̍h--khì, tuā tsio̍h-thâu lóng lak-lak--lo̍h--lâi. Tāi-ke lóng kám-kak it-tīng sī ū sím-mi̍h khióng-pò͘ ê tāi-tsì beh huat-sing lah. Só͘-ū ê lâng lóng tsū-tsi̍p tī kāng tsi̍t-ê só͘-tsāi, khuàⁿ tàu-té sī sím-mi̍h kuài-mi̍h beh tshut-hiān. In tī hia kho̍k-kho̍k-tán, m̄-kú sím-mi̍h lóng bô tshut-hiān.

　Āu--lâi, ū tsi̍t-tsūn koh khah ki̍k-lia̍t ê tē-tāng, tsi̍t-pîng ê suaⁿ li̍h--khui, li̍h tsi̍t-phāng tsin tuā-phāng. Tsuân-pō͘ ê lâng lóng ba̍k-tsiu kim-kim khuàⁿ kàu tuā-tshuì khui-khui. Lō͘-bué-tshiú, khuàⁿ-tio̍h tsi̍t-tsiah tsiok sè-tsiah ê niáu-tshí-á, sè-ka-lia̍p-á ê thâu tuì hit-ê suaⁿ-phāng tshun--tshut--lâi, tuì in tsit-pîng ti̍t-ti̍t tsáu--kuè--lâi.

　Ū lâng huah-kóng, “Siūⁿ-bē-kàu tsiah-ni̍h sè tsiah ê niáu-tshí-á kìng-jiân ē tsō-sîng suaⁿ-pang tē-li̍h!”